Norton 450 Urban ఆవిష్కరణ.. 47hp ఇంజిన్, 8-అంగుళాల TFT స్క్రీన్‌తో రెండు వేరియంట్లు
Norton 450 Urban బైక్‌ను EICMA 2026లో ఆవిష్కరించారు. 454cc ఇంజిన్, 47hp పవర్, క్రూయిజ్ కంట్రోల్, 8-అంగుళాల TFT స్క్రీన్ వంటి ఫీచర్ల వివరాలు ఇవే.
New Norton 450 Urban Specs: హాలీవుడ్ సైన్స్ ఫిక్షన్ సినిమాల్లో కనిపించే బైక్స్ తరహా డిజైన్‌తో కొత్త మోటార్‌సైకిల్‌ను Norton ఆవిష్కరించింది. EICMA 2026లో 450 Urban మోడల్‌ను తొలిసారిగా ప్రదర్శించింది. Norton పునరాగమనం తర్వాత వస్తున్న తొలి సింగిల్ సిలిండర్ బైక్ ఇదే. ఈ మోడల్‌ను రెండు వేరియంట్లలో అందించనున్నారు. ఒకటి సాధారణ రోడ్లపై ప్రయాణానికి అనువైన వెర్షన్ కాగా, మరొకటి Scrambler తరహా డిజైన్‌తో వస్తుంది. Norton లైనప్‌లో ఇది ఎంట్రీ లెవల్ మోడల్‌గా నిలవనుంది.
ఇంజిన్, పవర్ వివరాలు
Norton 450 Urbanలో 454cc లిక్విడ్ కూల్డ్ సింగిల్ సిలిండర్ ఇంజిన్‌ను అమర్చారు. ఇది 8,000rpm వద్ద 47hp పవర్, 6,000rpm వద్ద 45Nm టార్క్ ఉత్పత్తి చేస్తుంది. ఈ ఇంజిన్‌కు 6-స్పీడ్ గేర్‌బాక్స్‌ను జత చేశారు. క్విక్‌షిఫ్టర్ సదుపాయం కూడా ఉంది.
ఇంజిన్ పనితీరును మరింత స్మూత్‌గా ఉంచేలా ట్యూనింగ్ చేసినట్లు Norton చెబుతోంది. ముఖ్యంగా తక్కువ RPM నుంచే టార్క్ అందుబాటులో ఉండేలా, వేగం పెరిగే విధానం లీనియర్‌గా ఉండేలా రూపొందించారు. గేర్ మార్చకుండా ప్రయాణిస్తున్నప్పుడు కూడా మెరుగైన స్పందన లభించేలా ఇంజిన్‌ను సిద్ధం చేశారు.
ఛాసిస్, సస్పెన్షన్, బ్రేకులు
ఈ బైక్ రెండు వేరియంట్లలోనూ అల్యూమినియం ఫ్రేమ్‌ను ఉపయోగించారు. ముందు భాగంలో పూర్తిగా అడ్జస్ట్ చేసుకునే 43mm KYB USD ఫోర్క్ ఉంటుంది. వెనుక భాగంలో రీబౌండ్, ప్రీలోడ్ అడ్జస్ట్‌మెంట్ ఉన్న KYB మోనోషాక్‌ను అందించారు.
బ్రేకింగ్ కోసం ముందు 320mm Bybre డిస్క్, వెనుక 240mm డిస్క్ ఇచ్చారు. కార్నరింగ్ ABS కూడా అందుబాటులో ఉంటుంది. రెండు వేరియంట్లలోనూ 17-అంగుళాల కాస్ట్ వీల్స్, రోడ్ ఆధారిత టైర్లు ఉంటాయి.
ఇది కూడా చదవండి: ఇంటి నుంచే లెర్నర్ లైసెన్స్ పొందొచ్చు.. ఏఐ టెక్నాలజీతో ఎల్ఎల్ఆర్ ఎగ్జామ్.. రవాణా శాఖ కీలక నిర్ణయం
రెండు వేరియంట్ల మధ్య తేడాలేంటి?
Norton 450 Urbanను స్టాండర్డ్, Scrambler తరహా డిజైన్ ఉన్న రెండు వెర్షన్లలో తీసుకొస్తోంది. ప్రస్తుతానికి ఈ రెండు మోడళ్ల మధ్య ప్రధాన తేడాలు డిజైన్, బయట కనిపించే అంశాలకే పరిమితంగా ఉన్నాయి. ఇంజిన్, ఛాసిస్, ఇతర ప్రధాన పరికరాలు రెండింటిలోనూ ఒకేలా ఉంటాయి.
స్టాండర్డ్ 450 Urbanలో సిల్వర్ కలర్ కాస్ట్ వీల్స్, సిల్వర్ ఫ్రేమ్, రోడ్ టైర్లు ఉంటాయి. Scrambler తరహా వేరియంట్‌లో బ్లాక్ కాస్ట్ వీల్స్, గ్రే కలర్ ఫ్రేమ్, స్వింగ్‌ఆర్మ్ అందించారు. దీనికి అదనంగా పొడవైన మడ్‌గార్డ్స్, నకిల్ గార్డ్స్, ఫోర్క్ ప్రొటెక్టర్లు, ఫ్లైస్క్రీన్, ప్రత్యేకమైన సీట్ ట్రిమ్ ఉన్నాయి.
అత్యాధునిక ఫీచర్లు
Norton 450 Urbanలో ఫీచర్లకు కూడా ప్రాధాన్యం ఇచ్చారు. ఇందులో డైనమిక్ LED హెడ్‌లైట్లు, ట్రాక్షన్ కంట్రోల్, క్రూయిజ్ కంట్రోల్ ఉన్నాయి. రైడర్ అవసరాలకు అనుగుణంగా ఎంచుకునేందుకు మూడు రైడింగ్ మోడ్‌లు ఇచ్చారు.
కీలెస్ ఇగ్నిషన్, స్మార్ట్ఫోన్ కనెక్టివిటీ, హీటెడ్ గ్రిప్స్, 8-అంగుళాల TFT టచ్‌స్క్రీన్ ఉన్నాయి. ఛార్జింగ్ కోసం USB-C పోర్ట్, టైర్ ప్రెజర్ మానిటరింగ్ సిస్టమ్ (TPMS) కూడా అందించారు.
ఇది కూడా చదవండి: Royal Enfield Himalayan 440: తక్కువ ధరలో అడ్వెంచర్ టూరర్.. కొనేముందు తెలుసుకోవాల్సిన 5 విషయాలు
ధర, లాంచ్ ఎప్పుడంటే?
Norton ఇంకా 450 Urban ధరను ప్రకటించలేదు. లాంచ్ తేదీని కూడా వెల్లడించలేదు. అయితే ఈ బైక్‌ను భారత్‌తో పాటు ఇతర అంతర్జాతీయ మార్కెట్లలో ఒకేసారి లాంచ్ చేసే అవకాశం ఉందని అంచనా. 2027 ద్వితీయార్థంలో ఈ మోడల్ మార్కెట్‌లోకి రావచ్చని భావిస్తున్నారు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
