Mini Cooper S Launched: రోడ్లపై ఇక స్టైలిష్ ప్రయాణం - మినీ కూపర్ ఎస్ కొత్త వేరియంట్ ఎంట్రీ.. అదిరిపోయే స్పోర్టీ లుక్, లగ్జరీ ఫీచర్లు..
మినీ ఇండియా తన కొత్త కూపర్ ఎస్ కన్వర్టిబుల్ జేసీడబ్ల్యూ ప్యాక్ను విడుదల చేసింది. స్పోర్టీ లుక్, ఓపెన్ టాప్ ఫీచర్తో వచ్చిన ఈ కారు ధర స్టాండర్డ్ మోడల్ కంటే రూ. 2.50 లక్షలు ఎక్కువ.
Mini Cooper S Convertible JCW Pack Launched: లగ్జరీ కార్ల తయారీ సంస్థ మినీ ఇండియా (Mini India) దేశీయ మార్కెట్లోకి తన సరికొత్త కూపర్ ఎస్ కన్వర్టిబుల్ జేసీడబ్ల్యూ (John Cooper Works) ప్యాక్ను ప్రవేశపెట్టింది. ప్రత్యేకంగా స్పోర్టీ లుక్ ఇష్టపడే కస్టమర్ల కోసం ఒక లిమిటెడ్ ఎడిషన్ ఆఫర్ లాగా ఈ కారును తీసుకువచ్చింది. సీబీయు (CBU) పద్ధతిలో అంటే విదేశాల నుండి నేరుగా దిగుమతి చేసుకుని ఇక్కడ విక్రయిస్తున్న ఈ కారు ఎక్స్షోరూమ్ ధర రూ. 61.50 లక్షలు. సాధారణ కూపర్ ఎస్ కన్వర్టిబుల్ మోడల్ తో పోలిస్తే దీని ధర రూ. 2.50 లక్షలు అధికం. డ్రైవింగ్ లో మరింత ప్రత్యేకమైన అనుభూతిని కోరుకునే వారికి ఈ మోడల్ ఒక మంచి ఛాయిస్.
డిజైన్ హైలైట్స్..
ఈ జేసీడబ్ల్యూ ప్యాక్ లో మెకానికల్ మార్పుల కంటే కారు లోపల, బయట కనిపించే విజువల్ అప్డేట్స్ కే ఎక్కువ ప్రాధాన్యత ఇచ్చారు. కారు సిగ్నేచర్ సాఫ్ట్-టాప్ రూఫ్ ఫీచర్ ప్రయాణికులకు ఒక విభిన్నమైన అనుభూతిని ఇస్తుంది. కేవలం 18 సెకన్ల వ్యవధిలోనే ఈ రూఫ్ను ఎలక్ట్రికల్ గా ఓపెన్ చేయవచ్చు. గంటకు 30 కిలోమీటర్ల వేగంతో ప్రయాణిస్తున్నప్పుడు కూడా దీన్ని ఆపరేట్ చేసే వెసులుబాటు ఉంది. ఇది పూర్తిగా ఓపెన్ కావడమే కాకుండా, సన్రూఫ్ లాగా పాక్షికంగా కూడా ఓపెన్ అవుతుంది.
జేసీడబ్ల్యూ స్పెషల్ ఫీచర్లు..
ఈ కొత్త వేరియంట్ మిడ్నైట్ బ్లాక్, లెజెండ్ గ్రే అనే రెండు ఎక్స్క్లూజివ్ కలర్ ఆప్షన్లలో లభిస్తోంది. లెజెండ్ గ్రే రంగు కారుపై ప్రత్యేకమైన బోనెట్ స్ట్రైప్స్ ఆకర్షణీయంగా ఉంటాయి. ఫ్రంట్ గ్రిల్, రియర్ వ్యూ మిర్రర్లు (ORVM), డోర్ హ్యాండిల్స్, వీల్ ఆర్చెస్, సైడ్ స్కర్ట్స్ వంటి భాగాలకు గ్లాస్-బ్లాక్ ఫినిషింగ్ ఇచ్చారు. బ్లాక్ కలర్ లో ఉన్న కొత్త 17-ఇంచ్ జేసీడబ్ల్యూ వీల్స్, జేసీడబ్ల్యూ బ్రాండెడ్ స్పోర్ట్ బ్రేక్స్ ఈ కారుకు అగ్రెసివ్ లుక్ ఇస్తున్నాయి. కారు రూఫ్ జెట్ బ్లాక్ ఫ్యాబ్రిక్ తో తయారై ప్రీమియం క్వాలిటీని అందిస్తుంది.
లగ్జరీ ఇంటీరియర్..
కారు లోపలి భాగం స్పోర్టీ థీమ్ తో అద్భుతంగా ఉంటుంది. జేసీడబ్ల్యూ స్పెషల్ స్పోర్ట్ సీట్లు, వెస్సిన్-కార్డ్ అప్హోల్స్టరీతో రూపొందించారు. ప్యాడిల్ షిఫ్టర్లు ఉన్న ప్రత్యేకమైన జేసీడబ్ల్యూ స్టీరింగ్ వీల్ డ్రైవింగ్ ను సులభతరం చేస్తుంది. డ్యాష్బోర్డ్ మధ్యలో బ్రాండ్ గుర్తుగా నిలిచే 9.4-ఇంచ్ సర్క్యులర్ ఓఎల్ఈడీ టచ్స్క్రీన్ ప్రధాన ఆకర్షణగా నిలుస్తుంది. ఇది మినీ ఆపరేటింగ్ సిస్టమ్ 9 తో పనిచేస్తూ ఇన్ఫోటైన్మెంట్, కనెక్టెడ్ కార్ ఫీచర్లను కంట్రోల్ చేస్తుంది.
ఇంజిన్ పర్ఫార్మెన్స్..
మెకానికల్ గా చూస్తే స్టాండర్డ్ మోడల్ లో ఉన్న 2.0-లీటర్ టర్బోచార్జ్డ్ పెట్రోల్ ఇంజన్ నే ఇందులోనూ ఉపయోగించారు. ఇది 204 హెచ్పీ పవర్, 300 ఎన్ఎమ్ టార్క్ను ఉత్పత్తి చేస్తుంది. మినీ కార్ల ప్రత్యేకత అయిన 'గో-కార్ట్' లాంటి డ్రైవింగ్ డైనమిక్స్ ఇందులోనూ కొనసాగుతున్నాయి. ఏప్రిల్ 14 నుండి ఈ మోడల్ బుకింగ్స్ ప్రారంభం కాగా, అథరైజ్డ్ డీలర్ షిప్ ల ద్వారా డెలివరీలు కూడా మొదలయ్యాయి. లిమిటెడ్ ఎడిషన్ కారును ఇష్టపడే వారికి ఇది సరైన సమయంగా విశ్లేషకులు పేర్కొంటున్నారు.
టాప్ హెడ్ లైన్స్
ట్రెండింగ్ వార్తలు
