కార్లలో ADAS, V2X టెక్నాలజీలకు స్ట్రాంగ్ సపోర్ట్ - రోడ్డు భద్రతలో కొత్త అధ్యాయం
సెల్ఫ్ డ్రైవింగ్ టెక్నాలజీలు, ADAS భద్రత వ్యవస్థల వినియోగం విషయంలో భారత్ కీలక నిర్ణయం తీసుకుంది. రాడార్, V2X సిస్టమ్లకు లైసెన్సింగ్ నిబంధనలు తొలగించడం ద్వారా ఆటోమొబైల్ రంగానికి భారీ ఊరటనిచ్చింది.
Self-driving car safety technology: భారత ఆటోమొబైల్ రంగంలో విప్లవాత్మక మార్పులకు దారితీసే కీలక నిర్ణయాన్ని కేంద్ర ప్రభుత్వం తీసుకుంది. సెల్ఫ్ డ్రైవింగ్ టెక్నాలజీలు, ఆధునిక భద్రత వ్యవస్థల వినియోగాన్ని వేగవంతం చేసేలా ఆటోమోటివ్ రాడార్, కనెక్టెడ్ కార్ కమ్యూనికేషన్ సిస్టమ్లకు సంబంధించిన స్పెక్ట్రమ్ లైసెన్సింగ్ నిబంధనలను ప్రభుత్వం తొలగించింది.
ఈ నిర్ణయంతో భవిష్యత్తులో మరింత అధునాతన భద్రత ఫీచర్లు ఉన్న కార్లు భారత మార్కెట్లోకి రావడానికి మార్గం సుగమం కానుంది. అంతేకాకుండా సెల్ఫ్ డ్రైవింగ్ టెక్నాలజీల అభివృద్ధికి కూడా ఇది కీలక మద్దతుగా నిలవనుంది.
కేంద్ర ప్రభుత్వం విడుదల చేసిన నోటిఫికేషన్ ప్రకారం, 77GHz నుంచి 81GHz ఫ్రీక్వెన్సీ బ్యాండ్లో పనిచేసే ఆటోమోటివ్ రాడార్ సిస్టమ్లకు ఇకపై ప్రత్యేక లైసెన్స్ అవసరం ఉండదు. అలాగే 5.9GHz ఫ్రీక్వెన్సీ బ్యాండ్లో పనిచేసే వాహన కమ్యూనికేషన్ వ్యవస్థలకూ లైసెన్సింగ్ నిబంధనలను తొలగించింది.
ఈ నిర్ణయంతో భారత్ అమెరికా, యూరప్ వంటి అభివృద్ధి చెందిన మార్కెట్లలో అమలవుతున్న నిబంధనలకు అనుగుణంగా అడుగులు వేసింది. ఫలితంగా అంతర్జాతీయంగా అభివృద్ధి చేసిన హార్డ్వేర్ను భారత మార్కెట్ కోసం ప్రత్యేకంగా మార్చాల్సిన అవసరం తగ్గి, తయారీ వ్యయాలు కూడా తగ్గే అవకాశం ఉంది.
ADAS టెక్నాలజీకి భారీ ఊతం
ప్రస్తుతం ప్రపంచవ్యాప్తంగా ఆధునిక కార్లలో ఉపయోగిస్తున్న అనేక భద్రత ఫీచర్లకు రాడార్ సెన్సార్లు కీలకంగా పనిచేస్తున్నాయి. అటానమస్ ఎమర్జెన్సీ బ్రేకింగ్, అడాప్టివ్ క్రూయిజ్ కంట్రోల్, బ్లైండ్ స్పాట్ మానిటరింగ్ వంటి ADAS (అడ్వాన్స్డ్ డ్రైవర్ అసిస్టెన్స్ సిస్టమ్స్) ఫీచర్లు రాడార్ ఆధారంగానే పనిచేస్తాయి.
భవిష్యత్తులో పూర్తిస్థాయి సెల్ఫ్ డ్రైవింగ్ వాహనాల అభివృద్ధికి కూడా ఈ రాడార్ టెక్నాలజీ కీలక భాగంగా ఉండనుంది. కేంద్రం తీసుకున్న తాజా నిర్ణయం వల్ల ఈ టెక్నాలజీల వినియోగం మరింత వేగంగా విస్తరించే అవకాశం ఉంది.
V2X టెక్నాలజీ అంటే ఏమిటి?
5.9GHz బ్యాండ్కు ఇచ్చిన మినహాయింపు వల్ల వాహనం నుంచి వాహనానికి, వాహనం నుంచి రోడ్డు మౌలిక వసతులకు సమాచార మార్పిడి చేసే V2X (వెహికల్ టు ఎవ్రీథింగ్) సిస్టమ్ల అభివృద్ధికి ఊతం లభించనుంది.
ఈ టెక్నాలజీ ద్వారా డ్రైవర్కు కనిపించని ప్రమాదాల గురించి ముందుగానే హెచ్చరికలు అందుతాయి. ఉదాహరణకు, మలుపు తర్వాత ఆకస్మికంగా బ్రేక్ వేసిన వాహనం, సమీపిస్తున్న అంబులెన్స్ లేదా ఇతర అత్యవసర వాహనాల గురించి సమాచారం అందించగలదు. దీంతో ప్రమాదాలను గణనీయంగా తగ్గించే అవకాశం ఉంటుంది.
ఏ కంపెనీలకు లాభం?
ఈ నిర్ణయం వల్ల ఇప్పటికే విదేశీ మార్కెట్లలో ADAS టెక్నాలజీతో కార్లు విక్రయిస్తున్న లగ్జరీ బ్రాండ్లైన మెర్సిడెస్ బెంజ్, బీఎండబ్ల్యూ వంటి సంస్థలకు ప్రయోజనం కలగనుంది. అలాగే దేశీయ కంపెనీలైన మారుతి సుజుకి, టాటా మోటార్స్, మహీంద్రా వంటి సంస్థలు కూడా అధునాతన భద్రతా ఫీచర్లను మరింత విస్తృతంగా అందించే అవకాశం ఉంది.
అంతేకాకుండా బోష్, కాంటినెంటల్, క్వాల్కామ్ వంటి టెక్నాలజీ సరఫరాదారులకు కూడా ఈ నిర్ణయం అనుకూలంగా మారనుంది.
రోడ్డు ప్రమాదాలు తగ్గించడమే లక్ష్యం
ప్రభుత్వ గణాంకాల ప్రకారం, 2024లో దేశవ్యాప్తంగా దాదాపు ఐదు లక్షల రోడ్డు ప్రమాదాల్లో 1.77 లక్షల మందికి పైగా ప్రాణాలు కోల్పోయారు. ఈ నేపథ్యంలో ADAS, V2X వంటి ఆధునిక భద్రతా వ్యవస్థలు రోడ్డు భద్రతను మెరుగుపరచడంలో కీలక పాత్ర పోషిస్తాయని ప్రభుత్వం భావిస్తోంది.
ప్రస్తుతం ఈ టెక్నాలజీల వినియోగాన్ని తప్పనిసరి చేయకపోయినా, వాటి అమలుకు ఉన్న ప్రధాన నియంత్రణ అడ్డంకిని తొలగించింది. దీంతో రాబోయే రోజుల్లో భారత మార్కెట్లో మరింత సురక్షితమైన, స్మార్ట్ మరియు భవిష్యత్ తరహా కార్లు అందుబాటులోకి వచ్చే అవకాశం కనిపిస్తోంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
