కొత్త రంగులు, LED ఇండికేటర్లతో బజాజ్ పల్సర్ 220F అప్డేట్ - ధర ₹1.28 లక్షలు
Bajaj Pulsar 220F కొత్త రంగులు, రిఫ్రెష్ గ్రాఫిక్స్, LED ఇండికేటర్లతో అప్డేట్ అయ్యింది. 220cc ఇంజిన్తో యథాతథంగా కొనసాగుతున్న ఈ బైక్ ధర ₹1.28 లక్షలు (ఎక్స్-షోరూమ్).
Bajaj Pulsar 220F Update: బజాజ్ పల్సర్ 220F… ఈ పేరు వినగానే ఒక తరం బైక్ ప్రేమికులకు నోస్టాల్జియా గుర్తొస్తుంది. 2007లో మార్కెట్లోకి వచ్చిన ఈ బైక్ అప్పటి నుంచి ఇప్పటివరకు తనకంటూ ఒక ప్రత్యేక ఫ్యాన్ బేస్ను సంపాదించుకుంది. కాలం మారినా, ట్రెండ్స్ మారినా, పల్సర్ 220F మాత్రం పెద్దగా మార్పులు లేకుండా కొనసాగుతూ వచ్చింది. ఇప్పుడు, ఈ లెజెండరీ బైక్కు బజాజ్ చిన్నది, కానీ కీలకమైన అప్డేట్ను అందించింది.
భారత మార్కెట్లో అప్డేటెడ్ బజాజ్ పల్సర్ 220Fను కంపెనీ అధికారికంగా లాంచ్ చేసింది. దీని ఎక్స్-షోరూమ్ ధర ₹1.28 లక్షలుగా నిర్ణయించారు. ఈ తాజా అప్డేట్లో ప్రధానంగా కొత్త రంగులు, రిఫ్రెష్ చేసిన గ్రాఫిక్స్, LED ఇండికేటర్లు అందించారు.
కొత్త రంగులు, ఫ్రెష్ గ్రాఫిక్స్
అప్డేటెడ్ పల్సర్ 220F (Updated Bajaj Pulsar 220F) ఇప్పుడు రెండు కొత్త కలర్ ఆప్షన్లలో అందుబాటులోకి వచ్చింది. ఒకటి బ్లాక్ బేస్పై సాఫ్ట్ గోల్డ్ యాక్సెంట్స్, మరొకటి బ్లాక్ బేస్తో ఆరెంజ్ కలర్, గ్రీన్ హ్యూస్ కలయిక. ఈ కొత్త కలర్ స్కీమ్స్ బైక్కు మరింత స్పోర్టీ లుక్ను ఇస్తున్నాయి. ఇప్పటికే గుర్తింపు ఉన్న డిజైన్కు కొత్త గ్రాఫిక్స్ జోడించడం వల్ల ఈ బైక్ తాజా మోడల్లా కనిపిస్తోంది.
LED ఇండికేటర్లతో మోడర్న్ టచ్
ఈ అప్డేట్లో మరో ముఖ్యమైన మార్పు LED ఇండికేటర్లు. ఇప్పటివరకు హాలోజన్ ఇండికేటర్లతో వచ్చిన పల్సర్ 220F, ఇప్పుడు LED సెటప్కు మారింది. ఇది బైక్కు కాస్త ఆధునిక టచ్ను తీసుకువచ్చింది. రాత్రి వేళల్లో వీటి విజిబిలిటీ కూడా మెరుగ్గా ఉండనుంది.
టైర్లు, ఇన్స్ట్రుమెంట్ క్లస్టర్
కొన్ని యూనిట్లలో యూరోగ్రిప్ ATT 1150 టైర్లు కనిపిస్తున్నాయి. అయితే, కొన్ని బైక్లు ఇంకా MRF టైర్లతోనే డీలర్షిప్లకు వస్తున్నట్టు సమాచారం. అంటే, టైర్ ఫిట్మెంట్ స్టాక్ లభ్యతను బట్టి మారే అవకాశం ఉంది.
ఇన్స్ట్రుమెంట్ క్లస్టర్ విషయానికి వస్తే, ఫ్రెష్ పల్సర్ 220F, ఇప్పుడున్నట్లే బ్లూటూత్ కనెక్టివిటీ ఉన్న LCD డాష్ను కొనసాగిస్తుంది. ఇది ప్రస్తుతం అమ్మకంలో ఉన్న ఇతర పల్సర్ మోడల్స్ లాగే ఉంటుంది. అయితే, ఇందులో ఇంకా గేర్ పొజిషన్ ఇండికేటర్ లేకపోవడం కొంతమందికి నిరాశ కలిగించవచ్చు.
ఇంజిన్లో ఎలాంటి మార్పులూ లేవు
మెకానికల్ అంశాల్లో మాత్రం ఎలాంటి మార్పులు చేయలేదు. పల్సర్ 220Fలో ఉన్న అదే 220cc ఎయిర్/ఆయిల్ కూల్డ్ ఇంజిన్ కొనసాగుతోంది. ఇది 20.4 hp శక్తి, 18.5 Nm టార్క్ను ఉత్పత్తి చేస్తుంది. దీనికి 5-స్పీడ్ గేర్బాక్స్ జత చేశారు. పనితీరు, రైడింగ్ ఫీల్ విషయంలో ఎలాంటి మార్పులు లేవు.
ఇప్పటికీ అమ్మకాలలో టాప్ ప్లేస్లోనే
డిజైన్, టెక్నాలజీ పరంగా చాలా కొత్త బైక్లు వచ్చినప్పటికీ, పల్సర్ 220F ఇప్పటికీ బజాజ్ బ్రాండ్లో అత్యధికంగా అమ్ముడయ్యే మోడల్స్లో ఒకటిగా నిలుస్తోంది. ఈ తాజా అప్డేట్ ద్వారా, ఈ బైక్ లైఫ్సైకిల్ మరికొంతకాలం పెరిగింది.
అప్డేటెడ్ పల్సర్ 220F ఇప్పుడు అధికారికంగా అమ్మకాల్లోకి వచ్చింది. ఆసక్తి ఉన్నవాళ్లు తమ సమీప బజాజ్ డీలర్షిప్ను సంప్రదించి వివరాలు తెలుసుకోవచ్చు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
