2026 Bajaj Pulsar 125 రివ్యూ: కేవలం కమ్యూటర్ బైక్ కాదు.. కొత్త ఇంజిన్, కొత్త ఫ్రేమ్, కొత్త టెక్నాలజీ!
2026 బజాజ్ పల్సర్ 125లో భారీ మార్పులు వచ్చాయి. కొత్త ఇంజిన్, ఫ్రేమ్, మోనోషాక్, ఫీచర్లతో వచ్చిన ఈ బైక్ పనితీరు, ధర, సౌకర్యం ఎలా ఉన్నాయో తెలుసుకోండి.
2026 Bajaj Pulsar 125 Price, Mileage And Features Telugu: బజాజ్ పల్సర్ 125 అనే పేరే టూవీలర్‌ మార్కెట్‌లో ప్రత్యేకమైనది. తక్కువ ఖర్చుతో పల్సర్ కొనాలనుకునేవాళ్లకు ఇది అందుబాటులో ఉన్న మోడల్. ఇటీవల, 2026 పల్సర్ 125 కూడా లాంచ్‌ అయింది. ఇది, కొత్త రూపంతో మాత్రమే కాకుండా భారీ మార్పులతోనూ వచ్చింది. మామూలుగా చూస్తే పాత పల్సర్‌లానే కనిపిస్తుంది, కానీ లోపల మాత్రం పూర్తిగా కొత్త బైక్ అని చెప్పొచ్చు.
కొత్త పల్సర్ 125లో పాత డబుల్ క్రేడిల్ ఫ్రేమ్ స్థానంలో తేలికైన డైమండ్ ఫ్రేమ్ వచ్చింది. రెండు షాక్ అబ్జార్బర్ల స్థానంలో మోనోషాక్ ఇచ్చారు. ఇంజిన్ కూడా కొత్తదే. 124.6cc సామర్థ్యం ఉన్న సింగిల్ సిలిండర్ ఇంజిన్ 12.1hp శక్తిని, 11.4Nm టార్క్‌ను అందిస్తుంది. ఐదు స్పీడ్ గేర్‌బాక్స్ ఉంటుంది. కొత్త మార్పులతో బైక్ బరువు కూడా తగ్గింది. ట్యాంక్‌లో ఇంధనం పూర్తిగా నింపితే బైక్ బరువు 131 కిలోలుగా ఉంది.
డిజైన్
బయటి డిజైన్ విషయంలో బజాజ్ పెద్దగా ప్రయోగాలు చేయలేదు. పల్సర్‌కు గుర్తింపు తెచ్చిన వూల్ఫ్ ఐ హెడ్‌లైట్, బలమైన ఇంధన ట్యాంక్, షార్ప్ ట్యాంక్ ఎక్స్‌టెన్షన్లు, వెనుక వైపు షార్ప్ డిజైన్ కొనసాగాయి. అందుకే కొత్త బైక్‌ను చూసిన వెంటనే ఇది పల్సర్ అని గుర్తుపట్టేయొచ్చు.
సీటింగ్ కూడా కమ్యూటర్ బైక్‌కు తగ్గట్టుగానే ఉంది. రైడింగ్ పొజిషన్ నిటారుగా ఉంటుంది. ఫుట్‌పెగ్‌లు కొద్దిగా వెనక్కి ఉండటంతో స్పోర్టీ టచ్ కనిపిస్తుంది. సీటు ఎత్తు 795 మిల్లీమీటర్లు. అందువల్ల తక్కువ ఎత్తు ఉన్న రైడర్లకు కూడా బైక్‌ను నడపడం సులభంగా ఉంటుంది. సింగిల్ పీస్ సీటు, స్ప్లిట్ సీటు వేరియంట్లను బట్టి అందుబాటులో ఉన్నాయి.
నగర ట్రాఫిక్‌లో పల్సర్ 125 మంచి సౌకర్యాన్ని అందిస్తుంది. ఇంజిన్ స్మూత్‌గా ఉంటుంది. తక్కువ, మధ్యస్థ వేగాల్లో టార్క్ బాగుంటుంది. క్లచ్ చాలా తేలికగా ఉండటంతో ట్రాఫిక్‌లో పదేపదే గేర్ మార్చాల్సి వచ్చినా ఇబ్బంది తక్కువ. హైవేపై కూడా బైక్ సౌకర్యంగా ప్రయాణిస్తుంది. గంటకు 80 నుంచి 85 కిలోమీటర్ల వేగం వరకు సౌకర్యవంతంగా క్రూజ్ చేయవచ్చు.
ఇది కూడా చదవండి: టైర్‌ మార్పు నుంచి టోయింగ్‌ వరకు, నిల్‌ పెట్రోల్‌ నుంచి ఇంజిన్ డౌన్‌ వరకు.. మీ ఆపదలో ఆదుకునే సర్వీస్‌ ఇది!
రైడ్ & హ్యాండ్లింగ్‌లో కూడా బైక్ నమ్మకంగా అనిపిస్తుంది. మలుపుల్లోనూ, నేరుగా వెళ్లేటప్పుడూ స్థిరంగా ఉంటుంది. అయితే వెనుక మోనోషాక్ కొద్దిగా స్ప్రింగీగా అనిపిస్తుంది. పెద్ద గుంతలు, గట్టి రోడ్డు దెబ్బల వద్ద రైడర్‌కు కుదుపులు ఎక్కువగా అనిపించవచ్చు. గేర్ మార్పులు కూడా కొద్దిగా రబ్బరీగా అనిపిస్తాయి.
ఫీచర్లు
ఫీచర్ల విషయంలో మాత్రం టాప్ వేరియంట్లు ఆకట్టుకుంటాయి. USB-C ఛార్జింగ్ పోర్ట్, 4 రైడింగ్ మోడ్‌లు, బ్లూటూత్ కనెక్టివిటీ, రంగుల టీఎఫ్‌టీ డిస్‌ప్లే వంటి ఫీచర్లు ఉన్నాయి. కొన్ని ఫీచర్లు దశలవారీగా అందుబాటులోకి రానున్నాయి.
తెలుగు రాష్ట్రాల్లో ధర
2026 బజాజ్ పల్సర్ 125 ధర రూ.93,893 నుంచి ప్రారంభమై రూ.1,04,867 (ఎక్స్‌షోరూమ్) వరకు ఉంటుంది. ధరల ప్రకారం చూస్తే పోటీకి తగ్గట్టుగానే ఉంది. కొన్ని చిన్న లోపాలు ఉన్నప్పటికీ, పాత పల్సర్ 125తో పోలిస్తే కొత్త మోడల్‌లో వచ్చిన అంతర్గత మార్పులు చాలా పెద్దవి. ధరకు తగ్గ విలువ, సౌకర్యం, పనితీరు కోరుకునే వారికి కొత్త పల్సర్ 125 మంచి కమ్యూటర్ బైక్‌గా నిలుస్తుంది.
ఇది కూడా చదవండి: మీ వాహనానికి PUC ఉందా? లేదంటే రూ.10,000 వరకు ఫైన్.. ఇలా తప్పించుకోండి!
ఇంకా ఇలాంటి ఆటోమొబైల్‌ వార్తలు & అప్డేట్స్ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
