Ather Konarc S 125 Features : ధర నుంచి పవర్‌, రేంజ్ వరకు.. ఏథర్ కోణార్క్‌ ఎస్ 125కి పోటీగా నిలిచే స్కూటర్లు ఏవి?
ఏథర్ కోణార్క్‌ ఎస్ 125 ఎలక్ట్రిక్ స్కూటర్ ధర, రేంజ్, బ్యాటరీ, మోటార్, ఫీచర్లు & టీవీఎస్, చేతక్, విడా మోడళ్లతో పూర్తి పోలిక.
Ather Konarc S 125 Price, Range And Features Telugu: ఏథర్ ఎలక్ట్రిక్ స్కూటర్ కంపెనీ ఇటీవలే లాంచ్‌ చేసిన కొత్త మోడల్.. కోణార్క్‌ ఎస్ 125 (Ather Konarc S 125). కొత్త EL ప్లాట్‌ఫామ్‌పై రూపొందిన ఈ స్కూటర్‌లో వివిధ వేరియంట్లు ఉన్నాయి. అందులో.. కోణార్క్‌ ఎస్ 125 అనేది ఎంట్రీ లెవల్ మోడల్. ఈ బండి ధర రూ.1.22 లక్షలు (ఎక్స్ షోరూమ్). ఈ ధరలో.. దీని ప్రధాన ప్రత్యర్థులుగా TVS iQube 3.1 kWh (రూ. 1.29 లక్షలు), Bajaj Chetak C3001 (రూ. 1.14 లక్షలు) & Vida VX2 Go 3.1 (రూ. 1.12 లక్షలు) నిలుస్తున్నాయి.
రేంజ్
కోణార్క్‌ ఎస్ 125 కి 125 కిలోమీటర్ల IDC రేంజ్ ఉంది. ఇందులో 2.7 kWh బ్యాటరీ ప్యాక్ ఉంటుంది. గరిష్ఠ వేగం గంటకు 70 కిలోమీటర్లు. మోటార్ గరిష్ఠ శక్తి 4 kW. టార్క్ 16 Nmగా ఉంది.
రేంజ్ పోలికలో బజాజ్ చేతక్ C3001 అత్యధిక రేంజ్ అందిస్తోంది. దీని IDC రేంజ్ 131 కిలోమీటర్లు. ఇందులో 3 kWh బ్యాటరీ ఉంటుంది. గరిష్ఠ వేగం గంటకు 80 కిలోమీటర్లు. 0 నుంచి 80 శాతం ఛార్జ్ కావడానికి 2 గంటల 55 నిమిషాలు పడుతుంది. ఈ విభాగంలో ఇది వేగవంతమైన ఛార్జింగ్‌ను అందిస్తోంది.
టీవీఎస్ ఐక్యూబ్ 3.1 kWh కి 123 కిలోమీటర్ల IDC రేంజ్ ఉంది. దీని మోటార్ 4.4 kW శక్తిని ఇస్తుంది. 33 Nm టార్క్ ఉత్పత్తి చేస్తుంది. ఈ పోలికలో అత్యధిక టార్క్ ఉన్న మోడల్ ఇదే. దీని గరిష్ఠ వేగం గంటకు 82 కిలోమీటర్లు.
విడా VX2 Go 3.1 మాత్రం 6 kW మోటార్‌తో అత్యధిక పవర్‌ అందిస్తోంది. దీని IDC రేంజ్ 127 కిలోమీటర్లు. గరిష్ఠ వేగం గంటకు 70 కిలోమీటర్లు. 3.1 kWh బ్యాటరీ ప్యాక్ ఉంటుంది.
ఇది కూడా చదవండి: Royal Enfield Bullet 350 ఆన్-రోడ్ ధర ఎంత? రూ.10000 చెల్లిస్తే నెలవారీ EMI ఎంత కట్టాలి
పరిమాణాలు
కోణార్క్‌ వీల్‌బేస్ 1,352 మిల్లీమీటర్లు. సీటు ఎత్తు 770 మిల్లీమీటర్లు. బరువు 126.5 కిలోలు. చేతక్ C3001 వీల్‌బేస్ 1,355 మిల్లీమీటర్లతో ఈ జాబితాలో ముందుంది. దీని బరువు 125 కిలోలు.
టీవీఎస్ ఐక్యూబ్ మాత్రం తేలికైన మోడల్. దీని బరువు 116.8 కిలోలు. సీటు ఎత్తు కూడా 770 మిల్లీమీటర్లే. విడా VX2 Go బరువు 118 కిలోలు. సీటు ఎత్తు 777 మిల్లీమీటర్లు.
ఫీచర్లు
ఫీచర్ల విషయంలో ఏథర్ ప్రత్యేకంగా కనిపిస్తుంది. కోణార్క్‌‌లో 7 అంగుళాల LCD ఇన్‌స్ట్రుమెంట్ క్లస్టర్ ఉంది. AirWalk ఫీచర్ కూడా అందుబాటులో ఉంది. స్కూటర్‌ను చేతితో కదిలించినా సులభంగా కదులుతుంది. అయితే.. ఏథర్‌లోని అధునాతన ఫీచర్ల కోసం StackPro ప్యాక్ అవసరం, ఈ ప్యాక్ ధర రూ.16,000. ఇందులో TrueRange, AutoHold & Vehicle FallSafe వంటి ఫీచర్లు ఉన్నాయి. సాఫ్ట్‌వేర్ అప్‌డేట్లు & కొత్త ఫీచర్లను కూడా ఏథర్ అందించనుంది.
చేతక్ టెక్‌ప్యాక్ ధర రూ.3,000. ఇది జీవితకాల సబ్‌స్క్రిప్షన్‌గా ఉంటుంది. విడా ఏడాదికి రూ.999, టీవీఎస్ ఏడాదికి రూ.900 వసూలు చేస్తున్నాయి.
ధరలో విడా VX2 Go 3.1 అత్యంత చౌక. దీని ధర రూ.1.12 లక్షలు. చేతక్ C3001 ధర రూ.1.14 లక్షలు. కోణార్క్‌ ఎస్ 125 ధర రూ.1.22 లక్షలు. టీవీఎస్ ఐక్యూబ్ ధర రూ.1.29 లక్షలు.
ఇది కూడా చదవండి: కొత్త Bajaj Pulsar 125లో 4 వేరియంట్లు - ఏ వేరియంట్‌లో ఎలాంటి ఫీచర్లు ఉన్నాయి?
మొత్తంగా చూస్తే.. రేంజ్‌కు ప్రాధాన్యం ఇచ్చేవారికి చేతక్ ఆకర్షణీయంగా కనిపిస్తుంది. ఎక్కువ మోటార్ శక్తి కావాలంటే విడా ముందుంటుంది. ఎక్కువ టార్క్ కావాలంటే ఐక్యూబ్ మెరుగైన ఎంపిక. ఫీచర్లు & ఆధునిక టెక్నాలజీ కోరుకునేవారికి కోణార్క్‌ ఎస్ 125 ఒక ఆప్షన్‌ అవుతుంది. తుది నిర్ణయం తీసుకునే ముందు, ధరతో పాటు వాస్తవ రైడింగ్ అనుభవం, సౌకర్యం & నిర్వహణ ఖర్చులను కూడా పరిగణనలోకి తీసుకోవడం మంచిది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
