Apple Talks with Toyota: 'డ్రీమ్ కార్' కోసం టయోటాతో యాపిల్ చర్చలు

యాపిల్ సంస్థ టయోటాతో చర్చలు జరుపుతోంది. 2024 కల్లా యాపిల్ కారు మార్కెట్ లోకి తేవడమే లక్ష్యంగా ఈ చర్యలు జరపినట్లు సమాచారం. సరికొత్త ఫీచర్లు, టెక్నాలజీతో ఈ కారు రూపలకల్పన కానుంది.

డ్రీమ్ కార్ కోసం టయోటాతో యాపిల్ చర్చలు

దిగ్గజ సంస్థ యాపిల్.. తన కలల ప్రాజెక్ట్ కోసం తీవ్రంగా శ్రమిస్తోంది. 2024 కల్లా యాపిల్ కారు ను మార్కెట్ లోకి తేవాలని కృషి చేస్తోంది. అయితే తాజాగా ఈ ప్రాజెక్ట్ పై ఆసక్తికర విషయం తెలిసింది. తన కారు ప్రాజెక్ట్ కోసం యాపిల్.. టయోటా ఎగ్జిక్యూటివ్స్ తో వరుస భేటీలు నిర్వహిస్తోంది. 

దక్షిణ కొరియాకు చెందిన ఎస్ కే గ్రూప్, ఎల్ జీ ఎలక్ట్రానిక్స్ తో కూడా యాపిల్ ప్రతినిధులు గత నెలలో సమావేశమైనట్లు డిజీటైమ్స్ పేర్కొంది. ప్రస్తుతం టయోటాతో చర్చలు నడుపుతోంది.

2014లోనే..

నిజానికి యాపిల్ సంస్థ 2014లో సొంతంగా సెల్ఫ్ డ్రైవింగ్ ఎలక్ట్రిక్ కార్ల తయారీపై దృష్టి సారించింది. అప్పటి నుంచి దీని కోసం ప్రణాళికలు రచిస్తోంది. ఈ కార్ల కోసం యాపిల్ తన సొంత కటింగ్ ఎడ్జ్ బ్యాటరీ టెక్నాలజీని అభివృద్ధి చేస్తోంది. ఈ ప్రాజెక్ట్కు 'టైటాన్' అనే పేరు కూడా పెట్టింది.

కొత్త టెక్నాలజీతో..

యాపిల్ తయారు చేస్తోన్న ఈ బ్యాటరీలు మరింత పొదుపుగా ఉండటమే కాకుండా, వాహనం ఎక్కువ దూరం ప్రయాణించడానికి అనుకూలంగా ఉంటుందని అంటున్నారు. మార్కెట్లో ప్రస్తుతం ఉన్న ఎలక్ట్రిక్ కార్లు ఎక్కువగా లిథియం- అయాన్ బ్యాటరీల ద్వారానే పనిచేస్తున్నాయి. అయితే, వాటికి ప్రత్యామ్నాయంగా లిథియం- ఐరన్ ఫాస్ఫేట్ బ్యాటరీలతో కార్లను రూపకల్పన చేయాలనే ఆలోచనతో కంపెనీ పనిచేస్తుంది.

ప్రస్తుతం మారుతున్న వినియోగదారుల అవసరాలకు అనుగుణంగా నూతన టెక్నాలజీతో సెల్ఫ్ డ్రైవింగ్ కార్లను ఉత్పత్తి చేయాలని ఆపిల్ లక్ష్యంగా పెట్టుకుంది. దీనిలో భాగంగా 2024లో ప్యాసింజర్ ఎలక్ట్రిక్ కారును ప్రవేశపెట్టాలని లక్ష్యంగా పెట్టుకుంది.