Tirumala: తిరుమల ఘాట్‌ రోడ్లలో కొండ చరియలను పరిశీలించిన కేరళ నిపుణుల బృందం

ఇటీవల వర్షాలకు తిరుమల ఘాట్ రోడ్లలో కొండ చరియలు విరిగిపడ్డాయి. ఈ ఘాట్ రోడ్లు, కొండ చరియలను కేరళ నిపుణుల బృందం ఇవాళ పరిశీలించింది. దీనిపై టీటీడీకి నివేదిక ఇవ్వనుంది ఈ బృందం

ఘాట్ రోడ్లను పరిశీలిస్తోన్న నిపుణులు

ఇటీవల వర్షాలకు తిరుమల ఘాట్‌ రోడ్డులో విరిగిప‌డిన కొండ చరియలను కేరళ నిపుణుల బృందం ఆదివారం పరిశీలించింది. కేరళ కొల్లంలోని అమృత  విశ్వవిద్యాల‌యం వరల్డ్ సెంటర్ ఆఫ్ ఎక్సలెన్స్ ఆన్ ల్యాండ్‌స్లైడ్ డిజాస్టర్ రిడక్షన్ కింద అంత‌ర్జాతీయ ప్రాజెక్ట్ చేస్తున్న నిపుణుల బృందం కొండ చరియలను పరిశీలించింది. కొండచరియలు విరిగిపడకుండా ముందస్తుగా తీసుకోవాల్సిన జాగ్రత్తలు,  సూచనల కోసం వీరిని  టీటీడీ ఆహ్వానించింది. ల్యాండ్‌ స్లైడ్స్ నిపుణులు కొండ‌చ‌రియ‌లు విరిగిన ప్రాంతంలో పున‌రుద్ధర‌ణ ప‌నులు, భ‌విష్యత్తులో ఇలాంటివి జ‌ర‌గ‌కుండా అత్యాధునిక శాస్త్రా ప‌రిజ్ఞానం ఉప‌యోగించుకొని స‌మ‌గ్ర స‌ర్వే నిర్వహించి టీటీడీకి నివేదిక అందించనున్నారు.  

ఇప్పటికే ఢిల్లీ నిపుణుల బృందం పరిశీలన

భారీ వర్షాల కారణంగా తిరుమలకు వెళ్లే ఘాట్ రోడ్డులో కొండచరియలు విరిగిపడిన విషయం తెలిసిందే. ఇటీవల కురిసిన భారీ వర్షాలతో తిరుమలలో మరోసారి కొండ చరియలు విరిగిపడ్డాయి. రెండో ఘాట్ రోడ్డులో కొండచరియలు విరిగి పడటంతో మొదటి ఘాట్ రోడ్డులోనే భక్తులను టీటీడీ అనుమతించింది. ఘాట్ రోడ్డుపై రాకపోకలు.. నిలిపేసిన టీటీడీ.. మరమ్మతుల చర్యలు చేపట్టింది. ఇందులో భాగంగానే.. ఇటీవల ఢిల్లీ ఐఐటీ నిపుణులు ఘాట్ రోడ్డును పరిశీలించారు. టీటీడీ ఇంజినీరింగ్ విభాగం అధికారులు ఐఐటీ బృందానికి ఘాట్ రోడ్డు పరిస్థితిని వివరించారు. ఘాట్ రోడ్డుతో పాటుగా పక్కనే ఉన్న కొండ పరిస్థితి వివరించారు.  దాదాపు వెయ్యి ఏళ్ల కిందట ఏర్పడిన పర్వతాలు కావడంతో పరిస్థితిని కూలంకషంగా అధ్యయనం చేయాలని బృందం అనుకుంది. 

ఇటీవల వర్షాలకు ఘాట్ రోడ్లపై విరిగిపడిన కొండ చరియలు

ప్రస్తుతం జరిగిన ఘటన ప్రమాదకరమైందని టీటీడీ ఇంజినీరింగ్ అధికారి రామచంద్రారెడ్డి అన్నారు. టీటీడీ ఉన్నతాధికారులకు పరిస్థితిని తెలియజేసి సమస్యను శాశ్వతంగా పరిష్కరించే విధంగా చర్యలు.. చేపడతామని చెప్పారు. గతంలో ఎప్పుడూ లేని విధంగా తిరుమలలో ఇటీవల భారీ వర్షాలు కురిశాయి. వరదల కారణంగా తిరుమల శ్రీవారి మెట్ల మార్గం చాలా వరకు ధ్వంసమైంది.  కొండ చరియలు ఎక్కువగా విరిగి పడిన రోజున.. ఘాట్ రోడ్డులో‌ నిలిచి పోయిన వాహనాలను లింక్ రోడ్డు గుండా తిరుమలకు అనుమతించారు. మొదటి ఘాట్ రోడ్డు నుండే తిరుమలకు వాహనాలను అనుమతించారు. అయితే తిరుపతి నుండి తిరుమలకు వెళ్లే వాహనాలు ఒక గంట, తిరుమల నుండి తిరుపతికి వచ్చే వాహనాలకు మరో గంట పాటు అనుమతిస్తూ ఒకే ఘాట్ రోడ్డులో వాహనాలను అధికారులు అనుమతించారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి