Andhra Pradesh Rains: ఏపీలోకి నైరుతి రుతుపవనాలు ఎంట్రీ.. ఇక వర్షాలకు వేళాయే.. ఎండల నుంచి ఉపశమనం

Southwest Monsoon Enters Andhra Pradesh | నైరుతి రుతుపవనాలు ఆంధ్రప్రదేశ్‌లోకి ప్రవేశించాయి. జూన్ 6న (శనివారం) రాయలసీమలోకి రుతుపవనాలు ప్రవేశించాయని భారత వాతావరణ శాఖ తెలిపింది.

ఏపీలోకి నైరుతి రుతుపవనాలు ఎంట్రీ..

Source : AI

Show Quick Read

Key points generated by AI, verified by newsroom

• నైరుతి రుతుపవనాలు జూన్ 6న ఆంధ్రప్రదేశ్‌లోకి ప్రవేశించాయి.
• ఈనెల 10 నాటికి సగానికి పైగా రాష్ట్రానికి విస్తరిస్తాయని అంచనా.
• రుతుపవనాలు వచ్చినా వేడి, వడగాల్పులు తగ్గవని వాతావరణశాఖ హెచ్చరించింది.
• శ్రీకాకుళానికి రెడ్ అలర్ట్; కొన్నిచోట్ల ఈదురుగాలులు, వర్షాలు.

Rains In Andhra Pradesh | అమరావతి: తీవ్రమైన ఎండ వేడిమి, ఉక్కపోతతో అల్లాడుతున్న ఆంధ్రప్రదేశ్ ప్రజలకు భారత వాతావరణశాఖ (IMD) చల్లటి కబురు చెప్పింది. శనివారం (జూన్6న) నాడు రాష్ట్రంలోకి నైరుతి రుతుపవనాలు ప్రవేశించాయని వాతావరణ శాఖ అధికారులు వెల్లడించారు. అనంతపురం, శ్రీ సత్యసాయి, చిత్తూరు జిల్లాల ద్వారా నైరుతి రుతుపవనాలు ఏపీని తాకాయి. ఈ నెల 10వ తేదీ నాటికి రాష్ట్రంలోని సగానికి పైగా భూభాగానికి నైరుతి రుతుపవనాలు విస్తరించే అవకాశముందని వాతావరణశాఖ అంచనా వేసింది. దీని ప్రభావంతో వచ్చే రెండు రోజుల్లో రాష్ట్రవ్యాప్తంగా తొలకరి జల్లులు పడే అవకాశం ఉందని విశాఖ వాతావరణ కేంద్రం అధికారులు తెలిపారు.

సాధారణంగా జూన్ ఒకటో తేదీ నాటికే కేరళను తాకాల్సిన నైరుతి రుతుపవనాలు, ఈసారి 3 రోజులు ఆలస్యంగా అక్కడ ప్రవేశించాయి. జూన్ నుండి సెప్టెంబరు వరకు సాగే ఈ రుతుపవనాల సీజన్‌లో దేశంలో 80 శాతానికి పైగా సాధారణ వర్షపాతం నమోదయ్యే అవకాశం ఉందని ఐఎండీ పేర్కొంది. అయితే నైరుతి రుతుపవనాలు ప్రవేశించినప్పటికీ, ఉక్కపోత, వేడి వాతావరణం వెంటనే తగ్గవని అధికారులు తెలిపారు. ముఖ్యంగా దక్షిణ కోస్తాంధ్రాలో వేడిగాలుల ప్రభావం మరికొద్ది రోజుల పాటు కొనసాగే అవకాశం ఉందని వాతావరణ కేంద్రం అక్కడి ప్రజలను హెచ్చరించింది.

ఐఎండి ప్రకారం శనివారం(జూన్ 6) నైరుతి రుతుపవనాలు ఆంధ్రప్రదేశ్ లోని రాయలసీమ ప్రాంతాలు తాకినట్లు విపత్తుల నిర్వహణ సంస్థ తెలిపింది.రాష్ట్రం అంతటా విస్తరించడానికి వాతావరణ పరిస్థితులు అనుకూలంగా ఉన్నట్లు పేర్కొంది. గత సంవత్సరం మే26న రుతుపవనాలు ఆంధ్రప్రదేశ్లోకి ప్రవేశించాయి.#SWMonsoon pic.twitter.com/11rGglF2vb

— Andhra Pradesh State Disaster Management Authority (@APSDMA) June 6, 2026

ఏపీలో విభిన్న వాతావరణం, వడగాల్పులు, వర్షాల హెచ్చరిక
ఆంధ్రప్రదేశ్‌లో 2 రోజుల పాటు విభిన్న వాతావరణ పరిస్థితులు నెలకొననున్నాయని రాష్ట్ర విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు. ఒకవైపు కొన్ని ప్రాంతాల్లో తీవ్రమైన ఎండలు, వడగాల్పులు వీస్తుండగా.. మరికొన్ని ప్రాంతాల్లో ఉరుములు, మెరుపులతో కూడిన వర్షాలు పడే అవకాశం ఉందని ఆయన పేర్కొన్నారు. ఈ క్రమంలో ముఖ్యంగా శ్రీకాకుళం జిల్లాకు వాతావరణ శాఖ రెడ్ అలెర్ట్ జారీ చేసింది.

శ్రీకాకుళం జిల్లాలోని కొత్తూరు, హిరమండలం, పాతపట్నం, వాటి పరిసర ప్రాంతాలలో గంటకు 60 కిలోమీటర్లు లేదా అంతకంటే ఎక్కువ వేగంతో బలమైన ఈదురుగాలులు వీచే ప్రమాదం ఉందని అధికారులు హెచ్చరించారు. వీటితో పాటు మెరుపులు, పిడుగులతో కూడిన మోస్తరు వర్షం కురిసే అవకాశం ఉన్నందున ప్రజలంతా అత్యంత అప్రమత్తంగా ఉండాలని సూచించారు. ఆకాశం మేఘావృతమై ఉరుములు వినిపించగానే చెట్ల కింద ఉండకుండా, వెంటనే సురక్షితమైన పక్కా భవనాల్లోకి వెళ్లాలని విపత్తుల నిర్వహణ సంస్థ స్పష్టం చేసింది.

మరోవైపు రాష్ట్రంలోని పోలవరం, తూర్పు గోదావరి, ఏలూరు, గుంటూరు, పల్నాడు, మార్కాపురం, కృష్ణా, ఎన్టీఆర్, కర్నూలు, నంద్యాల జిల్లాల్లో అక్కడక్కడ తేలికపాటి నుండి మోస్తరు వర్షాలు కురిసే అవకాశం ఉంది. అలాగే మిగిలిన జిల్లాల్లో కూడా కొన్ని చోట్ల తేలికపాటి జల్లులు పడవచ్చు. అయితే, వర్ష సూచన ఉన్నప్పటికీ ఎండల తీవ్రత తగ్గలేదు. ఈరోజు రాష్ట్రవ్యాప్తంగా 56 మండలాల్లో తీవ్ర వడగాల్పులు, 50 మండలాల్లో సాధారణ వడగాల్పులు వీచాయని, ఎండ తీవ్రత దృష్ట్యా ప్రజలు తగిన జాగ్రత్తలు తీసుకోవాలని అధికారులు వెల్లడించారు.

మరిన్ని చదవండి

జనసేన రాజ్యసభ అభ్యర్థిగా లింగమనేని రమేష్ - అధికారిక ప్రకటన

అన్నామలై కోసం బీజేపీ మరింతగా వర్క్ చేయాల్సింది! తెలంగాణలో ఓట్ల చీల్చే రాజకీయం చేయను! పవన్ సంచలన వ్యాఖ్యలు