NELLORE CRIME: నెల్లూరు జిల్లాలో న్యూడ్ వీడియో కాల్స్ కలకలం..

నెల్లూరు జిల్లాలో న్యూడ్ వీడియో కాల్స్ కలకలం రేగింది. వాట్సప్ కి కాల్ చేసి మహిళల నగ్నవీడియోలు ప్రదర్శించి వాటిని రికార్డ్ చేసి బ్లాక్ మెయిల్ చేస్తున్నారు. బాధితులు బయటకి చెప్పుకోలేక సతమతమవుతున్నారు.

న్యూడ్ వీడియో కాల్ (ప్రతీకాత్మక చిత్రం)

కొన్నిరోజుల క్రితం నెల్లూరు నగరానికి చెందిన ఓ ఆయుర్వేద వైద్యుడికి రాత్రి సమయంలో వాట్సప్ లో అన్ నోన్ నెంబర్ నుంచి వీడియో కాల్ వచ్చింది. తెలియని నెంబర్ అయినా ఆయన దాన్ని రిసీవ్ చేసుకున్నారు. తీరా కాల్ కనెక్ట్ అయిన వెంటనే అవతలినుంచి ఓ మహిళ ఒక్కొక్కటిగా తన దుస్తుల్ని తీసేసింది, నగ్నంగా మారిపోయింది. అసలేం జరిగిందో, ఏం జరిగిందో అర్థం కాక ఆ ఆయుర్వేద డాక్టర్ కాల్ కట్ చేశారు. ఆ తర్వాత వెంటనే వాయిస్ కాల్ వచ్చింది. మీరు ఫలానా మహిళ నగ్నంగా ఉండగా వీడియో కాల్ మాట్లాడారు అంటూ వాటి రికార్డింగ్ లు పంపించారు. సదరు మహిళ నగ్నంగా ఉన్న వీడియో.. అవతల కాల్ మాట్లాడుతున్నట్టు డాక్టర్ వీడియో ఈ రెండూ అందులో ఉన్నాయి. అంతే కాదు.. అడిగినంత డబ్బు ఇవ్వకపోతే మీ కాంటాక్ట్ లిస్ట్ లో ఉన్నవారందరికీ ఈ వీడియో వెళ్తుంది అని బెదిరించారు. అయితే ఇక్కడ డాక్టర్ బెదిరిపోలేదు, నీ ఇష్టం వచ్చినట్టు చేసుకోపో అంటూ ఫోన్ కట్ చేశారు.. 

నెల్లూరుకి సంబంధించి మరో విలేకరి స్నేహితుడికి కూడా ఇలాంటి అనుభవమే ఎదురైందట. రాత్రిపూట తెలియని నెంబర్లనుంచి వీడియో కాల్ రాగానే ఆన్సర్ చేసిన ఆ వ్యక్తి అవతల నగ్నంగా కనిపిస్తున్న మహిళను చూసి షాక్ అయ్యాడు. వెంటనే కాల్ కట్ చేశాడు. ఆ వెంటనే బెదిరింపు కాల్ కూడా వచ్చింది. అయితే అతను కూడా భయపడకుండా.. వారిని రివర్స్ లో బెదిరించే సరికి వ్యవహారం అక్కడితో ఆగింది. 

ఇటీవల కాలంలో నెల్లూరు జిల్లాలోనే కాదు.. చాలా చోట్ల ఇలాంటి ఆన్ లైన్ వేధింపులు మొదలయ్యాయని తెలుస్తోంది. చాలా వరకు బాధితులు గుట్టుచప్పుడు కాకుండా డబ్బులు సమర్పించుకుంటూనే ఉన్నారు. మరికొంతమంది మాత్రం మోసగాళ్ల బారినపడకుండా జాగ్రత్తలు తీసుకుంటున్నారు. 

పోలీసులకు చేరని వ్యవహారం.. 
పరువుకి సంబంధించిన విషయం కావడంతో దీన్ని ఎవరూ పోలీసుల దృష్టికి తీసుకెళ్లడంలేదు. కేవలం స్నేహితులతో మాత్రమే దీని గురించి చర్చిస్తున్నారు. వారెవరూ కూడా అలా మోసపోకండా జాగ్రత్తలు తీసుకోవాలని హెచ్చరిస్తున్నారు. సోషల్ మీడియా విస్తృతం అయిన తర్వాత మోసగాళ్లకు సులభంగా డబ్బు సంపాదించే మార్గాలు ఎక్కువయ్యాయి. ఏమాత్రం కష్టం లేకుండా ఇలాంటి వీడియోలను అడ్డు పెట్టుకుని బ్లాక్ మెయిల్ చేసి డబ్బులు సంపాదించడం మొదలు పెట్టారు. ఇటీవల కాలంలో బ్యాంక్ కి సంబంధించి ఎక్కువగా మోసాలు జరగడం మనం చూస్తూనే ఉన్నాం. అయితే ఇప్పుడు ఇలా వాట్సప్ వీడియో కాల్స్ ద్వారా కూడా మోసాలు ఎక్కువయ్యాయి. సో.. బీ అలర్ట్. పొరపాటున ఇలాంటి మోసగాళ్ల బారిన పడినా.. ధైర్యంగా ఉండండి. బ్లాక్ మెయిల్స్ కి లొంగకుండా పోలీసుల్ని ఆశ్రయించండి. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి