AP Ministers Bus Tour: టీడీపీకి చెక్ పెట్టేందుకు వైఎస్ జగన్ వ్యూహం, మే 26 నుంచి మంత్రుల బస్సు యాత్ర

AP Ministers Bus Tour: టీడీపీ నేతలకు చెక్ పెట్టేందుకు, ఏపీ ప్రభుత్వం చేసే ప్రతి కార్యక్రమాన్ని ప్రజలకు  వివరించడమే ప్రధాన అజెండాగా రాష్ట్ర మంత్రులు బస్సు యాత్రకు ప్లాన్ చేశారు.

మే 26 నుంచి మంత్రుల బస్సు యాత్ర

AP Ministers Will Do Bus Tour From May 26: ప్రతిపక్ష టీడీపీ నేతలకు చెక్ పెట్టేందుకు ఏపీ మంత్రులు వ్యూహాలు రచిస్తున్నారు. సీఎం వైఎస్ జగన్ మోహన్ రెడ్డి ఆదేశాలతో ఏపీ మంత్రులు బస్ యాత్రకు  రెడీ అవుతున్నారు. మే 26 నుంచి నాలుగు రోజులపాటు ఏపీ మంత్రులు బస్సు యాత్ర నిర్వహించనున్నారు. ఈ బస్సు యాత్రలో భాగంగా రాష్ట్ర ప్రభుత్వం చేస్తున్న సంక్షేమ కార్యక్రమాలు అమలు, సామాజిక  న్యాయం  ఈ అంశాలన్నీ  జనంలోకి తీసుకువెళ్లేందుకు మంత్రులు యాత్రలో పాల్గొననున్నారు.

ఏపీ ప్రభుత్వం చేసే ప్రతి కార్యక్రమాన్ని ప్రజలకు  వివరించడమే ప్రధాన అజెండాగా ఈ  బస్సు యాత్ర జరగనుంది.. జగన్ కేబినెట్‌లో అధిక ప్రాధాన్యం కల్పించిన 17  మంది  బీసీ, ఎస్సీ, ఎస్టీ మైనారిటీ మంత్రులతో  పాటు కొంతమంది ఎమ్మెల్యేలు, సీనియర్ నేతలు పాల్గొని బస్సు యాత్రను విజయవంతం చేయనున్నారు. ఇప్పటికే  గడప గడపకు వైఎస్సార్ పేరుతో వైఎస్సార్‌సీపీ ఎమ్మెల్యేలు, మంత్రులు రాష్ట్రంలోని అన్ని నియోజకవర్గాల్లో పర్యటిస్తున్నారు. ప్రతిపక్ష టీడీపీ నేతల జోరుకు బ్రేకులు వేయాలంటే మైనారిటీ మంత్రులు నాలుగు రోజులపాటు బస్సు యాత్రలు చేసి, ప్రభుత్వ పథకాలపై మరింత ఎక్కువగా ప్రచారం చేసి, తమ పాలనపై ప్రజలలో మరింత అవగాహన పెంచాలన్న ఉద్దేశంతో  ఈ బస్ యాత్రకు మంత్రులు శ్రీకారం చుట్టనున్నారు.

శ్రీకాకుళం, అనంతపురం, రాజమండ్రి, నరసరావుపేట నాలుగు నియోజకవర్గాల్లో బస్సు యాత్ర, బహిరంగ సభలకు ఏపీ మంత్రులు సిద్ధంగా ఉన్నారు. ఏపీలో బీసీ, ఎస్సీ, ఎస్టీ మైనారిటీలకు తమ ప్రభుత్వం ఇస్తున్న ప్రాధాన్యతను ప్రజలకు వివరించడమే లక్ష్యంగా ఈ బస్సు యాత్ర కొనసాగనుంది. బీసీ, ఎస్టీ, ఎస్టీ మైనారిటీ విభాగాల మంత్రులు యాత్రలో భాగస్వాములు కాబోతున్నారు.

ఏపీ  ప్రభుత్వం అమలు  చేస్తున్న  వివిధ  సంక్షేమ పథకాలపై ప్రజల దగ్గరకు వెళ్లడానికి  అధికారులు, అన్ని శాఖల కార్యదర్శులు బాగా దృష్టి పెట్టాలని సీఎస్ ఆదేశాలు ఇచ్చారు. రాష్ట్ర ప్రభుత్వం  అమలు  చేసే  కార్యక్రమాలు ప్రజలకు చేరువ కావడంలో కార్యదర్శుల పాత్ర కీలకం అన్నారు సీఎస్. బుధవారం నాడు రాష్ట్ర సుస్థిరాభివృద్ధి, సంక్షేమ పథకాల అమలు అంశాలపై  అధికారులతో సీఎస్ సమావేశం నిర్వహించారు.