AP Government On CPS: సీపీఎస్‌ అమలు సాధ్యం కాదు- తేల్చి చెప్పిన ఏపీ ప్రభుత్వం, జీపీఎస్‌కు సహకరించాలని సూచన

సీపీఎస్‌ అమలు సాధ్యం కాదని ఏపీ ప్రభుత్వం తేల్చేసింది. న్యాయపరమైన చిక్కులు ఉన్నందున జీపీఎస్‌కు అంగీకరించాలని ఉద్యోగులను రిక్వస్ట్ చేస్తోంది.

ప్రతీకాత్మక చిత్రం

సీపీఎస్‌పై ఉద్యోగ సంఘాలతో చర్చలు ముగిశాయి. పాత పింఛన్‌ విధానం అమలు సాధ్యం కాదని మంత్రుల కమిటీ తెగేసి చెప్పేసింది. న్యాయపరమైన సమస్యలు వచ్చే అవకాశం ఉందని కూడ‌ మంత్రులు వెల్లడించారు. జీపీఎస్ విధానం అమలుకు ఉద్యోగుల సహకారం కావాలని సూచించారు. సీపీఎస్ ఉద్యోగులకు నచ్చజెప్పాలని ఉద్యోగ నేతలకు మంత్రులు అభ్యర్థించారు. 

జీపీఎస్‌ కుదరదన్న ఉద్యోగ సంఘాలు 

జీపీఎస్‌పై తమ అభిప్రాయాలు గురించి, 6 సంఘాల నేతలు కుండ‌బ‌ద్దలు కొట్టిన‌ట్టుగా తెలుస్తోంది. జీపీఎస్‌లో సీపీఎస్‌లోని అవలక్షణాలన్నీ ఉన్నాయ‌ని ఉద్యోగ సంఘాలు అభిప్రాయ‌ప‌డ్డాయి. జీపీఎస్ ప్రతిపాదనలు దారుణంగా ఉన్నాయని ఉద్యోగ సంఘాలు ఆవేద‌న వ్యక్తం చేస్తున్నారు. 

మార్కెట్‌లో పెట్టిన డబ్బులు రావుగా: సజ్జల

రాజస్థాన్‌లో 4 లక్షల ఉద్యోగులను ఓపీఎస్‌లోకి తెచ్చారని ఉద్యోగ సంఘాలు వెల్లడించాయి. ఇప్పటికే స్టాక్ మార్కెట్‌లో పెట్టిన డబ్బులు రావని ప్రభుత్వ సలహాదారు సజ్జల కీల‌క వ్యాఖ్యలు చేశారు. దీనిపై కూడ ఉద్యోగులు అసంతృప్తినివ్యక్తం చేశారు. ఎప్పటికైనా ఆ మొత్తం ఉద్యోగులదేనని ఉద్యోగ సంఘాలు కూడ దీటుగానే బదులిచ్చాయి. 

వేరే ముచ్చట లేదు... జీపీఎస్‌పైనే డిస్కషన్ 

రాజస్థాన్ ప్రభుత్వం అమలు చేసిన విధానాన్ని కూడ ఉద్యోగ సంఘాలు వివ‌రించేందుకు ప్రయ‌త్నించినా ఫ‌లితం లేక‌పోయింది. వాటిని క‌నీసం ప‌ట్టించుకొని మంత్రుల క‌మిటి జీపీఎస్‌పైనే మాట్లాడాల‌ని ఉద్యోగుల‌కు సూచించారు. అంతే కాదు జీపీఎస్‌లో  ఇంకా ఏం కావాలో మాత్రమే చెప్పాల‌ని క్లారిటి అడిగింది, మంత్రుల కమిటీ.