Actress Kasthuri Arrested: తెలుగు ప్రజలపై అనుచిత వ్యాఖ్యలు - సినీ నటి కస్తూరిని అరెస్ట్ చేసిన తమిళనాడు పోలీసులు

Hyderabad News: ప్రముఖ నటి కస్తూరిని పోలీసులు అరెస్ట్ చేశారు. తెలుగు ప్రజలపై అనుచిత వ్యాఖ్యలు చేసిన కేసులో తమిళనాడు పోలీసులు ఎట్టకేలకు ఆమెను హైదరాబాద్‌లో అదుపులోకి తీసుకున్నారు.

ప్రముఖ నటి కస్తూరి అరెస్ట్

Source : Twitter (X)

Actress Kasthuri Arrested In Hyderabad: ప్రముఖ సినీ నటి కస్తూరి (Actress Kasthuri) శనివారం అరెస్టయ్యారు. హైదరాబాద్ గచ్చిబౌలిలో చెన్నై పోలీసులు (Chennai Police) ఆమెను అదుపులోకి తీసుకున్నారు. బ్రాహ్మణుల భద్రతకు ప్రత్యేక చట్టం తీసుకురావాలని కోరుతూ హిందూ మక్కల్ కట్చి ఆధ్వర్యంలో చెన్నైలో నిర్వహించిన ఆందోళనలో పాల్గొన్న ఆమె తెలుగువారిపై అభ్యంతకర వ్యాఖ్యలు చేశారు. దీనిపై పలు తెలుగు సంఘాలు, ప్రముఖులు ఆగ్రహం వ్యక్తం చేశారు. అక్కడి పోలీస్ స్టేషన్లలో ఫిర్యాదులు చేశారు. చెన్నై ఎగ్మోర్‌లో ఉన్న తెలుగు సంస్థ ఫిర్యాదు మేరకు పోలీసులు ఆమెపై 4 సెక్షన్ల కింద కేసు నమోదు చేశారు.

ఈ కేసులో సమన్లు ఇవ్వడానికి పోలీసులు ఇటీవల పోయెస్ గార్డెన్‌లోని కస్తూరి ఇంటికి వెళ్లారు. ఆమె ఇంటికి తాళం వేసి ఉండడంతో సహా ఫోన్ స్విచ్చాఫ్ అని రావడంతో పరారీలో ఉన్నట్లు తెలిపారు. గాలించేందుకు ప్రత్యేక బృందాన్ని ఏర్పాటు చేసినట్లు వెల్లడించారు. ఈ క్రమంలోనే శనివారం సాయంత్రం హైదరాబాద్ గచ్చిబౌలిలో ఉన్నట్లు తెలుసుకున్న చెన్నై పోలీసులు అక్కడకు వచ్చి అరెస్ట్ చేశారు.

ఇదీ జరిగింది

కాగా, నటి కస్తూరి ఇటీవల తెలుగు వారిపై చేసిన వ్యాఖ్యలు రాజకీయంగా పెద్ద దుమారాన్నే రేపాయి. బ్రాహ్మణుల రక్షణకు ప్రత్యేక చట్టం తీసుకురావాలనే డిమాండ్‌తో ఈ నెల 4న చెన్నైలో నిరసన కార్యక్రమం జరిగింది. ఆ కార్యక్రమంలో మా‌ట్లాడిన ఆమె తెలుగు వారిపై అనుచిత వ్యాఖ్యలు చేశారు. అంతఃపురంలో సేవ చేసేందుకు వచ్చిన తెలుగువాళ్లు ఇప్పుడు తామే అసలైన తమిళులం అనేలా మాట్లాడుతున్నారని మండిపడ్డారు. తెలుగు మాట్లాడే వాళ్లకే మంత్రి పదవులు ఇస్తున్నారని అసలైన తమిళులను పట్టించుకోవడం లేదన్నారు. ఈ వ్యాఖ్యలు పెను దుమారం రేపాయి.

ఈ క్రమంలో కస్తూరి తన వ్యాఖ్యలను వెనక్కు తీసుకుంటున్నట్లు ఓ ప్రకటన విడుదల చేశారు. తాను కొందరి గురించే మాట్లాడినట్టు వివరణ ఇచ్చారు. తెలుగు స్నేహితులు ఒకరు తనకు పరిణామాలు వివరించారని పూర్తి విషయం తెలుసుకున్న తర్వాత ఇలా స్పందిస్తున్నట్టు వెల్లడించారు. దేశంలోని భిన్నత్వంలో ఏకత్వంపై తనకు చాలా గౌరవం ఉందని.. తాను జాతి ప్రాంతాలకు అతీతంగా ఉంటానని అన్నారు. ఈ సందర్భంగా తెలుగు వారితో తనకున్న అనుబంధాన్ని ఆమె గుర్తు చేసుకున్నారు. కొందరి గురించి చేసిన కామెంట్స్‌ను తప్పుగా ప్రచారం చేస్తున్నారని ఎవరీ ఇబ్బంది పెట్టే ఉద్దేశం తనకు లేదని స్పష్టం చేశారు. తమిళనాడులోని బ్రాహ్మణుల పోరాటంలో పాలు పంచుకోవాలని తెలుగు వారికి విజ్ఞప్తి చేశారు. అయితే, ఈ వ్యాఖ్యలపై కేసులు నమోదు కావడంతో పోలీసులు చర్యలు చేపట్టారు.