Suryapet: నిన్న మరదలు... నేడు బావ... సూర్యపేట లవ్ స్టోరీలో తీవ్ర విషాదం

మరదలు చనిపోయిందని బావ పురుగుల మందు తాగి బలవన్మరణానికి పాల్పడ్డాడు. ఆ సమయంలో సెల్ఫీ వీడియో తీసుకుంటూ తాను పురుగుల మందు తాగుతున్న వీడియో మొత్తం రికార్డు చేశాడు.

ఆత్మహత్య చేసుకున్న యువకుడు

వారిద్దరూ గాఢంగా ప్రేమించుకున్నారు. కలిసి బతకాలని ఎన్నో కలలు కన్న ప్రేమికుల ఆశలు ఆదిలోనే అడియాసలయ్యాయి. యువతి చనిపోయిందని, బాధ భరించలేని ప్రియుడు సైతం తనువు చాలించాడు. పురుగుల మందు కొనుక్కొని ఒంటరిగా కూర్చొని బాధపడుతూ దాన్ని తాగేసి బలవన్మరణానికి పాల్పడ్డాడు. ఆ విషాదకర సమయంలో సెల్ఫీ వీడియో తీసుకుంటూ తాను పురుగుల మందు తాగుతున్న వీడియో మొత్తం రికార్డు చేశాడు. ఆ తర్వాత అతను కొన ఊపిరితో ఆస్పత్రి మంచంపై కొట్టుమిట్టాడుతున్న దృశ్యాలు కూడా బయటకు వచ్చాయి. ఈ వీడియోలు ఆ కుటుంబంలో పెను విషాదాన్ని నింపాయి.

సూర్యాపేట జిల్లాలోని హుజూర్‌నగర్ మండలం బూరుగడ్డలో ఈ ఘటన చోటు చేసుకుంది. తొలుత గురువారం నాడు ప్రియురాలు మౌనిక ఆత్మహత్య చేసుకోగా.. ఆమె చనిపోయిన విషయాన్ని ప్రియుడు పవన్ తట్టుకోలేకపోయాడు. వీరిద్దరూ వరసకు బావా మరదళ్లు. ఆమె లేని లోటును భరించలేని యువకుడు మనస్తాపానికి లోనయ్యాడు. తాను కూడా చనిపోవాలని నిశ్చయించుకున్నాడు. అదే క్రమంలో శుక్రవారం పురుగుల మందు కొనుగోలు చేసి తాగేశాడు. ఆత్మహత్యకు ముందు తన మొబైల్‌ ఫోన్‌లో సెల్ఫీ వీడియో రికార్డు చేశాడు. తాను పురుగుల మందు తాగడం మొత్తాన్ని వీడియో తీశాడు. 

రెండు రోజుల్లో ప్రేమికుల జంట ఆత్మహత్య చేసుకోవడం స్థానికంగా తీవ్ర విషాదాన్ని నింపింది. ఇరు కుటుంబాల వారు కన్నీరుమున్నీరవుతున్నారు. అయితే, ఈ బావా మరదళ్లు పెళ్లి చేసుకోవాలని అనుకున్నారని.. వీరు విషయం తమ ఇళ్లలో చెప్పడంతో వారు ఒప్పుకోలేదని తెలుస్తోంది. అందుకే తొలుత మౌనిక ఆత్మహత్య చేసుకోగా.. అది తట్టుకోలేని పవన్ కూడా పురుగుల మందు తాగి ఆత్మహత్య చేసుకున్నట్లుగా పోలీసులు ప్రాథమికంగా భావిస్తున్నారు. పురుగుల మందు సేవిస్తూ ప్రియుడు పవన్ తీసుకున్న సెల్ఫీ వీడియో సోషల్ మీడియాలో వైరల్ అవుతోంది. పోలీసులు కేసు నమోదు చేసుకుని దర్యాప్తు ప్రారంభించారు. యువతి ఆత్మహత్యకు పాల్పడడానికి గల కచ్చితమైన కారణాల కోసం పోలీసులు విచారణ జరుపుతున్నారు.