Paddy Issue: కేంద్రం వడ్లు కొనదు... రైతులు వరి పండించొద్దు.. మంత్రి నిరంజన్‌రెడ్డి ప్రకటన

వరిపై కేంద్ర, రాష్ట్ర ప్రభుత్వాల మధ్య ఫైట్ కొనసాగుతూనే ఉంది. పియూష్ గోయల్‌తో సమావేశమైన మంత్రివర్గం తీవ్ర అసంతృప్తితో వెనుదిరిగింది.

కేంద్రం తీరుపై మంత్రి నిరంజన్‌రెడ్డి అసంతృప్తి

వరి ధాన్యంపై కేంద్రం, తెలంగాణ ప్రభుత్వం మధ్య పంచాయితీ ఇంకా తేలలేదు. యాసంగి సీజన్లో పండిన పంట కొంటారా లేదా అని కేంద్రాన్ని నిలదీస్తోంది తెలంగాణ ప్రభుత్వం. ఈ మేరకు మంత్రుల బృందం కేంద్రమంత్రి మంత్రి పియూష్‌ గోయల్‌తో సమావేశమైంది. ఎన్ని వడ్లు కొంటారో చెప్పాలని స్పష్టత కోరినట్టు తెలంగాణ వ్యవసాయ శాఖ మంత్రి నిరంజన్‌రెడ్డి ఓ ప్రకటనలో తెలిపారు. 
నిరంజన్ రెడ్డి విడుదల చేసిన ప్రకటన ప్రకారం... వరి ధాన్యం కొనుగోలు విషయంలో కేంద్రం స్పష్టత ఇవ్వలేదన్నారు. దీనిపై కేంద్రం చేతులెత్తేసిందని పేర్కొన్నారాయన. ఈ సీజన్‌లో ఎంత మొత్తం ధాన్యం సేకరిస్తారో అడిగితే స్పష్టమైన సమాధానం కేంద్రమంత్రి నుంచి రాలేదన్నారు. 
కేంద్రం నుంచి ఆశించిన సమాధానం రాలేదని.. ధాన్యం కొంటారో లేదో తెలియదని అందుకే యాసంగిలో వరి సాగు చేయొద్దని నిరంజన్ రెడ్డి రైతులకు విజ్ఞప్తి చేశారు. ధాన్యం సేకరణపై పీయూష్‌గోయల్‌తో చర్చలు విఫలమైనట్టు మంత్రుల బృందం పేర్కొంది. ఏటా ఎంత ధాన్యాన్ని సేకరిస్తారో చెప్పాలన్న వినతికి కూడా కేంద్రమంత్రి స్పష్టమైన హామీ ఇవ్వలేదన్నారు. 
సమావేశ వివరాలు సీఎం కేసీఆర్‌ దృష్టికి తీసుకెళ్లి భవిష్యత్‌ కార్యాచరణ నిర్ణయిస్తామని తెలిపింది తెలంగాణ మంత్రుల బృందం. ధాన్యం సేకరణపై సానుకూల స్పందన వస్తుందని నమ్మకం పోయిందని... రెండునెలల క్రితమే ధాన్యం కొనుగోలుపై సీఎం కేసీఆర్‌ చర్చలు జరిపి, అన్ని అంశాలు కొలిక్కి తీసుకొచ్చారని... కేంద్రమంత్రి ఓకే అంటే కొనుగోలు సజావుగా సాగేదని... ఇప్పుడు కేంద్రం తీరు కారణంగా రైతులకు తీరని నష్టం కలుగుతుందన్నారు నిరంజన్‌రెడ్డి. 

కేంద్రం తీరు ఇలా ఉంటే.. తెలంగాణలో బీజేపీ తీరు మాత్రం వేరుగా ఉందని మండిపడింది మంత్రుల బృందం. ప్రజల్లో గందరగోళం సృష్టించేందుకు ఇష్టం వచ్చినట్టు ప్రకటనలు చేస్తున్నారని విమర్శలు చేసింది. ఇకపై అలా మాట్లాడొద్దని... రైతులను తప్పుదారి పట్టించొద్దని సూచించింది. దీనిపై కేంద్రం నుంచి కూడా బీజేపీ నేతలకు సూచనలు వచ్చాయని... వరి ఎక్కువ చేయొద్దని వారించినట్టు నిరంజన్‌రెడ్డి వెల్లడించారు. 

 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి