Poonam Kaur: నేను తెలంగాణ బిడ్డనే, నన్ను వెలివేయకండి - పూనమ్ కౌర్ భావోద్వేగం

పూన‌మ్ కౌర్ చేసిన కామెంట్స్ సోషల్ మీడియాలో వైర‌ల్ అవుతున్నాయి. గ‌వ‌ర్నర్ ఎదుటే రాజ్ భ‌వ‌న్‌లో ఓ మహిళ ఇంత బ‌హిరంగంగా, ఎమోష‌న‌ల్‌గా క‌న్నీళ్లు పెట్టుకోవడం ప్రాధాన్యం సంతరించుకుంది.

రాజ్ భవన్‌లో మాట్లాడుతున్న పూనమ్ కౌర్

తెలంగాణలో తనను పరాయి వ్యక్తిగా గుర్తిస్తూ వెలివేసినట్లుగా చేస్తున్నారని నటి పూనమ్ కౌర్ ఆవేదన వ్యక్తం చేశారు. తాను తెలంగాణలో బిడ్డ అని, హైదరాబాద్‌లోనే పుట్టి పెరిగానని గుర్తు చేసుకున్నారు. తెలంగాణ రాజ్ భవన్‌లో మహిళా దినోత్సవ వేడుకలను సోమవారం సాయంత్రం నిర్వహించారు. ఈ సందర్భంగా పూనమ్‌ కౌర్ కూడా హాజరయ్యారు. 

ఈ సందర్భంగా పూనమ్ కౌర్ మాట్లాడుతూ.. ‘‘నేను తెలంగాణలో పుట్టి పెరిగిన అమ్మాయిని. నా మతం పేరు చెప్పి నన్ను తెలంగాణ నుంచి వేరు చేసి చూస్తున్నారు. నేను పంజాబీ అమ్మాయినని చెబుతుంటారు. నేను ఇక్కడే పుట్టాను.. పెరిగాను. నా మతం న‌న్ను నా రాష్ట్రం నుంచి వేరు చేయ‌దు. మీ అంద‌రిలాగానే నేను తెలంగాణ బిడ్డని. నేను మైనార్టీ సిక్కు అమ్మాయిన‌ని చెప్పి వేరుచేస్తున్నారు’’ అని మాట్లాడుతూ భావోద్వేగానికి లోనయ్యారు. క‌న్నీళ్లు పెట్టుకున్నారు. అంతేకాక, తాను రాసిన ఓ కవితను కూడా చదివి వినిపించారు.

పూన‌మ్ కౌర్ చేసిన కామెంట్స్ సోషల్ మీడియాలో వైర‌ల్ అవుతున్నాయి. గ‌వ‌ర్నర్ ఎదుటే రాజ్ భ‌వ‌న్‌లో ఓ మహిళ ఇంత బ‌హిరంగంగా, ఎమోష‌న‌ల్‌గా క‌న్నీళ్లు పెట్టుకోవడం ప్రాధాన్యం సంతరించుకుంది. ఈ కార్యక్రమంలో గవర్నర్ తమిళిసైతో పాటు జాతీయ మహిళా కమిషన్ సభ్యురాలు ఖుష్బూ, ఐఏఎస్ అధికారిణి శైలజా రామయ్యర్, త్రివిద దళాల్లో పని చేసే మహిళా ఉన్నతాధికారులు పాల్గొన్నారు.