Bandi Sanjay Birthday: బండి సంజయ్‌కు కేసీఆర్ బర్త్‌డే విషెస్, ప్రత్యేకంగా లేఖ - థ్యాంక్స్ చెప్పిన బండి

తాజాగా కేసీఆర్ బండి సంజయ్ కు పుట్టిన రోజు శుభాకాంక్షలు చెప్పడం ప్రాధాన్యం సంతరించుకుంది. దీనికి సంబంధించి కేసీఆర్ ఓ లేఖ కూడా బండి సంజయ్ కు పంపారు.

బండి సంజయ్, కేసీఆర్ (ఫైల్ ఫోటోలు)

రాజకీయాల్లో వివిధ పార్టీల నేతల మధ్య వైరం ఏ స్థాయిలో ఉంటుందో ప్రత్యేకంగా చెప్పనవసరం లేదు. వేర్వేరు పార్టీల్లో ఉన్నా సరే చాలా మంది రాజకీయ నేతలు వ్యక్తిగతంగా స్నేహపూరితంగానే ఉంటారు. పైకి మాత్రం ఒకరిపై మరొకరు విమర్శలు, ప్రతివిమర్శలు చేసుకుంటూ ఉంటారు. తెర వెనుక మాత్రం ఫ్రెండ్లీగానే ఉంటారు. కానీ, అతికొద్ది మంది లీడర్ల మధ్య మాత్రం కాస్త ఎక్కువ విభేదాలు ఉంటాయి. అలాంటి వారిలో కేసీఆర్, బండి సంజయ్ కూడా ఉంటారు. బండి సంజయ్ బీజేపీ రాష్ట్ర అధ్యక్షుడిగా బాధ్యతలు చేపట్టిన నాటి నుంచి కేసీఆర్‌పై రాజకీయంగానే కాక, వ్యక్తిగతంగానూ ఘాటు విమర్శలు చేసేవారు. కేసీఆర్ కూడా అంతే దీటుగా దిమ్మతిరిగే కౌంటర్లు వేసేవారు.

అయితే, తాజాగా కేసీఆర్ బండి సంజయ్ కు పుట్టిన రోజు శుభాకాంక్షలు చెప్పడం ప్రాధాన్యం సంతరించుకుంది. దీనికి సంబంధించి కేసీఆర్ ఓ లేఖ కూడా బండి సంజయ్ కు పంపారు. అందులో ‘‘శ్రీ బండి సంజయ్ గారూ.. మీకు పుట్టిన రోజు శుభాకాంక్షలు. ప్రజా సంక్షేమం కోసం శ్రమిస్తున్న మీరు ఆయురారోగ్యాలతో నిండు నూరేళ్లు ప్రజలకు సేవలు అందించాలని మనస్ఫూర్తిగా ఆ భగవంతుడిని కోరుకుంటున్నాను - కే. చంద్రశేఖర్ రావు’’ అంటూ బండి సంజయ్ కు పుట్టిన రోజు శుభాకాంక్షలు తెలిపారు.

నా పుట్టినరోజు సందర్భంగా శుభాకాంక్షలు అందజేసిన గౌరవ ముఖ్యమంత్రి శ్రీ కె. చంద్రశేఖర్ రావు గారికి నా హృదయపూర్వక ధన్యవాదాలు.@TelanganaCMO pic.twitter.com/dFml1eoIXR

— Bandi Sanjay Kumar (@bandisanjay_bjp) July 11, 2023

ఈ లేఖను బండి సంజయ్ ట్వీట్ చేస్తూ.. ‘‘నా పుట్టినరోజు సందర్భంగా శుభాకాంక్షలు అందజేసిన గౌరవ ముఖ్యమంత్రి శ్రీ కె. చంద్రశేఖర్ రావు గారికి నా హృదయపూర్వక ధన్యవాదాలు’’ అంటూ సీఎంవోను ట్యాగ్ చేస్తూ ట్వీట్ చేశారు.

గతంలో తరచూ ఘాటు విమర్శలు చేసుకునే వీరు ఉన్నట్టుండి ఇలా శుభాకాంక్షలు, ధన్యవాదాలు చెప్పుకోవడం ఆసక్తి కలిగించింది. బండి సంజయ్ అధిష్ఠానం సూచన మేరకు ప్రస్తుతం బీజేపీ రాష్ట్ర అధ్యక్ష పదవి నుంచి వైదొలిగిన సంగతి తెలిసిందే.