Vivo X200: వావ్ అనిపించే వివో ఫోన్ వచ్చేసింది - మార్కెట్లో ఎక్స్200 ఎంట్రీ - ధర ఎంత?

Vivo New Phone: ప్రముఖ స్మార్ట్ ఫోన్ బ్రాండ్ వివో తన కొత్త స్మార్ట్ ఫోన్‌ను భారతీయ మార్కెట్లో లాంచ్ చేసింది. అదే వివో ఎక్స్200. దీని ధర మనదేశంలో రూ.65,999 నుంచి ప్రారంభం కానుంది.

వివో ఎక్స్200

Source : Vivo

Vivo X200 Launched: వివో ఎక్స్200 స్మార్ట్ ఫోన్ మనదేశంలో గురువారం లాంచ్ అయింది. మీడియాటెక్ డైమెన్సిటీ 9400 ప్రాసెసర్‌పై ఈ స్మార్ట్ ఫోన్ రన్ కానుంది. 5800 ఎంఏహెచ్ భారీ బ్యాటరీని వివో ఎక్స్200లో అందించారు. చైనాలో అక్టోబర్‌లోనే ఈ స్మార్ట్ ఫోన్ లాంచ్ అయింది. ఇప్పుడు మనదేశంలో కూడా ఈ స్మార్ట్ ఫోన్ లాంచ్ చేశారు.

వివో ఎక్స్200 ధర (Vivo X200 Price in India)
ఈ స్మార్ట్ ఫోన్ రెండు వేరియంట్లలో మార్కెట్లో లాంచ్ అయింది. ఇందులో 12 జీబీ ర్యామ్ + 256 జీబీ స్టోరేజ్ వేరియంట్ ధరను రూ.65,999గా నిర్ణయించారు. టాప్ ఎండ్ మోడల్ అయిన 16 జీబీ ర్యామ్ + 512 జీబీ స్టోరేజ్ వేరియంట్ ధర రూ.71,999గా ఉంది. కాస్మిక్ బ్లాక్ నార్మల్ గ్రీన్ కలర్ ఆప్షన్లలో వివో ఎక్స్200ను కొనుగోలు చేయవచ్చు. డిసెంబర్ 19వ తేదీ నుంచి దీనికి సంబంధించిన సేల్ ప్రారంభం కానుంది. ఈ ఫోన్‌పై తొమ్మిది నెలల వరకు నో కాస్ట్ ఈఎంఐ ఆప్షన్లు కూడా అందుబాటులో ఉన్నాయి. ఈ స్మార్ట్ ఫోన్ల కొనుగోలుపై పలు బ్యాంక్ ఆఫర్లు కూడా అందుబాటులో ఉండనున్నాయి.

వివో ఎక్స్200 స్పెసిఫికేషన్లు (Vivo X200 Specifications)
ఆండ్రాయిడ్ 15 ఆధారిత ఫన్‌టచ్ఓఎస్ 15 ఆపరేటింగ్ సిస్టంపై ఈ ఫోన్ పని చేయనుంది. 6.67 అంగుళాల అమోఎల్ఈడీ 8టీ ఎల్టీపీఎస్ 1.5కే రిజల్యూషన్ డిస్‌ప్లేను ఇందులో అందించారు. 120 హెర్ట్జ్ రిఫ్రెష్ రేట్‌ను ఈ ఫోన్ సపోర్ట్ చేయనుంది. 4500 నిట్స్ పీక్ బ్రైట్‌నెస్‌ ఫీచర్ కూడా అందుబాటులో ఉంది. మీడియాటెక్ డైమెన్సిటీ 9400 ప్రాసెసర్‌పై వివో ఎక్స్200 రన్ కానుంది. 16 జీబీ ఎల్పీడీడీఆర్5ఎక్స్ ర్యామ్, 512 జీబీ వరకు యూఎఫ్ఎస్ 4.0 స్టోరేజ్ అందుబాటులో ఉంది.

ఇక కెమెరాల విషయానికి వస్తే... ఫోన్ వెనకవైపు మూడు జీస్ బ్రాండెడ్ కెమెరాలు ఉండనున్నాయి. వీటిలో ప్రధాన కెమెరాగా 50 మెగాపిక్సెల్ సోనీ ఐఎంఎక్స్921 సెన్సార్‌ను అందించారు. దీంతోపాటు 50 మెగాపిక్సెల్ జేఎన్1 కెమెరా, 50 మెగాపిక్సెల్ సోనీ ఐఎంఎక్స్882 సెన్సార్ కూడా ఉన్నాయి. సెల్ఫీలు, వీడియో కాల్స్ కోసం ఫోన్ ముందువైపు 32 మెగాపిక్సెల్ కెమెరా అందుబాటులో ఉంది.

5జీ, వైఫై, బ్లూటూత్ వీ5.4, ఎన్ఎఫ్‌సీ, గెలీలియో, క్యూజెడ్ఎస్ఎస్, నావిక్, ఏ-జీపీఎస్, ఓటీజీ, యూఎస్‌బీ టైప్-సీ పోర్టు అందుబాటులో ఉన్నాయి. యాక్సెలరోమీటర్, యాంబియంట్ లైట్ సెన్సార్, కలర్ టెంపరేచర్ సెన్సార్, ప్రాక్సిమిటీ సెన్సార్, ఈ-కంపాస్, ఫ్లికర్ సెన్సార్, గైరోస్కోప్, లేజర్ ఫోకస్ సెన్సార్, ఇన్‌ఫ్రారెడ్ బ్లాస్టర్ అందించారు. ఇన్ డిస్‌ప్లే ఫింగర్ ప్రింట్ సెన్సార్‌ను కూడా ఈ ఫోన్‌లో చూడవచ్చు. డస్ట్, వాటర్ రెసిస్టెన్స్ కోసం ఐపీ68, ఐపీ69 రేటింగ్ అందించారు. దీని మందం 0.79 సెంటీమీటర్లు కాగా, బరువు 202 గ్రాములుగా ఉంది. ఈ స్మార్ట్ ఫోన్ బ్యాటరీ సామర్థ్యం 5800 ఎంఏహెచ్ కాగా, 90W ఫాస్ట్ ఛార్జింగ్‌ను కూడా సపోర్ట్ చేయనుంది.