ODI Captaincy: భారత క్రికెట్లో సున్నిత సమస్య..! కెప్టెన్సీపై రోహిత్‌, కోహ్లీతో సెలక్టర్ల చర్చ!

వన్డే సారథ్యంపై విరాట్‌ కోహ్లీ, రోహిత్‌ శర్మతో సెలక్టర్లు మాట్లాడనున్నారని తెలిసింది. రోహిత్‌శర్మ, విరాట్ కోహ్లీకి తమ పాత్రల గురించి వివరించనున్నారు.

విరాట్‌ కోహ్లీ, రోహిత్‌ శర్మ,

దక్షిణాఫ్రికా పర్యటనకు ముందు భారత క్రికెట్లో స్తబ్ధత నెలకొంది! అత్యంత సున్నితత్వంతో కూడిన నాయకత్వ సమస్యపై సుదీర్ఘ చర్చ జరగనుంది. వన్డే సారథ్యంపై విరాట్‌ కోహ్లీ, రోహిత్‌ శర్మతో సెలక్టర్లు మాట్లాడనున్నారని తెలిసింది.

న్యూజిలాండ్‌ టెస్టు సిరీసు ముగిసిన రోజే దక్షిణాఫ్రికా పర్యటనకు భారత జట్టును ఎంపిక చేస్తారని భావించారు. ఒమిక్రాన్‌ నేపథ్యంలో షెడ్యూలును మరో వారం రోజులు పొడగించడంతో ఇంకా చేయలేదు. అయితే వన్డే పగ్గాలు ఎవరికి అప్పగించాలన్న దానిపై జట్టు యాజమాన్యంలో చర్చ జరుగుతోంది. విరాట్‌ కోహ్లీని కొనసాగించాలా? లేదా రోహిత్‌ శర్మకు అప్పగించాలా? అని ఆలోచిస్తున్నారు.

భారత క్రికెట్లో ఇది అత్యంత సున్నితమైన సమస్యగా కనిపిస్తోంది! ఇప్పటికే టీ20 కెప్టెన్సీని రోహిత్‌ శర్మకు అప్పగించారు. మొత్తంగా తెలుపు బంతి క్రికెట్‌ బాధ్యతలను అతడికే అప్పగిస్తే మంచిదని కొందరు అంటున్నారు. మున్ముందు జరిగే మెగా టోర్నీలకు జట్టును సిద్ధం చేసుకొనేందుకు ఇది ఉపయోగపడుతుందని భావిస్తున్నారు. వచ్చే ఏడాది తొమ్మిది వన్డేలకు మించి లేవు కాబట్టి కోహ్లీనే కొనసాగించాలని మరికొందరు చెబుతున్నారు. ఇలాంటి అయోమయ పరిస్థితి నెలకొనడంతో సెలక్టర్లకు దిక్కుతోచడం లేదు.

పరిస్థితి గురించి క్షుణ్ణంగా వివరించి నిర్ణయం తీసుకుంటే మంచిదని సెలక్టర్లు భావిస్తున్నారు. అందుకే విరాట్‌ కోహ్లీ, రోహిత్‌ శర్మను పిలిపిస్తున్నారు. వారిద్దరికీ భవిష్యత్తు ప్రణాళిక వివరించాలని అనుకుంటున్నారు. ఒకవేళ కోహ్లీనే కెప్టెన్‌గా కొనసాగిస్తే రోహిత్‌శర్మకు తన పాత్రపై స్పష్టతనిస్తారు. లేదా హిట్‌మ్యాన్‌కు పగ్గాలు అప్పగిస్తే కోహ్లీకి తన పాత్ర గురించి చెబుతారు. ఏదేమైనా మరికొన్ని రోజుల్లో వన్డే కెప్టెన్సీ సంగతి తేలిపోనుంది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి