Ind Vs NZ, 1st Test: 296 పరుగులకు న్యూజిలాండ్ ఆలౌట్.. భారత్ ఆధిక్యం ఎంతంటే?

టీమిండియాతో జరుగుతున్న మొదటి టెస్టు మ్యాచ్‌లో న్యూజిలాండ్ 296 పరుగులకు ఆలౌట్ అయింది.

ఇండియా వర్సెస్ న్యూజిలాండ్ మొదటి టెస్టు

భారత్‌తో జరుగుతున్న మొదటి టెస్టులో న్యూజిలాండ్ 296 పరుగులకు ఆలౌట్ అయింది. దీంతో భారత్‌కు 49 పరుగుల ఆధిక్యం లభించింది. వికెట్ నష్టపోకుండా 129 పరుగులతో ఇన్నింగ్స్ ప్రారంభించిన న్యూజిలాండ్ ఇన్నింగ్స్ కాసేపు సాఫీగానే సాగింది. మొదటి వికెట్‌కు 151 పరుగులు జోడించిన అనంతరం ఓపెనర్ విల్ యంగ్‌ను (89: 214 బంతుల్లో, 15 ఫోర్లు) అవుట్ చేసి అశ్విన్ భారత్‌కు మొదటి బ్రేక్ ఇచ్చాడు.

ఆ తర్వాత వచ్చిన బ్యాట్స్‌మెన్ ఎవ్వరూ భారత స్పిన్నర్లను తట్టుకుని నిలబడలేకపోయారు. మరో ఓపెనర్ టామ్ లాథమ్ (95: 282 బంతుల్లో, 10 ఫోర్లు) సెంచరీ ముంగిట అవుటయ్యారు. వీరి తర్వాత పేస్ ఆల్‌రౌండర్ కైల్ జేమీసన్‌దే (23: 75 బంతుల్లో, ఒక ఫోర్) అత్యధిక స్కోరు.

వన్ డౌన్‌లో వచ్చిన కేన్ విలియమ్సన్ (18: 64 బంతుల్లో, రెండు ఫోర్లు), తర్వాత వచ్చిన రాస్ టేలర్ (11: 28 బంతుల్లో, ఒక ఫోర్) కూడా త్వరగా అవుటయ్యారు. కేన్ విలియమ్సన్ వికెట్ ఉమేష్ యాదవ్‌కు దక్కగా, రాస్ టేలర్‌ను అక్షర్ పటేల్ బోల్తా కొట్టించాడు. భారత సంతతి ఆటగాడు రచిన్ రవీంద్రను (13: 23 బంతుల్లో, రెండు ఫోర్లు) రవీంద్ర జడేజా బోల్తా కొట్టించాడు.

పిచ్ స్పిన్‌కు సహకరించడంతో అశ్విన్, జడేజా, అక్షర్ చెలరేగిపోయారు. అక్షర్ పటేల్ ఐదు వికెట్ల ఫీట్ అందుకోగా.. అశ్విన్‌కు మూడు వికెట్లు దక్కాయి. జడేజా, ఉమేష్ యాదవ్ చెరో వికెట్ తీశారు.

అంతకుముందు టీమిండియా 345 పరుగులకు ఆలౌట్ అయింది. శ్రేయస్‌ అయ్యర్‌ (105; 171 బంతుల్లో 13 ఫోర్లు, రెండు సిక్సర్లు) సెంచరీ సాధించడంతో పాటు రవీంద్ర జడేజా (50; 112 బంతుల్లో 6x4) అర్థ సెంచరీ సాధించాడు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి