WPL 2023, RCB-W vs GG-W: మెగ్‌గ్రాత్‌ చితక్కొట్టినా సరిపోని పోరాటం - యూపీపై డీసీదే గెలుపు!
WPL 2023, RCB-W vs GG-W: విమెన్‌ ప్రీమియర్‌ లీగులో దిల్లీ క్యాపిటల్స్‌ వరుసగా రెండో గెలుపు అందుకుంది. 212 పరుగుల లక్ష్య ఛేదనకు దిగిన యూపీ వారియర్జ్‌ను 169/5 కి పరిమితం చేసింది.
WPL 2023, RCB-W vs GG-W:
విమెన్‌ ప్రీమియర్‌ లీగులో దిల్లీ క్యాపిటల్స్‌ వరుసగా రెండో గెలుపు అందుకుంది. తనకు తానే సాటి అని నిరూపించుకుంది. 212 పరుగుల లక్ష్య ఛేదనకు దిగిన యూపీ వారియర్జ్‌ను 169/5 కి పరిమితం చేసింది. ఏకంగా 42 పరుగుల తేడాతో ప్రత్యర్థిని చిత్తు చేసింది. ఆల్‌రౌండర్‌ జెస్‌ జొనాసెన్‌ (42*; 20 బంతుల్లో 3x4, 3x6), (3/43) బ్యాటింగ్‌, బౌలింగ్‌తో ప్రత్యర్థి పతనాన్ని శాసించింది. తాహిలా మెక్‌గ్రాత్‌ (90*; 50 బంతుల్లో 11x4, 4x6) ఒంటరి పోరాటం చేసినా తన జట్టును గెలిపించలేకపోయింది. అంతకు ముందు దిల్లీలో కెప్టెన్‌ మెగ్‌ లానింగ్‌ (70; 42 బంతుల్లో 10x4, 3x6) హాఫ్ సెంచరీ బాదేసింది. జెమీమా రోడ్రిగ్స్‌ (34*; 22 బంతుల్లో 4x4, 0x6) కీలక ఇన్నింగ్స్‌ ఆడింది.
మెక్‌గ్రాత్‌ లేకుంటే..!
కొండంత లక్ష్య ఛేదనకు దిగిన యూపీ వారియర్జ్‌కు శుభారంభం దక్కలేదు. జట్టు స్కోరు 29 వద్దే కెప్టెన్‌ అలీసా హేలీ (24; 17 బంతుల్లో 5x4) వికెట్‌ చేజార్చుకుంది. వరుస బౌండరీలతో విరుచుకుపడ్డ ఆమెను జొనాసెన్‌ ఔట్‌ చేసింది. మరో 2 పరుగులకే కిరన్‌ నవగిరె (2)నూ పెవిలియన్‌కు పంపింది. అదే స్కోరు వద్ద శ్వేత షెరావత్‌ (1)ను మారిజానె కాప్‌ను ఔట్‌ చేసింది. పవర్‌ప్లే ముగిసే సరికి 33/3తో కష్టాల్లో పడ్డ యూపీని దీప్తి శర్మ (12), తాహిలా మెక్‌గ్రాత్‌ ఆదుకున్నారు. 35 బంతుల్లో 40 పరుగుల భాగస్వామ్యం అందించారు.
జట్టు స్కోరు 71 వద్ద దీప్తిని ఔట్‌ చేసిన శిఖా పాండే ఈ జోడీని విడదీసింది. ఈ క్రమంలో యువ క్రికెటర్‌ దేవికా వైద్య (23; 21 బంతుల్లో 2x4) కలిసి మెక్‌గ్రాత్‌ పోరాడింది. ఐదో వికెట్‌కు 40 బంతుల్లో 49 పరుగుల భాగస్వామ్యం నెలకొల్పంది. అయితే 16.5వ బంతికి వైద్యను జొనాసెన్‌ ఔట్‌ చేసింది. అప్పటికి స్కోరు 120/5. దాంతో గెలుపు సమీకరణం 18 బంతుల్లో 92గా మారింది. కాగా బౌండరీలు, సిక్సర్లు బాదేసిన మెగ్‌గ్రాత్‌ ఓటమి అంతరాన్ని బాగా తగ్గించింది. జట్టు స్కోరును 169/5కు చేర్చింది.
దంచికొట్టిన లానింగ్‌!
టాస్‌ ఓడి బ్యాటింగ్‌కు దిగిన దిల్లీ క్యాపిటల్స్‌కు శుభారంభం దక్కింది. తొలి రెండు ఓవర్లు పరిస్థితులకు అలవాటు పడ్డ ఓపెనర్లు మెగ్‌ లానింగ్‌, షెఫాలీ వర్మ (17) ఆ తర్వాత దూకుడు పెంచారు. షెఫాలీ కాస్త కుదురుగా ఆడగా లానింగ్‌ మాత్రం వరుస బౌండరీలతో చెలరేగింది. అందివచ్చిన బంతుల్ని సిక్సర్లుగా మలిచింది. దాంతో పవర్‌ప్లే ముగిసే సరికి డీసీ 62/0తో నిలిచింది. జట్టు స్కోరు 67 వద్ద షెఫాలీనీ మెక్‌గ్రాత్‌ ఔట్‌ చేసినా మారిజానె కాప్‌ (16) ధనాధన్‌ ఇన్నింగ్సే ఆడింది.
దుమ్మురేపిన జొనాసెన్‌
లానింగ్‌ 32 బంతుల్లో హాఫ్ సెంచరీ అందుకోవడంతో 10.4 ఓవర్లకు స్కోరు 100కు చేరుకుంది. 10.2వ బంతికి కాప్‌ను ఎకిల్‌స్టోన్‌ ఔట్‌ చేసింది. సెంచరీ వైపు సాగిన లానింగ్‌ను 11.3 వద్ద రాజేశ్వరీ క్లీన్‌బౌల్డ్‌ చేసింది. అలిస్‌ కాప్సీ (21) కొన్ని షాట్లు ఆడి త్వరగానే ఔటైంది. ఈ క్రమంలో యూపీ బౌలర్లు దిల్లీ వేగానికి అడ్డుకట్ట వేసేందుకు ప్రయత్నించారు. అయితే జెమీమాతో కలిసి జెస్‌ జొనాసన్‌ విధ్వంసం సృష్టించింది. ఆఖరి రెండు ఓవర్లు కళ్లు చెదిరే సిక్సర్లు, బౌండరీలు దంచికొట్టింది. ఐదో వికెట్‌కు 34 బంతుల్లో 67 పరుగులు అజేయ భాగస్వామ్యాన్ని నెలకొల్పింది. జట్టు స్కోరును 211/4కు చేర్చింది.
టాప్ హెడ్ లైన్స్
ట్రెండింగ్ వార్తలు
