IND vs PAK: పాక్‌తో సమరం ఆరంభం టాస్ గెలిచి బౌలింగ్‌కు దిగిన టీమిండియా- జట్టులోకి వచ్చిన గిల్‌

India vs Pakistan: ప్రపంచవ్యాప్తంగా క్రికెట్‌ అభిమానులు అత్యంత ఉత్కంఠగా ఎదురుచూసిన క్షణాలు. టాస్‌ గెలిచిన రోహిత్‌ శర్మ పాకిస్థాన్‌ను బ్యాటింగ్‌కు అహ్వానించాడు.

టాస్ గెలిచి బౌలింగ్‌కు దిగిన టీమిండియా- జట్టులోకి వచ్చిన గిల్‌

ప్రపంచవ్యాప్తంగా క్రికెట్‌ అభిమానులు అత్యంత ఉత్కంఠగా ఎదురుచూసిన క్షణాలు వచ్చేశాయి. గుజరాత్‌లోని అహ్మదాబాద్‌ వేదికగా భారత్‌-పాక్‌ మ్యాచ్‌ ప్రారంభమైంది. ఈ మ్యాచ్‌లో టాస్‌ గెలిచిన రోహిత్‌ శర్మ పాకిస్థాన్‌ను బ్యాటింగ్‌కు అహ్వానించాడు. అనుకున్నట్లుగానే శుభ్‌మన్‌ గిల్‌కు తుది జట్టులోకి రాగా.. ఇషాన్‌ కిషన్‌పై వేటు పడింది. భారత జట్టులో ఇది ఒక్క మార్పే జరిగింది. అశ్విన్‌కు చోటు దక్కుతుందని భావించినా రోహిత్‌.. ఇద్దరు స్పిన్నర్లతో బరిలోకి దిగేందుకే మొగ్గు చూపాడు. వన్డేల్లో శుభమన్ గిల్‌ రికార్డు అద్భుతంగా ఉంది. 24 ఏళ్ల శుభ్‌మన్ గిల్‌ 35 వన్డేల్లో 66.1 బ్యాటింగ్ సగటుతో 1917 పరుగులు చేశాడు. వన్డేల్లో గిల్‌ స్ట్రైక్ రేట్ కూడా 102.84 ఉండడం అతను ఎంత స్థిరంగా రాణిస్తున్నాడో చెబుతుంది. ప్రస్తుతం గిల్‌ ICC వన్డే ర్యాంకింగ్స్‌లో నంబర్-2 ర్యాంక్‌లో ఉన్నాడు.

 

ముచ్చటగా మూడో మ్యాచ్‌లో విజయం సాధించాలని ఇరు జట్లు పట్టుదలగా ఉన్నాయి. ఈ మ్యాచ్‌లో గెలిచి పూర్తి ఆత్మవిశ్వాసంతో ముందుకుసాగాలని దాయాది జట్లు వ్యూహాలు రచిస్తున్నాయి. భీకర ఫామ్‌లో ఉన్న రోహిత్‌ సేనను పాకిస్థాన్‌ అడ్డుకుంటుందా అన్నది ఆసక్తికరంగా మారింది. షహీన్‌ షా అఫ్రీదీ సహా పాక్‌ సీమర్లను రోహిత్‌ బ్యాటింగ్ దళం ఎలా ఎదుర్కొంటుందో అన్న ఉత్కంఠ అభిమానులను ఊపేస్తోంది. 2016లో జరిగిన టీ 20 ప్రపంచకప్ సందర్భంగా భారత గడ్డపై ఇరు జట్లు పోటీ పడ్డాయి. ప్రపంచకప్‌లో ఇప్పటివరకూ పాకిస్థాన్‌తో జరిగిన అన్ని మ్యాచ్‌లను భారత్‌ విజయం సాధించింది. ఇప్పుడూ ఆ రికార్డును మరింత పెంచుకోవాలని టీమిండియా తహతహలాడుతోంది.  ఏడేళ్ల తర్వాత మళ్లీ వన్డే ప్రపంచకప్‌లో భారత్‌-పాక్‌ పోటీ పడుతుండడంతో సర్వత్రా ఆసక్తి నెలకొంది.

 

బ్యాటింగ్ విభాగంలో సారథి రోహిత్‌, విరాట్‌ కోహ్లీ, KL రాహుల్‌ మంచి ఫామ్‌లో ఉండడం సహా బౌలింగ్‌ విభాగంలో బుమ్రా మెరుపులు భారత్‌ను ఈ మ్యాచ్‌లో ఫేవరేట్‌గా నిలిపాయి. 1992 నుంచి ఇప్పటివరకూ ఇరు జట్లు ఏడుసార్లు తలపడగా అన్నిసార్లూ భారత్‌ విజయం సాధించింది. బ్యాటింగ్‌, బౌలింగ్‌ పరంగా ఈ మ్యాచ్‌లో భారత్‌ జట్టు ఫేవరేట్‌గా కనిపిస్తోంది. బౌలింగ్‌ విభాగంలోనూ భారత్‌ జట్టు పటిష్ఠంగానే కనిపిస్తోంది. స్టార్‌ బౌలర్ బుమ్రా ఫామ్‌లో ఉండగా స్పిన్నర్లు జడేజా, కుల్‌దీప్‌ యాదవ్‌ కూడా రాణిస్తున్నారు.

 

భారత జట్టు:

రోహిత్ శర్మ (కెప్టెన్‌), హార్దిక్ పాండ్యా, శుభమన్ గిల్, విరాట్ కోహ్లీ, శ్రేయాస్ అయ్యర్, కెఎల్ రాహుల్, రవీంద్ర జడేజా, శార్దూల్ ఠాకూర్, జస్ప్రీత్ బుమ్రా, మహ్మద్ సిరాజ్, కుల్దీప్ యాదవ్

 

పాకిస్థాన్ జట్టు:

బాబర్ ఆజం (కెప్టెన్‌), షాదాబ్ ఖాన్, ఫఖర్ జమాన్, ఇమామ్-ఉల్-హక్, అబ్దుల్లా షఫీక్, మహ్మద్ రిజ్వాన్, సౌద్ షకీల్, ఇఫ్తికర్ అహ్మద్, సల్మాన్ అలీ అఘా, మహ్మద్ నవాజ్, ఉసామా మీర్, హరీస్ రవూఫ్, హసన్ అలీ, షాహీన్ అఫ్రిది , మహ్మద్ వాసిం.