India vs Nepal: టీమ్ఇండియా.. ఇదేం ఫీల్డింగ్‌! 3 క్యాచులు డ్రాప్‌ - 28 ఓవర్లకు నేపాల్‌ 123/4
India vs Nepal: ఆసియా కప్‌-2023లో నేపాల్‌ ఆకట్టుకుంటోంది. చక్కని పోరాట పటిమను కనబరుస్తోంది. పల్లెకెలె వేదికగా టీమ్‌ఇండియాతో జరుగుతున్న రెండో మ్యాచులో తమదైన బ్యాటింగ్‌తో అదరగొడుతోంది.
India vs Nepal:
ఆసియా కప్‌-2023లో నేపాల్‌ ఆకట్టుకుంటోంది. చక్కని పోరాట పటిమను కనబరుస్తోంది. పల్లెకెలె వేదికగా టీమ్‌ఇండియాతో జరుగుతున్న రెండో మ్యాచులో తమదైన బ్యాటింగ్‌తో అదరగొడుతోంది. 28 ఓవర్లు ముగిసే సరికి 4 వికెట్ల నష్టానికి 123 పరుగులు చేసింది. ఓపెనర్‌ ఆసిఫ్ షేక్‌ (50*; 88 బంతుల్లో 7x4) తిరుగులేని హాఫ్ సెంచరీ సాధించాడు. గుల్షన్ ఝా (12; 23 బంతుల్లో 1x4) అతడికి తోడుగా ఉన్నాడు. మరో ఓపెనర్‌ కుశాల్‌ భూర్తెల్‌ (38; 25 బంతుల్లో 3x4, 2x6) ఆకట్టుకున్నాడు. రవీంద్ర జడేజా 3 వికెట్లు తీశాడు. శార్దూల్‌ ఠాకూర్‌కు ఒక వికెట్‌ దక్కింది. హిట్‌మ్యాన్‌ సేన తన స్థాయికి తగిన బౌలింగ్‌, ఫీల్డింగ్‌ చేయడం లేదు.
ఆరంభం.. ప్లాఫ్!
ఆకాశం నిండా మబ్బులు.. చల్లని వాతావరణం.. టాస్‌ గెలిచిన ఫీల్డింగ్‌! ఇన్ని అనకూలతల మధ్య టీమ్ఇండియా బౌలింగ్‌ ఎలా ఉండాలి? చురకత్తుల్లాంటి బంతుల్ని స్వింగ్ చేస్తుంటే ప్రత్యర్థి వణికిపోవాలి! కానీ అలా జరగలేదు. నేపాల్‌ వంటి చిన్న జట్టు పైనా ఆరంభంలో వికెట్లు తీయడంలో హిట్‌మ్యాన్‌ సేన విఫలమైంది. వరుసగా మూడు క్యాచుల్ని.. అదీ నాలుగు ఓవర్లలోపే నేల పాలు చేసింది. దాంతో నేపాలీలకు ఊహించని.. అద్భుతమైన ఆరంభం లభించింది.
ఆసిఫ్.. హాఫ్ సెంచరీ!
తమకు దొరికిన జీవనదానాలను నేపాల్‌ చక్కగా వినియోగించుకుంది. ఓపెనర్లు కుశాల్‌ భూర్తెల్‌, ఆసిఫ్ షేక్‌ విజృంభించడంతో 53 బంతుల్లోనే 50 పరుగుల మైలురాయి చేరుకుంది. వీరిద్దరూ టీమ్ఇండియా బౌలర్లను ఆత్మవిశ్వాసంతో ఎదుర్కొన్నారు. పోరాడితే పోయేదీమీ లేదన్న చందంగా దూకుడగా ఆడారు. తొలి వికెట్‌కు 59 బంతుల్లో 65 పరుగుల భాగస్వామ్యం నెలకొల్పారు. దాంతో పదో ఓవర్‌ వరకు భారత్‌ వికెట్‌ కోసం ఎదురు చూసింది. మొత్తానికి 9.5వ బంతికి కుశాల్‌ను శార్దూల్‌ ఔట్‌ చేశాడు. ఆ తర్వాత రవీంద్ర జడేజా విజృంభించాడు. వరుసగా భీమ్‌ షాక్రి (7), రోహిత్‌ పౌడెల్‌ (5), కుశాల్‌ (2)ను ఔట్‌ చేశాడు.
3 Dropped Catches 😱 #IndvsNep pic.twitter.com/LQOnqv3yEN
— Susanta Sahoo (@ugosus) September 4, 2023
డ్రాప్‌ క్యాచులు
ఇన్నింగ్స్‌ ఆరో బంతికే టీమ్‌ఇండియాకు అవకాశం దొరికింది. షమి వేసిన బంతిని భూర్తెల్‌ ఆఫ్‌సైడ్‌ ఆడబోయాడు. బ్యాటు అంచుకు తగిలిన బంతి స్లిప్‌లోకి వెళ్లింది. దానిని అందుకోవడంలో శ్రేయస్‌ అయ్యర్‌ విఫలమయ్యాడు. ఆ తర్వాత ఒక సిట్టర్‌ను విరాట్‌ కోహ్లీ మిస్‌ చేశాడు. మహ్మద్‌ సిరాజ్ వేసిన 1.1వ బంతిని షేక్‌ ఆడాడు. ఆఫ్‌సైడ్‌ ఆఫ్‌స్టంప్‌ మీదుగా వచ్చిన బంతిని స్ట్రెయిట్‌గా ఆడబోయాడు. గాల్లోకి లేచిన బంతి షార్ట్‌పిచ్‌ వద్ద కోహ్లీ వద్దకు వెళ్లింది. అతడి చేతుల్లోంచి జారిపోయింది. మహ్మద్‌ షమి వేసిన 4.2వ బంతికీ భూర్తెల్‌కు మరో లైఫ్‌ లభించింది. తన వద్దకే వచ్చిన బంతిని కీపర్‌ ఇషాన్‌ కిషన్ లెఫ్ట్‌వైప్‌ దూకి మిస్‌ చేశాడు.
భారత జట్టు: రోహిత్‌ శర్మ, శుభ్‌మన్‌ గిల్‌, విరాట్‌ కోహ్లీ, శ్రేయస్‌ అయ్యర్‌, ఇషాన్‌ కిషన్, హార్దిక్‌ పాండ్య, రవీంద్ర జడేజా, శార్దూల్‌ ఠాకూర్‌, కుల్‌దీప్‌ యాదవ్‌, మహ్మద్‌ షహి, మహ్మద్‌ సిరాజ్
నేపాల్‌ జట్టు: కుశాల్‌ భూర్తెల్‌, ఆసిఫ్ షేక్‌, రోహిత్‌ పౌడెల్‌, భీమ్‌ షక్రి, సోంపాల్‌ కామి, గుల్షన్ ఝా, దీపేంద్ర సింగ్‌, కుశాల్‌ మల్లా, సందీప్‌ లామిచాన్‌, కరన్‌ కేసీ, లలిత్‌ రాజ్‌భాన్షి
టాప్ హెడ్ లైన్స్
ట్రెండింగ్ వార్తలు
