Ram Navami 2026 Date : శ్రీరామ నవమి మార్చి 26 or 27? రాములోరి కళ్యాణం ఎప్పుడు?

Sri Rama Navami Date 2026: తెలుగు నూతన సంవత్సరం ప్రారంభమైనప్పటి నుంచి తొమ్మిదో రోజు వచ్చే తిథి నవమి.. ఈ రోజు శ్రీరాముడి కళ్యాణం జరుపుకుంటారు.. ఈ ఏడాది తిథి విషయంలో గందరగోళం ఎందుకొచ్చింది?  

Ram Navami 2026 Date March 26 or 27 Check Correct Tithi

Source : https://in.pinterest.com/pin/629237379227356195/

Sri Rama Navami 2026

రామాయ రామభద్రాయ రామచంద్రాయ వేధసే
రఘునాథాయ నాథాయ సీతాయాః పతయే నమః

2026లో శ్రీరామ నవమి విషయంలో గందరగోళం నెలకొంది. ఈ ఏడాది నవమి తిథి రెండు రోజులు ఉండడంతో ఏ రోజు కళ్యాణం జరుపుకోవాలి అనే సందిగ్ధం నెలకొంది. 

గంటల పంచాంగం ప్రకారం..

నవమి తిథి ప్రారంభం - మార్చి 26 గురువారం మధ్యాహ్నం 2 గంటల 27 నిముషాలకు

నవమి తిథి ముగింపు - మార్చి 27 శుక్రవారం మధ్యాహ్నం 12 గంటల 32 నిముషాలు

పునర్వసు నక్షత్రం - మార్చి 26 రాత్రి 7 గంటల 3 నిముషాల నుంచి... మార్చి 27 శుక్రవారం సాయంత్రం 5 గంటల 44 నిముషాల వరకు

సాధారణంగా పండుగలు నిర్వహించుకునేందుకు సూర్యోదయం తిథిని పరిగణలోకి తీసుకుంటారు...ఈ లెక్కన నవమి తిథి మార్చి 27 శుక్రవారం ఉంది, సీతారాముల కళ్యాణం కూడా అభిజిత్ లగ్నం మధ్యాహ్నం సమయంలో ఉంటుంది అందుకే ఎలాంటి సందేహం లేకుండా మార్చి 27 శుక్రవారమే శ్రీరామకళ్యాణం అని పంచాంగకర్తలు చెబుతున్నారు.

సీతారాముల కళ్యాణానికి మధ్యాహ్నం అభిజిత్ లగ్నం ప్రధానం... రాముడు జన్మించిన సమయం మధ్యాహ్నం 12 నుంచి 2 గంటల మధ్యలో ఉందని చెబుతారు. కచ్చితమైన జన్మ క్షణం సుమారు 12 గంటల 22 నిముషాలు. మధ్యాహ్న సమయంలోనే శ్రీరాముడు పునర్వసు నక్షత్రం, కర్కాటక లగ్నంలో జన్మించాడని పురాణాలు చెబుతున్నాయి. అందుకే పూజ, అభిషేకం, హోం, సీతారాముల కళ్యాణం..అభిజిత్ ముహూర్తంలో నిర్వహిస్తారు.  ఈ లెక్కన 12 గంటల సమయంలో నవమి ఉన్న రోజు కూడా మార్చి 27 శుక్రవారమే. అందుకే సీతారాముల కళ్యాణం, పూజ, హోమంకి అత్యుత్తమం మార్చి 27 శుక్రవారం. స్థానిక సంప్రదాయాలు, స్థానిక ఆలయాలు ఆధారంగా కూడా వీటిలో మార్పులుంటాయి. 
 
ధర్మ బద్ధ జీవనానికి నిర్వచనం శ్రీరాముడు. మనిషిగా ఎలా బ్రతకాలో ఆదర్శవంతమైన జీవితాన్ని గడిపి చూపించిన పురుషోత్తముడు రామచంద్రుడు. అందుకే 'రామస్య ఆయన రామాయణం' అని అంటారు. అయనము అంటే నడక, రామాయణం అంటే రాముడి నడక అని అర్థం. శ్రీ మహావిష్ణువు దశావతారాల్లో రామావతారంలో మినహా మిగిలిన ఏ అవతారంలోనూ అయనము అనే మాట వినియోగించలేదు. ఎందుకంటే పరిపూర్ణమైన మానవుడి అవతారం రాముడు. అందుకే కృష్ణావతారంలో శ్రీ కృష్ణుడు తానే నారాయణుడిని అని చెప్పుకున్నాడు కానీ రామావతారంలో రాముడు తానే దేవుడిని అని ఎక్కడా చెప్పలేదు. రాముడు అడుగు తీసి అడుగేస్తే ధర్మం..ఆయన ప్రతి అడుగు సత్యం..రాముడి కదలికకు అంత ప్రధాన్యం.. అందుకే  “రామో విగ్రహవాన్ ధర్మః ” అన్నారు .

శ్రీరామ నవమి రోజు రాముడిని పూజించడం భక్తులకు ఆనందం, శాంతిని అందిస్తుంది. ఈ పండుగను దేశవ్యాప్తంగా ముఖ్యంగా ఆయన జన్మించిన అయోధ్యలో, రామయ్య కొలువైన భద్రాద్రిలో ఘనంగా జరుపుకుంటారు. దేశవ్యాప్తంగా ఉన్న ప్రతి రామాలయంలోనూ నవమి వేడుకలు ఘనంగా జరుగుతాయి.  

 శ్రీ రాఘవం దశరథాత్మజ మప్రమేయం
సీతాపతిం రఘుకులాన్వయ రత్న దీపం
ఆజానుబాహుం అరవిందదళాయతాక్షం
రామం నిశాచర వినాశకరం నమామి

గమనిక: ఇక్కడ అందించిన సమాచారం కేవలం నమ్మకాలపై ఆధారపడి ఉంటుంది. పండితులు చెప్పిన వివరాలు, ఆధ్యాత్మిక గ్రంధాల నుంచి సేకరించి అందించిన వివరాలు ఇవి. వీటిని ఎంతవరకూ పరిగణలోకి తీసుకోవాలన్నది పూర్తిగా మీ వ్యక్తిగతం. ఏదైనా సమాచారం లేదా నమ్మకాన్ని అమలు చేయడానికి ముందు సంబంధిత నిపుణుడిని సంప్రదించండి.