Hyderabad Politics : చంపుతారని భయమేస్తోందన్న అక్బరుద్దీన్ - రెచ్చగొడుతున్నారని రాజాసింగ్ ఫైర్ !

Akbaruddin : అక్బరుద్దీన్, రాజాసింగ్ మధ్య రాజకీయ విమర్శలు పెరుగుతున్నాయి. తమ సోదరుల్ని చంపేస్తారేమోనని అక్బరుద్దీన్ అంటే దానికి రాజాసింగ్ గట్టి కౌంటర్ ఇచ్చారు.

అక్బరుద్దీన్ వర్సెస్ రాజాసింగ్

Akbaruddin Vs Raja Singh : ఎంఐఎం కీలక నేత, చాంద్రాయణ గుట్ట ఎమ్మెల్యే అక్బరుద్దీన్ ఒవైసీ సంచలన వ్యాఖ్యలు చేశారు. దేశంలో పరిస్థితులు ప్రస్తుతం దారుణంగా ఉన్నాయన్నారు. మా ఇద్దరు బ్రదర్స్‌ను జైలుకు పంపాలని చూస్తున్నారని ఆరోపించారు. జైలులో వైద్యం పేరుతో స్లో పాయిజన్ ఇచ్చి.. లేదా గన్‌తో కాల్చి మమ్మల్ని హత్య చేస్తారనిపిస్తోందన్నారు. అయితే తాము ఇలాంటి వాటికి భయపడబోమన్నారు. హైదరాబాద్‌లో తాము చాలా బలంగా ఉన్నామని.. అందుకే మమ్మల్ని ఓడించేందుకు ప్రయత్నిస్తున్నారని తెలిపారు. ఎవరు ఎంత ప్రయత్నించినా గెలిచేది తామే అని అక్బరుద్దీన్ దీమా వ్యక్తం చేశారు. అయితే ఇటీవల అసదుద్దీన్ మాట్లాడుతూ.. కొన్ని దుష్టశక్తులు చంపుతామని బెదిరిస్తున్నారని.. కానీ తాను అంత ఈజీగా వెళ్లిపోయేవాడిని కాదన్నారు.                       

తమను చంపేందుకు కుట్ర జరుగుతోందన్న అక్బరుద్దీన్‌ వ్యాఖ్యలకు బీజేపీ ఎమ్మెల్యే రాజాసింగ్‌ కౌంటర్ ఇచ్చారు. ముస్లింలకు రెచ్చగొట్టేలా అక్బరుద్దీన్ ప్రచారం ఉందని మండిపడ్డారాయన. ఏ పార్టీ అధికారంలో ఉంటే ఆ పార్టీ నేతల కాళ్లు పట్టుకునే చరిత్ర ఎంఐఎం పార్టీదన్నారు. భవిష్యత్‌లో తెలంగాణలో బీజేపీ ప్రభుత్వం వస్తుందని.. అప్పుడు ఓవైసీ బ్రదర్స్‌కు ఎక్కడికి పంపించాలనేది డిసైడ్ చేస్తామని హాట్ కామెంట్స్ చేశారు .                                       

ఎన్నికలు ఎప్పుడు వచ్చినా ప్రచారంలో అక్బరుద్దీన్ ఓవైసీ ఇలాంటి వివాదాస్పద వ్యాఖ్యలు చేస్తూనే ఉంటారు. ఈ సారి హైదరాబాద్ లో బీజేపీ నుంచి గట్ిట పోటీ ఉంటుందని ప్రచారం జరుగుతోంది. భారతీయ జనతా పార్టీ ఈ సారి సంప్రదాయ రాజకీయ నాయకుల్ని కాకుండా ఓ మహిళా అభ్యర్థిని నిలబెట్టింది. కొంపెల్ల మాధవీలత అభ్యర్థిగా ప్రకటించినప్పటి నుండి  పాతబస్తీలోనే ఎక్కువగా ప్రచారం చేస్తున్నారు. ఆమె హిందూత్వ స్టైల్ ప్రసంగాలు .. హిందూ ఓట్లను ఏకం చేస్తుందన్న అభిప్రాయం వినిపిస్తోంది. మరో వైపు బోగస్ ఓట్ల అంశం కూడా తెరపైకి వచ్చారు.                                  

హైదరాబాద్ పార్లమెంట్ నియోజకవర్గంలో ఆరు  లక్షల బోగస్ ఓట్లు ఉంటాయన్న ఆరోపణలు వస్తున్నాయి. ఈ సారి బోగస్ ఓట్లు వేయకుండా కట్టడి చేస్తే.. మజ్లిస్ కు ఇబ్బంది అయ్యే అవకాశం ఉందని చెబుతున్నారు. అదే సమయంలో ఓటింగ్ కూడా చాలా  తక్కువగా నమోదవుతుంది. అసెంబ్లీ ఎన్నికల్లో పలు నియోజకవర్గాల్లో హిందూ ఓటర్లు ఓటు హక్కు వినియోగించుకునేందుకు పెద్దగా బయటకు రారు. కానీ వారందరూ వచ్చి ఓటు  హక్కు వినియోగించుకునేలా మాధవీలత ప్రయత్నం చేస్తున్నారు. ప్రధాని మోదీ కూడా మాధవీలతను ఇటీవల ఓ కార్యక్రమంలో మాట్లాడినందుకు అభినందించారు. ప్రత్యేక గుర్తింపు తెచ్చుకోవడంతో ఈ సారి ఓవైసీకి గట్టి పోటీ ఉంటుందని అనుకుంటున్న సమయంలో అక్బరుద్దీన్ వివాదాస్పద వ్యాఖ్యలతో రాజకీయం ప్రారంభించారు.