Balakrihsna : హిందూపురం జిల్లా కోసం సీఎం జగన్‌ను కలుస్తా - బాలకృష్ణ కీలక ప్రకటన !

హిందూపురం జిల్లా కోసం అవసరమైతే సీఎం జగన్‌ను కలుస్తానని ఎమ్మెల్యే బాలకృష్ణ ప్రకటించారు. పేరు ఏదయినా పర్వాలేదు కానీ హిందూపురం మాత్రం జిల్లా కేంద్రంగా ఉండాలని ఆయన డిమాండ్ చేస్తున్నారు.

హిందూపురాన్ని జిల్లా కేంద్రంగా ప్రకటించాలని కలెక్టర్‌కు బాలకృష్ణ వినతిపత్రం

హిందూపురం జిల్లా కోసం నందమూరి బాలకృష్ణ పోరాటం ముమ్మరం చేశారు. శుక్రవారం మౌనదీక్ష చేసిన ఆయన శనివారం హిందూపురం నుంచి భారీ ర్యాలీగా అనంతపురం జిల్లాకు వెళ్లి కలెక్టర్‌కు వినతి పత్రం ఇచ్చారు. ఎట్టి పరిస్థితుల్లోనూ హిందూపురాన్ని జిల్లా కేంద్రంగా ప్రకటించాలని బాలకృష్ణ డిమాండ్ చేశారు. అందుకోసం తాను దేనికైనా సిద్ధమేనన్నారు. మేనిఫెస్టోలో పెట్టారు కాబట్టి జిల్లా కేంద్రంగా ప్రకటించాల్సి ఉందన్నారు. జిల్లాకు ఏ పేరు అయినా పెట్టుకోవాలని.. తమకు ఎలాంటి అభ్యంతరమూ లేదన్నారు. 

హిందూపురం జిల్లా విషయంలో  వైఎస్ఆర్‌సీపీ కార్యాచరణ ఏ విధంగా ఉంటుందో దాన్ని బట్టి తమ కార్యాచరణ కూడా ఉంటుందని.. అవసరమైతే ముఖ్యమంత్రి జగన్‌ను కూడా కలుస్తామని బాలకృష్ణ ప్రకటించారు. జిల్లా కేంద్రం కోసం దేనికైనా సిద్ధమేనన్నారు.  హుటాహుటినా రాత్రికే రాత్రి జిల్లాల ఏర్పాటు చేయడం సమంజసం కాదని పేర్కొన్నారు.  హిందూపురం పట్టణంలో అన్ని వసతులు ఉన్నాయని హిందూపురాన్ని కాదని మరో ప్రాంతాన్ని జిల్లా కేంద్రంగా ఏర్పాటు చేస్తే సహించబోమని అన్నారు. ఇంతకు ముందు ప్రకటించిన విధంగా రాజీనామాకు సిద్ధంగా ఉన్నామని ప్రకటించారు. ప్రజల న్యాయమైన డిమాండ్‌ను సాధించేవరకు ఎంతటి పోరాటాలకైనా రెడీగా ఉన్నామని స్పష్టం చేశారు.

ప్రభుత్వం కొత్త జిల్లాల ప్రకటన చేసిన తర్వాత రాష్ట్రంలో పలుచోట్ల ఆందోళనలు ప్రారంభమయ్యాయి. తమ ప్రాంతానికి జిల్లా కేంద్రం కావాలని.. లేకపోతే తమ ప్రాంతాన్ని ఫలానా జిల్లాలోనే ఉంచాలని డిమాండ్ చేస్తూ నిరసనకు దిగుతున్నారు. కొన్ని చోట్ల జిల్లా కేంద్రానికి దూరంగా ఉండటం... మరికొన్ని చోట్ల జిల్లాలు మారితే ఉపాధి అవకాశాలు దెబ్బతినే ప్రమాదం ఉండటంతో ఎక్కువ మంది వ్యతిరేకత చూపిస్తున్నారు. అనంతపురం జిల్లా హిందూపురం జిల్లా డిమాండ్ ఎప్పటి నుండో ఉంది. ప్రభుత్వాలు ఎప్పుడు జిల్లాల ప్రకటన చేసినా హిందూపురం జిల్లా ఉంటుందనుకున్నారు. 

ఇప్పటికే వైఎస్ఆర్‌సీపీ మినహా అన్ని రాజకీయ పార్టీలు, ప్రజాసంఘాలు నందమూరి బాలకృష్ణ నేతృత్వంలో జరిగిన అఖిలపక్ష సమావేశానికి హాజరయ్యాయి. పార్టీలకు అతీతంగా జిల్లా కోసం ఉద్యమించాలని నిర్ణయించారు. ప్రభుత్వం నెల రోజుల అభిప్రాయాలు తీసుకున్న తర్వాత ఫైనల్ నోటిఫికేషన్ ఇస్తుంది. అప్పుడు కూడా హిందూపురం జిల్లా కేంద్రంగా మార్చకపోతే తదుపరి కార్యాచరణను నందమూరి బాలకృష్ణ చేపట్టే అవకాశం ఉంది.