Dog Bite Risks : కుక్క కరిస్తే ఎన్ని గంటల్లోపు ఇంజెక్షన్ వేయించుకోవాలి? లేకుంటే రేబిస్​తో పాటు ఆ వ్యాధులు తప్పవు

Dog Bite : కుక్క కరిస్తే రేబిస్, టెటనస్ వంటి ఇతర ఇన్ఫెక్షన్స్​ వచ్చే ప్రమాదం ఉంది. అయితే మరి వాటిని నివారించడానికి ఎన్ని గంటల్లోపు ఇంజెక్షన్ చేయించుకోవాలో.. ఎలాంటి జాగ్రత్తలు తీసుకోవాలో చూద్దాం.

కుక్క కరిస్తే ఈ ప్రమాదాలు తప్పవు

కుక్క కరిచినప్పుడు వచ్చే అతి పెద్ద ప్రమాదకరమైన సమస్య రేబిస్. ఈ వైరస్ మెదడు, నాడీ వ్యవస్థపై దాడి చేస్తుంది. సమయానికి ఇంజెక్షన్లు తీసుకోకపోతే ఇది ప్రాణాంతకం అవుతుంది.

కుక్క దంతాలు, గోళ్ల ద్వారా గాయమైతే.. వాటిపై ఉన్న బ్యాక్టీరియా శరీరంలోకి ప్రవేశించి టెటనస్​ను కలిగిస్తుంది. ఇది కండరాలు బిగుసుకుపోయేలా చేసి.. శ్వాస తీసుకోవడంలో ఇబ్బంది కలిగిస్తుంది.

కుక్క నోటిలో ఉండే బాక్టీరియా గాయంలోకి వెళ్లి.. ఎర్రని వాపు, చీముకు కారణమవుతుంది. చాలాసార్లు ఈ ఇన్ఫెక్షన్ శరీరంలోకి వ్యాప్తి చెంది సెప్సిస్ ప్రమాదాన్ని కూడా కలిగిస్తుంది.

కుక్క కరిచిన తర్వాత కొందరికి చర్మంపై అలెర్జీ ప్రతిచర్యలు రావచ్చు. గాయం చుట్టూ దురద, ఎర్రటి దద్దుర్లు, తీవ్రమైన మంట లక్షణాలు ఉంటాయి.

ఈ సమస్యలు రాకుండా ఉండాలంటే.. కుక్క కరిచిన 24 గంటలలోపు రేబిస్ మొదటి ఇంజక్షన్ వేయించుకోవాలంటున్నారు వైద్యులు. ఆలస్యం చేస్తే వైరస్ శరీరంలోకి వ్యాప్తి చెందుతుంది.

రేబిస్ రాకుండా ఉండాలంటే.. 4 నుంచి 5 ఇంజెక్షన్లు వేస్తారు. శరీరము వైరస్​తో పోరాడే సామర్థ్యాన్ని పెంచుకోవడం కోసం వేర్వేరు రోజుల్లో ఇస్తారు.

కుక్క కరిస్తే వెంటనే గాయాన్ని సబ్బు, నీటితో బాగా కడగాలి. ఇంటి చికిత్సలకు బదులుగా వెంటనే డాక్టర్ దగ్గరకు వెళ్లి ఇంజెక్షన్ చేయించుకోవాలి.