Sumanth Second Marriage: అక్కినేని ఫ్యామిలీ హీరో రెండో పెళ్లి!

Sumanth

అక్కినేని మేనల్లుడు సుమంత్ మరో పెళ్లి చేసుకుంటున్నాడా..? అనే అవుననే సమాధానాలు వినిపిస్తున్నాయి. దాదాపు పదిహేనేళ్లుగా ఒంటరి జీవితం గడుపుతున్నాడు సుమంత్. 'ప్రేమ కథ' సినిమాతో టాలీవుడ్ లో ఎంట్రీ ఇచ్చిన ఈ నటుడు 'సత్యం' సినిమాతో హిట్ అందుకున్నాడు.

ఆ తరువాత 'గోదావరి', 'గోల్కొండ హైస్కూల్' లాంటి సినిమాలు హీరోగా అతడికి మంచి గుర్తింపును తీసుకొచ్చాయి. కానీ ఆ తరువాత వరుస ప్లాప్ లు రావడంతో డీలా పడ్డాడు. ఈ మధ్యకాలంలో మళ్లీ కొన్ని సినిమాలు చేశాడు. కానీ ఏదీ కలిసిరాలేదు. మొన్నా మధ్య చేసిన 'మళ్లీ రావా' సినిమా మాత్రం పర్వాలేదనిపించింది.

ఇదిలా ఉండగా.. ఆయన వ్యక్తిగత జీవితం గురించి అందరికీ తెలిసిందే. 2004లో హీరోయిన్ కీర్తిరెడ్డిని ప్రేమించి పెళ్లి చేసుకున్నాడు సుమంత్. అయితే పెళ్లైన రెండేళ్లకే ఈ జంట విడిపోయింది. కీర్తి రెండో పెళ్లి చేసుకొని సెటిల్ అయిపోయింది. కానీ సుమంత్ మాత్రం రెండో పెళ్లి ఆలోచన చేయలేదు. అయితే ఇన్నాళ్లకు ఆయన పెళ్లిపై ఇంట్రెస్ట్ చూపిస్తున్నారని తెలుస్తోంది.

త్వరలోనే రెండో పెళ్లి చేసుకోబోతున్నట్లు వార్తలు వినిపిస్తున్నాయి. దీనికి సంబంధించి ఓ పెళ్లి కార్డు సోషల్ మీడియాలో చక్కర్లు కొడుతోంది. సుమంత్ రెండో పెళ్లి చేసుకోబోయే అమ్మాయి పేరు పవిత్ర అని తెలుస్తోంది. ఈ పెళ్లి ఏర్పాట్లు చాలా సైలెంట్ గా జరుగుతున్నాయని సమాచారం. అతి తక్కువ మంది సన్నిహితుల సమక్షంలో సుమంత్ రెండో పెళ్లి చేసుకోబోతున్నట్లు తెలుస్తోంది.