Pakistan Hindu Names: లాహోర్లో కృష్ణనగర్, లక్ష్మినగర్ కాలనీలు- వింత కాదు నిజమే- పాక్ ప్రభుత్వానికి తప్పట్లేదు!
Pakistan Lakshmi Chowk: విభజన తర్వాత పాకిస్థాన్లో అనేక ప్రాంతాల పేర్లను ఇస్లామీకరణ చేశారు. హిందూ పేర్లను తొలగించి ముస్లిం పేర్లను పెట్టారు. ఇప్పుడు మళ్లీ పాత పేర్లు పెడుతున్నారు. ఎందుకంటే ?
Pakistan Renaming Lahore Streets to Hindu Sikh Names: పాకిస్థాన్ సాంస్కృతిక రాజధాని లాహోర్లో గత కొద్దిరోజులుగా ఒక ఆసక్తికరమైన మార్పు చోటుచేసుకుంటోంది. దశాబ్దాల క్రితం ఇస్లామిక్ పేర్లతో మార్చిన వీధులు, కూడళ్లు మళ్ళీ తమ పాత హిందూ, సిక్కు , క్రైస్తవ పేర్లను తిరిగి పెడుతున్నారు. విభజనకు ముందు ఉన్న చారిత్రక మూలాలను వెలికితీసే ఈ వినూత్న ప్రయత్నం ఇప్పుడు అంతర్జాతీయ స్థాయిలో హాట్ టాపిక్ అయ్యింది.
విభజన తర్వాత పాకిస్థాన్లో అనేక ప్రాంతాల పేర్లను ఇస్లామీకరణ చేశారు. హిందూ, సిక్కు సంస్కృతిని ప్రతిబింబించే పేర్లను తొలగించి ముస్లిం వీరులు లేదా ఇస్లామిక్ పేర్లను పెట్టారు. అయితే, సుమారు 79 ఏళ్ల తర్వాత లాహోర్ తన అసలు గుర్తింపును మళ్ళీ వెతుక్కుంటోంది. పంజాబ్ ముఖ్యమంత్రి మర్యమ్ నవాజ్ నేతృత్వంలోని ప్రభుత్వం, లాహోర్ హెరిటేజ్ రివైవల్ ప్రాజెక్ట్ కింద పాత పేర్లను పునరుద్ధరించాలని నిర్ణయించింది.
ఏయే పేర్లు మారుతున్నాయి?
గత రెండు నెలల్లో సుమారు 9 ప్రధాన ప్రాంతాలకు పాత పేర్లను అధికారికంగా ఖరారు చేశారు. ఇస్లాంపురా ఇప్పుడు మళ్ళీ కృష్ణ నగర్ అయ్యింది. సున్నత్ నగర్ పేరును సంత్ నగర్ గా మార్చారు. ముస్తఫాబాద్ మళ్ళీ తన పాత పేరు ధర్మపుర ను దక్కించుకుంది. లక్ష్మీ చౌక్.. గతంలో దీనిని మౌలానా జాఫర్ అలీ ఖాన్ చౌక్ అని పిలిచేవారు, ఇప్పుడు అధికారికంగా లక్ష్మీ చౌక్ అని పిలుస్తున్నారు. జైన్ మందిర్ చౌక్ ను బాబ్రీ మసీదు చౌక్ గా మార్చారు. ఆ పేరును తొలగించి, మళ్ళీ జైన్ మందిర్ చౌక్ అని నామకరణం చేశారు. బ్రిటిష్ కాలం నాటి క్వీన్స్ రోడ్, లారెన్స్ రోడ్ వంటివి కూడా మళ్ళీ పాత పేర్లతోనే పిలుస్తున్నారు.
ఎందుకీ మార్పు? నవాజ్ షరీఫ్ వ్యూహం ఏంటి?
ఈ మార్పు వెనుక మాజీ ప్రధాని నవాజ్ షరీఫ్ ఆలోచన ప్రధానంగా కనిపిస్తోంది. దీనికి కొన్ని బలమైన కారణాలు ఉన్నాయి: లాహోర్ ఒకప్పుడు హిందూ, సిక్కు, ముస్లిం సంస్కృతుల సమ్మేళనం. ఆ వైభవాన్ని మళ్ళీ తీసుకురావడం ద్వారా లాహోర్ అసలు గుర్తింపును కాపాడాలని షరీఫ్ భావిస్తున్నారు. పాకిస్థాన్ను ఒక ఉదారవాద , మైనారిటీల పట్ల గౌరవం ఉన్న దేశంగా ప్రపంచానికి చూపించుకోవడం కోసం అలాగే.. ప్రభుత్వం అధికారికంగా పేర్లు మార్చినా, లాహోర్ ప్రజలు వాడుకలో ఇప్పటికీ లక్ష్మీ చౌక్ , కృష్ణ నగర్ వంటి పాత పేర్లనే వాడుతున్నారు. అందుకే ప్రజల ఆకాంక్షలకు అనుగుణంగా ఈ నిర్ణయం తీసుకున్నారు.
🚨5 places in Lahore, Pakistan renamed from Islamic to original Hindu names in 2 months.
— Kreately.in (@KreatelyMedia) May 18, 2026
Islampura🔸Krishnanagar
Sunnat Nagar🔸Santnagar
Maulana Zafar Chowk🔸Lakshmi Chowk
Babri Masjid Chowk🔸Jain Mandir Chowk
Mustafabad🔸Dharmapura
भारत का अब्दुल आज सो नहीं पाएगा 😂 pic.twitter.com/nzvnQzvoxF
సాంస్కృతిక వారధి.. క్రీడల పునరుద్ధరణ
కేవలం పేర్లు మార్చడమే కాకుండా, మింటో పార్క్ గ్రేటర్ ఇక్బాల్ పార్క్ లోని చారిత్రక క్రికెట్ గ్రౌండ్లు, కుస్తీ అఖారాలను కూడా పునరుద్ధరించాలని ప్రభుత్వం నిర్ణయించింది. ఒకప్పుడు భారత దిగ్గజ క్రికెటర్ లాలా అమర్నాథ్ , స్టార్ రెజ్లర్ గామా పహిల్వాన్ వంటి వారు ఇక్కడే శిక్షణ పొందారు. విభజనకు ముందు ఉన్న క్రీడా స్ఫూర్తిని మళ్ళీ నింపాలని ప్రభుత్వం భావిస్తోంది. ఈ నిర్ణయంపై పాకిస్థాన్లో మిశ్రమ స్పందన వ్యక్తమవుతోంది. చరిత్రకారులు, సామాజిక వేత్తలు దీనిని ఆహ్వానిస్తుండగా, మత ఛాందసవాదులు మాత్రం అభ్యంతరాలు వ్యక్తం చేస్తున్నారు. అయితే, భవిష్యత్తులో సింధ్ , ఖైబర్ పఖ్తున్ఖ్వా ప్రాంతాల్లో కూడా ఇటువంటి చారిత్రక పేర్లను పునరుద్ధరించే అవకాశం ఉందని సమాచారం.
పేరు మారినంత మాత్రాన వ్యవస్థ మారుతుందా అన్నది పక్కన పెడితే, చారిత్రక వాస్తవాలను అంగీకరించడం అనేది ఒక సానుకూల పరిణామమే. లాహోర్ వీధుల్లో మళ్ళీ కృష్ణ , లక్ష్మి వంటి పేర్లు వినిపించడం అనేది ఒక చారిత్రక వింతే అని చెప్పాలి!
టాప్ హెడ్ లైన్స్
ట్రెండింగ్ వార్తలు
