Hottest Place on Earth : భూమిపై అత్యంత ప్రమాదకరమైన వేడి ప్రాంతం ఇదే.. 49 డిగ్రీల వేడితో పాటు విష వాయువులు కూడా
Earth’s Hottest Hell : తెలుగు రాష్ట్రాల్లో చలి రోజు రోజుకి పెరిగిపోతుంది. ఈ సమయంలో వేడిగా ఉంటే బాగుండు అనిపిస్తుంది. కానీ ప్రపంచంలో ఓ ప్రదేశంలో ఎప్పుడూ వేడిగా ఉంటుందట. ఎక్కడో తెలుసా?
Most Dangerous Place on Earth : విపరీతమైన వేడి ప్రదేశాల గురించి మాట్లాడితే సహారా వంటి ఎడారులు లేదా మధ్యప్రాచ్య నగరాలు టాపిక్కి వస్తాయి. కానీ మీకు తెలుసా? భూమిపై అత్యంత వేడి ప్రదేశం ఒకటి ఉంది. అక్కడ ఎప్పుడూ చల్లని వాతావరణం ఉండదట. అదే ఇథియోపియా(Ethiopia)లోని మారుమూల ప్రాంతమైన డలాల్(Dalol). ఇక్కడ చలి ఉండదు కదా అని వెళ్లాలనుకునేరు. కానీ అక్కడ మనుగడ కష్టమట. ఈ డలాల్ గురించిన ఇంట్రెస్టింగ్ విషయాలు ఇప్పుడు చూసేద్దాం.
రికార్డు స్థాయిలో వేడి
డలాల్ భూమిపై అత్యధిక సగటు వార్షిక ఉష్ణోగ్రత రికార్డును కలిగి ఉంది. రాత్రిపూట లేదా శీతాకాలంలో చల్లబడే ఇతర వేడి ప్రదేశాలకు భిన్నంగా.. ఈ ప్రదేశం ఏడాది పొడవునా నిరంతరం వేడిగా ఉంటుంది. ఇక్కడ శీతాకాలంలో కూడా ఉష్ణోగ్రత 30 డిగ్రీల సెల్సియస్కు పైనే ఉంటుంది. వేసవిలో ఇక్కడ ఉష్ణోగ్రత 49 డిగ్రీల సెల్సియస్ వరకు చేరుకుంటుంది.
మరో గ్రహంలా కనిపించే ప్రదేశం
డలాల్ డనాకిల్ డిప్రెషన్లో ఉంది. ఇది భూమిపై అత్యంత లోతైన, భూగర్భశాస్త్రపరంగా అత్యంత చురుకైన ప్రాంతాలలో ఒకటి. ఈ ప్రాంతాన్ని తరచుగా 'భూమిపై అంగారకుడు' అని పిలుస్తారు. పసుపు, ఆకుపచ్చ, నారింజ, తెలుపు రంగుల ప్రకాశవంతమైన నియాన్ షేడ్స్ ఈ ప్రాంతంలో కనిపిస్తాయి. ఈ రంగులు మొక్కల వల్ల కాదు.. సల్ఫర్, ఐరన్ ఆక్సైడ్, ఉప్పు, పొటాష్ల వల్ల జరిగే రసాయన ప్రతిచర్యల వల్ల ఏర్పడతాయి.
భూమిపై అత్యంత విషపూరిత ప్రదేశాలలో ఒకటి
ఈ ప్రదేశం వేడిగా ఉండటమే కాకుండా చాలా ప్రమాదకరమైనది కూడా. డలాల్లోని హైడ్రోథర్మల్ పూల్స్ చాలా ఆమ్ల స్వభావం కలిగి ఉంటాయి. వాటి pH స్థాయి సున్నా లేదా అంతకంటే తక్కువగా ఉంటుంది. సల్ఫర్ డయాక్సైడ్, క్లోరిన్ వంటి విష వాయువులు నిరంతరం గాలిలోకి విడుదలవుతూ ఉంటాయి.
సముద్ర మట్టానికి దిగువన, భూగర్భశాస్త్రపరంగా హింసాత్మకం
ఈ ప్రదేశం సముద్ర మట్టానికి సుమారు 120 నుంచి 130 మీటర్ల దిగువన ఉంది. దీనివల్ల ఇది భూమిపై అత్యంత లోతైన ప్రదేశాలలో ఒకటిగా నిలిచింది. ఇది మందపాటి ఉప్పు పొరలతో కప్పబడి ఉన్న అగ్నిపర్వత బిలంలో ఉంది. భూగర్భంలోని మాగ్మా భూగర్భ జలాలను వేడి చేస్తుంది. దీనివల్ల నిరంతర రసాయన పేలుళ్లు సంభవిస్తాయి. యాసిడ్ పూల్స్, ఉప్పు స్తంభాలు దీనివల్ల ఏర్పడతాయి. 1900ల ప్రారంభంలో డలాల్ కొంతకాలం ఇటాలియన్ పాలనలో మైనింగ్ కేంద్రంగా మారింది. ఇక్కడ కంపెనీలు ఉప్పు, పొటాష్ను వెలికితీసేవి. కానీ కాలక్రమేణా విపరీతమైన కష్టతరమైన పరిస్థితుల కారణంగా ప్రజలు ఆ ప్రాంతాన్ని వదిలి వెళ్లవలసి వచ్చిందట. దీనివల్ల ఈ ప్రాంతం జనసంచారం లేకుండా ఒక దెయ్యాల పట్టణంగా మారింది.
టాప్ హెడ్ లైన్స్
ట్రెండింగ్ వార్తలు
