Donald Trump Statement on Gun Fire: కాల్పులతో ఇరాన్కు లింకులను కొట్టిపారేసిన ట్రంప్.. నిందితుడి బ్యాగ్రౌండ్ తెలిస్తే షాక్
White House dinner shooting | వైట్ హౌస్ డిన్నర్ కాల్పుల ఘటనలో ఎలాంటి అంతర్జాతీయ కుట్ర లేదని, ఇది ఒక వ్యక్తి చేసిన పనిగానే కనిపిస్తోందని అమెరికా అధ్యక్షుడు డొనాల్డ్ ట్రంప్ స్పష్టం చేశారు.
వాషింగ్టన్: వైట్ హౌస్ కరస్పాండెంట్స్ డిన్నర్ సందర్భంగా జరిగిన కాల్పుల ఘటనపై అమెరికా అధ్యక్షుడు డొనాల్డ్ ట్రంప్ పలు కీలక విషయాలు తెలిపారు. ఈ దాడికి ఎలాంటి అంతర్జాతీయ కుట్రతో సంబంధం ఉన్నట్లు కనిపించడం లేదని, ఇది కేవలం ఒక వ్యక్తి చేసిన పని అయి ఉంటుందని పేర్కొన్నారు. ఈ దాడికి ఇరాన్తో నడుస్తున్న ఉద్రిక్తతలకు ఏమైనా సంబంధం ఉందా అని ట్రంప్ను ప్రశ్నించగా, అలా ఏమీ లేదన్నారు. దర్యాప్తు తర్వాత పూర్తి విషయాలు బయటకు వస్తాయని, అయితే ఇప్పటివరకు ఉన్న సమాచారం ప్రకారం దాడి చేసిన వ్యక్తి ఒంటరిగానే ఇందుకు పాల్పడినట్లు తెలిపారు.
నిందితుడు పలు ఆయుధాలతో మొదట సెక్యూరిటీ చెక్పాయింట్పై దాడి చేయడానికి ప్రయత్నించాడు. అయితే సీక్రెట్ సర్వీస్, లా ఎన్ఫోర్స్మెంట్ బృందం వేగంగా స్పందించి నిందితుడ్ని అదుపులోకి తీసుకున్నారని ట్రంప్ ప్రెస్ బ్రిఫింగ్లో తెలిపారు. భద్రతా దళాల వేగాన్ని, ధైర్యసాహసాలను అభినందించారు. వారి వల్లే పెద్ద ప్రమాదం తప్పిందని భద్రతా సిబ్బందిని కొనియాడారు. ఈ ఘటనలో ఒక అధికారికి తూటా తగిలి గాయమైందని, అయితే ఆయన పరిస్థితి నిలకడగా ఉందని ట్రంప్ తెలిపారు. నిందితుడు కాలిఫోర్నియా నివాసి అని వెల్లడించారు. నిందితుడి టాలెంట్, బ్యాగ్రౌండ్ తెలుసుకుని అంతా ఆశ్చర్యపోతున్నారు.
నిందితుడు టాలెంటెడ్ పర్సన్.. బెస్ట్ టీచర్
వైట్ హౌస్ కరస్పాండెంట్స్ డిన్నర్లో కాల్పులకు పాల్పడిన నిందితుడిని కాలిఫోర్నియాకు చెందిన 31 ఏళ్ల కోలో టామోస్ అలెన్గా దర్యాప్తు బృందాలు గుర్తించాయి. నిందితుడు అత్యంత విద్యావంతుడు కావడంతో పాటు బెస్ట్ టీచర్ అవార్డు గెలుచుకున్న వ్యక్తి కావడం విశేషం. కోలో టామోస్ కాలిఫోర్నియా ఇన్స్టిట్యూట్ ఆఫ్ టెక్నాలజీ నుంచి మెకానికల్ ఇంజినీరింగ్, కాలిఫోర్నియా స్టేట్ యూనివర్శిటీ నుంచి కంప్యూటర్ సైన్స్లో మాస్టర్స్ సైతం పూర్తి చేశాడు.
ఎమర్జెన్సీ బ్రేక్స్ రూపొందించి సంచలనం..
గతంలో నాసా ఫెలోషిప్లో పాల్గొన్న అలెన్, విద్యార్థిగా ఉన్న సమయంలోనే వీల్ఛైర్లకు ఎమర్జెన్సీ బ్రేక్ను రూపొందించి వార్తల్లో నిలిచాడు. ప్రస్తుతం ఒక విద్యా సంస్థలో టీచర్గా పనిచేస్తున్న అలెన్, 2024 డిసెంబర్లో టీచర్ ఆఫ్ ది మంత్ గా కూడా ఎంపికయ్యాడు. ఇతడు డెమోక్రటిక్ పార్టీ సానుభూతిపరుడు. అధ్యక్ష అభ్యర్థి కమలా హ్యారిస్ ప్రచారానికి విరాళం కూడా ఇచ్చాడని రికార్డులు చెబుతున్నాయి. ఒక మేధావిగా, మంచి టీచర్గా గుర్తింపు పొందిన వ్యక్తి ఇలాంటి దాడికి ఎందుకు పాల్పడ్డాడనే కోణంలో సీక్రెట్ సర్వీస్ ఏజెన్సీ, పోలీసులు దర్యాప్తు చేస్తున్నారు. ఇంతటి నేపథ్యం ఉన్న వ్యక్తి హింసాత్మక మార్గాన్ని ఎంచుకోవడం అందరినీ విస్మయానికి గురిచేస్తోంది.
ఇండోర్ ఈవెంట్స్ విషయంలో ఆలోచన మార్చుకోవాలా?
ఈ ఘటన తర్వాత ఇండోర్ ఈవెంట్స్ విషయంలో మార్పులు చేయాల్సిన అవసరం ఉందా అని ట్రంప్ను అడగ్గా.. అలా చేయలేనని ఖచ్చితంగా చెప్పారు. కార్యక్రమం జరుగుతున్న రూమ్ చాలా సురక్షితంగా ఉందని అన్నారు. దాడి చేసిన వ్యక్తి తనను లక్ష్యంగా చేసుకున్నాడా అని ప్రశ్నించినప్పుడు, తాను కూడా దాడికి గురయ్యే అవకాశం ఉందన్నారు.
ఈ ఘటన తర్వాత దేశ ప్రజలు శాంతిని పాటించాలని డొనాల్డ్ ట్రంప్ విజ్ఞప్తి చేశారు. విభేదాలను హింసతో కాకుండా శాంతియుత మార్గాల్లో చర్చల ద్వారా పరిష్కరించుకోవాలని అన్నారు. భారత ప్రధాని నరేంద్ర మోదీ సహా పలు దేశాల అధినేతలు ఈ దాడిని తీవ్రంగా ఖండించారు. పారదర్శకత కోసం తాను ఒక వీడియోను విడుదల చేయాలని ఆదేశించానని, అందులో దాడి చేసిన వ్యక్తి చర్యలు, భద్రతా సంస్థల రియాక్షన్ కనిపిస్తుందని తెలిపారు. ప్రస్తుతం ఈ కాల్పుల ఘటనపై దర్యాప్తు కొనసాగుతోంది. ప్రాథమిక సమాచారం ఆధారంగా డెమొక్రాటిక్ పార్టీ సానుభూతిపరుడిగా ఉన్న ఒక టాలెంటెడ్ టీచర్ ఈ కాల్పులు జరిపాడని.. ఇందులో కుట్రకోణంపై దర్యాప్తు చేపట్టారు.
టాప్ హెడ్ లైన్స్
ట్రెండింగ్ వార్తలు
