Viral video: వార్నీ.. దేవుడి కాళ్లకు మొక్కి మరీ గుడిలో హుండీని ఎత్తుపోయాడు, వీడియో వైరల్

హనుమంతుడి ఆలయంలోకి ప్రవేశించిన ఓ దొంగ.. దేవుడి కాళ్లకు మొక్కి మరీ

Image Credit: Rationalist/Facebook

ఓ దొంగ గుడిలోని హుండీని కొట్టేయాలని అనుకున్నాడు. అటు ఇటూ చూశాడు. కాసేపు ఫోన్ చూస్తున్నట్లు నటించాడు. ఎవరూ తనని చూడటం లేదని నిర్ధరించుకున్న తర్వాత దేవుడి విగ్రహం వద్దకు వెళ్లాడు. అనంతరం అక్కడ ఉన్న హుండిని పట్టుకుని పారిపోయాడు. ఇందులో చిత్రం ఏమిటంటే.. అతడు ఆ దొంగతనం చేసే ముందు ఆ దేవుడి కాళ్లకు దన్నం పెట్టి మరీ హుండీని ఎత్తుకుపోయాడు.

ఈ ఘటన మహారాష్ట్రలోని థానేలో చోటుచేసుకుంది. థానేలోని హనుమంతుడి గుడిలోకి ప్రవేశించిన దొంగ.. కాసేపు అటూ ఇటూ చూశాడు. ఎవరూ గమనించడం లేదని తెలుసుకున్న తర్వాత.. హనుమంతుడి విగ్రహం పాదాలకు మొక్కాడు. ఆ తర్వాత విగ్రహం ఎదురుగా ఉన్న హుండీని ఎత్తుకుని వెళ్లిపోయాడు. ఈ ఘటన సీసీటీవీ కెమేరాలో రికార్డైంది. ఈ వీడియో ఇప్పుడు సోషల్ మీడియాలో వైరల్‌గా చక్కర్లు కొడుతోంది. సీసీటీవీ ఫూటేజ్ పరిశీలించిన పోలీసులు నిందితుడిని అదుపులోకి తీసుకున్నారు. హుండీని కూడా స్వాధీనం చేసుకున్నారు. ఆ వీడియోను మీరు ఇక్కడ చూసేయండి.

వీడియో:

2019లో హైదరాబాద్‌లో ఇలాంటి ఘటనే జరిగింది. హైదరాబాద్‌లోని గన్‌ఫండ్రీ ప్రాంతంలోని దుర్గాభవానీ ఆలయంలో విగ్రహం కిరీటాన్ని దొంగిలించే ముందు ఓ దొంగ దుర్గాదేవికి క్షమాపణలు చెప్పాడు. గుడిలో ఉన్న సెక్యూరిటీ కెమెరా ఫుటేజీలో ఒక వ్యక్తి తన పాదరక్షలను తీసివేసి ఆలయంలోకి ప్రవేశించడం కనిపించింది. అనంతరం అతడు చేతులు జోడించి ప్రదక్షిణలు చేస్తూ అమ్మవారికి దన్నం పెట్టుకున్నాడు. అనంతరం విగ్రహం పాదాలకు మొక్కాడు. ఆ తర్వాత అతను తన చెవులు పట్టుకుని.. అమ్మవారిని క్షమాపణలు కోరాడు. నుదుటికి తిలకం కూడా పెట్టుకున్నాడు. చుట్టుపక్కల ఎవరూ లేరని నిర్ధారించుకున్న తర్వాత వ్యక్తి విగ్రహం నుంచి కిరీటాన్ని దొంగిలించాడు. అనంతరం మళ్లీ దేవుడికి దన్నం పెట్టాడు. అమ్మవారి కిరీటాన్ని తన దుస్తుల్లో దాచుకుని అక్కడి నుంచి నెమ్మదిగా జారుకున్నాడు.  

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి