Cm Stalin: సిటీ బస్సెక్కిన సీఎం... సెల్ఫీల కోసం ఎగబడ్డ ప్రయాణికులు

సీఎం సడన్ గా సిటీ బస్సు ఎక్కారు. అందరికీ ఒక్క నిమిషం ఏం జరుగుతుందో అర్థంకాలేదు. సరదాగా ప్రయాణికులను పలకరించి ప్రభుత్వ పథకాలపై ఆరా తీశారు. ప్రయాణికులతో సెల్పీలు కూడా దిగారు.

తమిళనాడు సీఎం స్టాలిన్(ఫైల్ ఫొటో)

తమిళనాడు సీఎం ఎంకే స్టాలిన్‌ ఏంచేసినా సంచలనంగా మారింది. పరిపాలనలో తన మార్క్ చూపిస్తున్న స్టాలిన్... ప్రజల సమస్యలను తెలుసుకునేందుకు వీలున్నప్పుడల్లా ప్రజలతో మాటలు కలుపుతున్నారు. ప్రజల సమస్యలను తెలుసుకునేందుకు ఎప్పటికప్పుడు ప్రజలతో మమేకమవుతున్నారు. ప్రభుత్వ పథకాలు ప్రజలకు చేరుతున్నాయా లేదా అనే విషయాన్ని స్వయంగా పరిశీలించడానికి శనివారం అకస్మాత్తుగా కాన్వాయ్‌ దిగి చెన్నైలోని కన్నగి నగర్‌ వైపు వెళ్తున్న సిటీ బస్సు ఎక్కారు. బస్సులోని ప్రయాణికులతో సీఎం స్టాలిన్ సంభాషించారు. తమిళనాడులో మహిళలకు ఉచిత బస్సు ప్రయాణం అమలుచేస్తున్నారు. దీని గురించి మహిళలు ఎలా భావిస్తున్నారో స్టాలిన్‌ ప్రత్యేకంగా అడిగి తెలుసుకున్నారు. 

தி. நகர் - கண்ணகி நகர் வழித்தட பேருந்தில் மாண்புமிகு முதலமைச்சர் @mkstalin அவர்கள் திடீரென ஆய்வு மேற்கொண்டு, பெண்களிடம் மகளிருக்கான இலவச பேருந்து பயண திட்டம் குறித்து கேட்டறிந்தார். pic.twitter.com/QbKwZKpB3i

— CMOTamilNadu (@CMOTamilnadu) October 23, 2021

మహిళలకు ఉచిత ప్రయాణంపై ఆరా

చెన్నై నగరంలో వివిధ బస్సు సర్వీసుల గురించి అడిగిన సీఎం... ఫిర్యాదులు, అభిప్రాయాలు తెలుసుకున్నారు. బస్సుల్లో ఎటువంటి సౌకర్యాలు ఏర్పాటు చేయాలో అడిగి తెలుసుకున్నారు. కరోనా నిబంధనల్ని పాటిస్తూ ప్రయాణాలు చేయాలని సీఎం స్టాలిన్‌ సూచించారు. సీఎంతో సెల్ఫీలు దిగేందుకు ప్రయాణికులు పోటీపడ్డారు. అసెంబ్లీ ఎన్నికల్లో డీఎంకే మేనిఫెస్టోలో సిటీ బస్సులలో మహిళలకు ఉచిత ప్రయాణం, ప్రభుత్వ రంగంలోని మహిళా ఉద్యోగులకు ప్రసూతి సెలవులు ఆరు నెలల నుంచి సంవత్సరానికి పెంచడం, ప్రసూతి సాయంగా రూ.24,000 అందించడం, మహిళలపై నేరాలను విచారించడానికి ప్రత్యేక సైబర్‌ క్రైమ్‌ పోలీస్‌ స్టేషన్లు ఏర్పాటు చేస్తామని తెలిపారు. వీటిల్లో భాగంగా మహిళలకు ఉచిత ప్రయాణం అమలు చేస్తున్నారు. బస్సులో కొంతమంది మాస్క్‌లు పెట్టుకోకపోతే వారిని మాస్క్‌లు ధరించాలని సీఎం సూచించారు. 

కాన్వాయ్ దిగి బస్సు ఎక్కిన సీఎం

తన సంచలన నిర్ణయాలతో తరచూ వార్తల్లో నిలుస్తున్న తమిళనాడు సీఎం స్టాలిన్... కాసేపు ఆర్టీసీ బస్సులో ప్రయాణించడం అందర్నీ ఆశ్చర్య పరిచింది. తమిళనాడులో టీకా పంపిణీ కార్యక్రమాన్ని పరిశీలించేందుకు శనివారం ఆయన చెన్నైలోని కన్నగి ప్రాంతంలోని ఓ వ్యాక్సిన్‌ కేంద్రాన్ని సందర్శించారు. అక్కడి ఆరోగ్య సిబ్బంది, టీకా తీసుకునేవారితో మాట్లాడారు. అనంతరం తిరిగి వస్తున్న సమయంలో అటుగా వెళ్తోన్న ఓ ఆర్టీసీ బస్సును సీఎం ఆపారు తన కాన్వాయ్‌ దిగి బస్సు ఎక్కారు. సీఎం స్టాలిన్ బస్సు ఎక్కడంతో డ్రైవరు, కండక్టర్‌, ప్రయాణికులు కాసేపు ఆశ్చర్యానికి లోనయ్యారు. ఈ వీడియోలు తమిళనాడు సీఎంవో కార్యాలయం ట్విటర్‌లో షేర్‌ చేసింది. ప్రస్తుతం ఈ వీడియోలు సోషల్‌మీడియాలో వైరల్‌ అయ్యాయి. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channelసబ్‌స్క్రైబ్‌ చేయండి