SC on Two Finger Test: అత్యాచార కేసుల్లో "టూ ఫింగర్ టెస్ట్‌"పై సుప్రీం బ్యాన్!

SC on Two Finger Test: అత్యాచార కేసుల్లో"టూ- ఫింగర్ టెస్ట్‌" నిర్వహించడాన్ని సుప్రీం కోర్టు తప్పుబట్టింది. ఈ పరీక్షపై బ్యాన్ విధించింది.

అత్యాచార కేసుల్లో "టూ ఫింగర్ టెస్ట్‌"పై సుప్రీం బ్యాన్!

SC on Two Finger Test: అత్యాచారం కేసులను నిర్ధరించడానికి చేసే "టూ-ఫింగర్ టెస్ట్"పై సుప్రీం కోర్టు సోమవారం బ్యాన్ విధించింది. అలాంటి పరీక్షలు నిర్వహించే వారిని దుష్ప్రవర్తన కింద నేరంగా పరిగణించాలని సుప్రీం వ్యాఖ్యానించింది. ఈ పరీక్షపై నిషేధం అమలయ్యేలా చూడాలని కేంద్ర ప్రభుత్వాన్ని సుప్రీం కోర్టు ఆదేశించింది.

ఈ మేరకు జస్టిస్ డీవై చంద్రచూడ్, జస్టిస్ హిమా కోహ్లీలతో కూడిన ధర్మాసనం.. "రెండు వేళ్ల టెస్ట్" నేటికీ నిర్వహించటం విచారకమని పేర్కొంది. ఓ అత్యాచార కేసు విచారణలో భాగంగా ధర్మాసనం ఈ వ్యాఖ్యలు చేసింది.

#courtroomexchange
While dictating a judgment a Bench led by J. Chandrachud remarked -

“This court has time and again deprecated the use of two finger test in cases alleging rape and sexual assault. The so called test has no scientific basis...

— Live Law (@LiveLawIndia) October 31, 2022

" సమాజంలో ఇప్పటికీ ఈ "టూ- ఫింగర్ టెస్ట్" కొనసాగుతుండటం దురదృష్టకరం. ఇది మహిళల గోప్యత, గౌరవమర్యాదలకు భంగం కలిగిస్తుంది. ఈ పరీక్షను తక్షణమే నిషేధించాలి. ఇలాంటి పరీక్షలు ఎవరు చేసినా దుష్ప్రవర్తన నేరం కింద పరిగణించాలి. దీనిపై కేంద్ర, రాష్ట్ర ప్రభుత్వాలు తగిన చర్యలు తీసుకోవాలి. ప్రభుత్వ, ప్రైవేటు మెడికల్ కళాశాలల పాఠ్యాంశాల నుంచి 'రెండు వేళ్ల పరీక్ష'కు సంబంధించిన అంశాలను తొలగించాలి.                                                              "

-     సుప్రీం ధర్మాసనం

మళ్లీ బాధించడమే

అత్యాచార కేసుల్లో మహిళలకు ఈ పరీక్ష నిర్వహించడం వల్ల వారిని మరోసారి బాధించడమే అవుతుందని సుప్రీం కోర్టు అభిప్రాయపడింది.

" అత్యాచారం, లైంగిక వేధింపుల కేసుల్లో "టూ- ఫింగర్ టెస్ట్"ను నిలిపివేయాలని కోర్టు పదే పదే చెప్పింది. ఈ పరీక్షకు శాస్త్రీయ ఆధారం లేదు. అంతేకాకుండా ఇది మహిళలను తిరిగి బాధితురాలిని చేస్తుంది, మళ్లీ గాయపరుస్తుంది. ఈ పరీక్ష చేయకూడదు. లైంగికంగా చురుగ్గా ఉండే మహిళలపై అత్యాచారం జరగదనే తప్పుడు ఊహ ఆధారంగా ఈ పరీక్ష నిర్వహించేవారు. కానీ ఇందులో ఏమాత్రం నిజం లేదు.                                          "

- సుప్రీం ధర్మాసనం

ఇదీ కేసు

హత్యాచారం కేసులో భాగంగా ఓ నిందితుడిని దోషిగా తేల్చుతూ ట్రయల్ కోర్టు ఇచ్చిన తీర్పును సుప్రీం ధర్మాసనం సమర్థించింది. ట్రయల్ కోర్టు తీర్పును తప్పుబట్టిన ఝార్ఖండ్ హైకోర్టు నిర్ణయాన్ని తోసిపుచ్చింది.  ట్రయల్ కోర్టు నిర్ణయాన్ని సమర్థిస్తూ తీర్పు ఇచ్చింది.