Dera Baba : జీవితాంతం జైల్లోనే డేరా బాబా .. హత్య కేసులో మరో యావజ్జీవ శిక్ష !

రంజిత్ సింగ్ హత్య కేసులో డేరాబాబాకు యావజ్జీవ శిక్ష పడింది. ఇప్పటికే రెండు కేసుల్లో శిక్ష అనుభవిస్తున్న డేరాబాబాకు మరో శిక్ష పడినట్లయింది.

డేరాబాబాకు యావజ్జీవ శిక్ష

వివాదాస్పద మత గురువు డేరా సచ్చా సౌదా చీఫ్ గుర్మీత్ రామ్ రహీమ్‌ సింగ్ అలియాస్ డేరాబాబాకు యావజ్జీన ఖైదు విధించారు. తన శిష్యుడు, మేనేజర్ రంజిత్ సింగ్ హత్య కేసులో డేరా బాబాతో పాటు మరో ఐదుగురిని దోషులుగా పంచకుల సీబీఐ స్పెషల్ కోర్టు తేల్చింది. ఐదుగురికీ జీవిత ఖైదు విధించింది. డేరా బాబాకు రూ.31 లక్షలు..  మిగిలిన నలుగురికీ రూ.50 వేల చొప్పున జరిమానా విధించింది. 

రంజిత్ సింగ్‌ను 2002 జులై 10న హత్యకు గురయ్యారు.  ఆశ్రమంలోని మహిళలను సెక్స్ బానిసలుగా చేసుకుని డేరా బాబా చేస్తున్న అరాచకాలకు సంబంధించి అప్ప‌ట్లో ఒక లేఖ బ‌య‌టికి వ‌చ్చింది. అయితే, త‌న అరాచ‌కాల‌ను బయటి ప్రపంచానికి తెలియజెప్పడానికి రంజిత్ సింగే ఆ ప‌ని చేసిన‌ట్లు డేరా బాబా అనుమానించి హ‌త్య చేయించారని ఆరోపణలు వెల్లువెత్తాయి. దీంతో డేరా బాబానే హత్య చేశాడని ఆరోపిస్తూ  రంజిత్ సింగ్ కొడుకు జగ్సీర్‌‌ సింగ్ పోలీసులకు ఫిర్యాదు చేశారు. ఈ కేసును సీబీఐకి సిఫార్సు చేశారు. 2003 డిసెంబర్‌‌ 3న సీబీఐ ఎఫ్‌ఐఆర్ నమోదు చేసి.. దర్యాప్తు మొదలు పెట్టింది. హర్యానాలోని పంచకులలో ఉన్న సీబీఐ స్పెషల్ కోర్టులో ఈ కేసు విచారణ సాగుతోంది. సుదీర్ఘ విచారణ తర్వాత న్యాయస్థానం తీర్పు వెల్లడించింది. పది రోజుల క్రితమే పంచకుల కోర్టు డేరా బాబాతో పాటు మరో ఐదుగురిని సెక్షన్ 302 కింద దోషులుగా తేల్చింది. సోమవారం శిక్షను ప్రకటించింది. 

డేరా బాబా ఇప్పటికే రెండు కేసుల్లో దోషిగా తేలి జైలు శిక్ష అనుభవిస్తున్నాడు. తన ఆశ్రమంలో శిష్యులుగా ఉన్న ఇద్దరు మహిళలను రేప్ చేసిన కేసులో 2017 ఆగస్టులో పంచకుల సీబీఐ కోర్టు డేరా బాబాను దోషిగా తేల్చి 20 సంవత్సరాల జైలు శిక్ష విధించింది. అలాగే డేరా బాబా తన ఆశ్రమంలో చేస్తున్న అరాచకాలు, మహిళలపై చేస్తున్న అఘాయిత్యాలపై వార్త కథనాలు రాసిన జర్నలిస్ట్ రామచంద్ర ఛత్రపతిని చంపిన కేసులోనూ దోషిగా తేలుస్తూ 2019లో కోర్టు తీర్పు ఇచ్చింది. ఆ కేసుల్లో శిక్ష అనుభవిస్తున్నాడు. 

పంజాబ్, హర్యానాల్లో కొన్ని లక్షల మంది అనుచరులు ఉన్న వివాదాస్పద తమ గురువు డేరా బాబా, ఆయన సామ్రాజ్యం అంతా నేరాల మయమే. అనేక ఆరోపణలు ఉన్నాయి. ఆయన సినిమాల్లోనూ నటిస్తూంటారు. అయితే చివరికి పాపాలు పండటంతో జైలు పాలయ్యాడు. ఇప్పుడు ఇక జీవితాంతం జైల్లోనే మగ్గనున్నారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి