Statue Vandalised: పంజాబ్‌లో కెనడా తరహా ఘటన - జాతినేతకు ఘోర అవమానం

పంజాబ్‌లోని ఓ పార్క్‌లో ఓ స్వాతంత్రసమరయోధుడి విగ్రహాన్ని దుండగులు ధ్వంసం చేశారు.

పంజాబ్‌లోని ఓ పార్క్‌లో విగ్రహాన్ని గుర్తు తెలియని వ్యక్తులు ధ్వంసం చేశారు. (Image Credits: Pixabay)

భారత్‌లోనూ కెనడా తరహా ఘటన..

కెనడాలో మహాత్మా గాంధీ విగ్రహంపై అభ్యంతరకర వార్తలు రాయటంపై విచారణ జరుగుతుండగానే అలాంటి ఘటనే భారత్‌లోనూ చోటు చేసుకుంది. పంజాబ్‌లోని బతిండాలో ఓ పబ్లిక్‌ పార్క్‌లో స్వాతంత్రసమరయోధుడి విగ్రహాన్ని గుర్తు తెలియని వ్యక్తులు ధ్వంసం చేశారు. విగ్రహాన్ని ముక్కలు ముక్కలు చేశారు. గురువారం తెల్లవారు జామున దుండగులు ఈ పని చేసినట్టు పోలీసులు వెల్లడించారు. రమ్మన్ మండీలోని పబ్లిక్‌ పార్క్‌లో ఉన్న విగ్రహాన్ని ధ్వంసం చేయటమే కాకుండా, విగ్రహం తలను ఎత్తుకెళ్లిపోయారు.  రమ్మన్ మండీ పోలీస్ స్టేషన్‌లో కేసు నమోదు చేసుకున్న పోలీసులు, విచారణ చేపడుతున్నారు. ఆ ప్రాంతంలోని సీసీ కెమెరాలు పరిశీలిస్తున్నామని, త్వరలోనే నిందితుల్ని పట్టుకుంటామని వెల్లడించారు. ఈ ఘటనపై స్థానికులు తీవ్రంగా మండిపడుతున్నారు. నిందితులను వెంటనే అరెస్ట్ చేయాలని కాంగ్రెస్ నేతలు డిమాండ్ చేశారు.

Punjab | A statue of Mahatma Gandhi situated at a public park in Rama Mandi was vandalised by unidentified miscreants in Bathinda last night. A case under section 379, 427 registered: Harjot Singh, In-charge Rama Mandi PS pic.twitter.com/oyfKZJlMTG

— ANI (@ANI) July 16, 2022

 విగ్రహంపై అభ్యంతరకర రాతలు..

కెనడాలోనూ మహాత్మా గాంధీ విగ్రహానికి అవమానం జరిగింది. ఒంటారియోలోని రిచ్‌మండ్ హిల్ సమీపంలో విష్ణు మందిర్ వద్ద 30 అడుగుల
గాంధీ విగ్రహం ఉంటుంది. గుర్తు తెలియని దుండగులు ఆ విగ్రహంపై అభ్యంతరకర రాతలు రాశారు. భారతీయులను కించపరిచేందుకే ఎవరో ఉద్దేశపూర్వకంగా ఈ పని చేశారని అక్కడి అధికారులు భావిస్తున్నారు. "రంగు, జాతి, వయసు, జెండర్ ఆధారంగా వివక్ష చూపించే వారెవరైనా సరే, ఎట్టి పరిస్థితుల్లోనే ఉపేక్షించం" అని పోలీసులు స్పష్టం చేశారు. ఇలాంటి నేరాల పట్ల కఠినంగా వ్యవహరిస్తామని వెల్లడించారు. ఈ ఘటన పట్ల భారత్ తీవ్ర ఆవేదన వ్యక్తం చేసింది. కెనడాలోని ఇండియన్ హై కమిషన్ ఇదే విషయాన్ని ట్వీట్ చేసింది. "ఇండియన్ కమ్యూనిటీ వారిని భయపెట్టాలనే దురుద్దేశంతో చేసిన ఈ పనిని తీవ్రంగా ఖండిస్తున్నాం. కెనడాలోని భారతీయులందరిలోనూ ఇలాంటి ఘటనలు అభద్రతా భావాన్ని పెంచుతాయి. కెనడా ప్రభుత్వంతో ఇప్పటికే మాట్లాడాం. విచారణ చేపట్టాలని అడిగాం" అని ట్విటర్‌లో పేర్కొంది. ఈ 5 మీటర్ల ఎత్తైన గాంధీ విగ్రహాన్ని 30 ఏళ్ల కిందట ఏర్పాటు చేశారు.