Tej Pratap Yadav: లాలూకు మరో షాక్- పార్టీకి పెద్ద కుమారుడు గుడ్‌బై

Tej Pratap Yadav: లాలూ ప్రసాద్ యాదవ్ పెద్ద కుమారుడు తేజ్ ప్రతాప్ యాదవ్ ఆర్‌జేడీ పార్టీకి రాజీనామా చేస్తున్నట్లు ప్రకటించారు.

లాలూకు మరో షాక్- పార్టీకి పెద్ద కుమారుడు గుడ్‌బై

Tej Pratap Yadav: ఆర్‌జేడీ అధినేత, బిహార్ మాజీ సీఎం లాలూ ప్రసాద్ యాదవ్ పెద్ద కుమారుడు తేజ్ ప్రతాప్ యాదవ్ సంచలన ప్రకటన చేశారు. రాష్ట్రీయ జనతాదళ్ (RJD)కి రాజీనామా చేస్తున్నట్లు ఆయన తెలిపారు. త్వరలో తన తండ్రిని కలుస్తానని, తన రాజీనామాను సమర్పిస్తానని ఆయన చెప్పారు. ప్రస్తుతం హసన్‌పుర్ నియోజకవర్గానికి ఆయన ఎమ్మెల్యేగా ఉన్నారు.

मैं अपने पिता के नक्शे कदम पर चलने का काम किया । सभी कार्यकर्ताओं को सम्मान दिया जल्द अपने पिता से मिलकर अपना इस्तीफा दूंगा ।@laluprasadrjd @RJDforIndia @yadavtejashwi @RabriDeviRJD @MisaBharti @Chiranjeev_INC

— Tej Pratap Yadav (@TejYadav14) April 25, 2022

" నేను మా నాన్నగారి అడుగుజాడల్లో నడిచాను. కార్యకర్తలందరికీ గౌరవం ఇచ్చాను. త్వరలో మా నాన్నను కలుసుకుని నా రాజీనామాను సమర్పిస్తాను.                                                     "

-తేజ్ ప్రతాప్ యాదవ్, లాలూ ప్రసాద్ యాదవ్ కుమారుడు

ఆరోపణలు

ఏప్రిల్ 22న జరిగిన ఇఫ్తార్ పార్టీలో తేజ్ ప్రతాప్ తనను ఓ గదిలోకి తీసుకువెళ్లి దాడి చేసినట్లు పార్టీ యువజన విభాగం పట్నా మహానగర అధ్యక్షుడు రామ్‌రాజ్ యాదవ్ ఆరోపించారు. పార్టీని వీడాలని, లేదంటే పది రోజుల్లోగా తనను కాల్చి చంపేస్తానని తేజ్‌ ప్రతాప్ బెదిరించినట్లు ఆయన తెలిపారు.

ఆ తర్వాత సోమవారం పార్టీ కార్యాలయానికి చేరుకుని యువజన కార్యకర్తలతో కలిసి రామ్‌రాజ్ యాదవ్ రాజీనామా సమర్పించారు. పార్టీ తనకు న్యాయం చేయలేదని, తనపై దాడి చేసిన వారిపై ఎలాంటి చర్యలు తీసుకోలేదని అందుకే రాజీనామా చేస్తున్నట్లు ఆయన తెలిపారు. అయితే ఈ ఆరోపణలను తేజ్‌ ప్రతాప్ ఖండించారు. 

మరోవైపు లాలూ ప్రసాద్ యాదవ్‌కు దాణా కుంభకోణం కేసులో ఇటీవలే ఝార్ఖండ్ హైకోర్టు బెయిల్ మంజూరు చేసింది. త్వరలోనే ఆయన బయటకు వచ్చే అవకాశం ఉన్నట్లు లాలూ న్యాయవాది వెల్లడించారు.