Guwahati-Bikaner Express Derailed: పట్టాలు తప్పిన ఎక్స్‌ప్రెస్ రైలు.. ముగ్గురు మృతి, 20 మందికి గాయాలు

గువాహటి- బికనేర్ ఎక్స్‌ప్రెస్ రైలు బంగాల్‌లో పట్టారు తప్పింది. ఈ ప్రమాదంలో ముగ్గురు మృతి చెందారు.

పట్టాలు తప్పిన రైలు

బంగాల్​ జలపాయ్‌గురి దొమోహనీ వద్ద గువాహటి-బికనేర్‌ ఎక్స్​ప్రెస్ 15633 (యూపీ)​ రైలు పట్టాలు తప్పింది. ఈ ప్రమాదంలో ముగ్గురు మరణించారు. 20 మందికి గాయాలయ్యాయి. ఈ మేరకు రైల్వేశాఖ తెలిపింది.

Guwahati-Bikaner Express derailed near Domohani (West Bengal), this evening. No report of any casualties. Details awaited. pic.twitter.com/7q02rbW7T1

— ANI (@ANI) January 13, 2022

సమాచారం అందిన వెంటనే యాక్సిడెంట్ రిలీఫ్ వ్యాన్, మెడికల్ వ్యాన్​ను ఘటనా స్థలానికి పంపినట్లు భారతీయ రైల్వే తెలిపింది. సాయంత్రం 5 గంటలకు ఈ ప్రమాదం జరిగినట్లు స్పష్టం చేసింది. 12 బోగీలు పట్టాలు తప్పాయని పేర్కొంది. క్షతగాత్రులను స్థానిక ఆసుపత్రుల్లో చేర్చినట్లు అధికారులు తెలిపారు. మొత్తం 30 అంబులెన్స్‌లను ఘటనా స్థలికి పంపించారు.

రైలు హఠాత్తుగా ప్రమాదానికి గురికావడం వల్ల అందులోని ప్రయాణికులు భయాందోళనకు గురయ్యారు. భయంతో రైలు దిగి దూరంగా పరుగులు తీశారు.

సహాయక బృందాలు..

రెస్క్యూ ట్రైన్‌ను వెంటనే సంఘటనా స్థలానికి పంపింది రైల్వేశాఖ. ఇందులో రైలు బోగీలను కట్ చేసి ప్రయాణికులను బయటకు తీసేందుకు అవసరమైన సామగ్రి ఉంది. ప్రయాణికుల సమాచారం కోసం రైల్వేశాఖ హెల్ప్ లైన్ నంబర్‌ 8134054999ను ప్రకటించింది.

పరిహారం ప్రకటన..

ప్రమాదంలో మృతి చెందిన వారి కుటంబానికి రూ.5 లక్షలు, తీవ్రంగా గాయపడినవారికి రూ.లక్ష, స్వల్ప గాయాలైనవారికి రూ.25 వేలు పరిహారం ప్రకటించింది ర్వైల్వేశాఖ. ఘటనపై ఉన్నత స్థాయి దర్యాప్తునకు ఆదేశించింది.

ప్రమాదం జరిగిన ప్రాంతానికి రైల్వేశాఖ మంత్రి అశ్విని వైష్ణవ్ శుక్రవారం వెళ్లనున్నారు. ఇప్పటికే పరిహారం ప్రకటించామని ఆయన తెలిపారు.

ప్రధాని ఫోన్..

Deeply concerned to hear about the tragic accident of the Bikaner-Guwahati Express in Maynaguri.
Senior Officers of the State Government, DM/SP/IG North Bengal are supervising rescue and relief operations. Those injured will receive medical attention, as early as possible.

— Mamata Banerjee (@MamataOfficial) January 13, 2022

బంగాల్ ముఖ్యమంత్రి మమతా బెనర్జీకి ఫోన్ చేసి ప్రమాద వివరాలను ప్రధాని నరేంద్ర మోదీ తెలుసుకున్నారు. సహాయకచర్యలను వేగంగా చేయాలని సూచించారు. ఘటనపై మమతా బెనర్జీ కూడా ట్వీట్ చేశారు. 

" బికనేర్- గువాహటి ఎక్స్‌ప్రెస్ ప్రమాదానికి గురి కావడం ఆందోళన కలిగించింది. రాష్ట్రానికి చెందిన సీనియర్ అధికారులు, ఉత్తర బంగాల్‌కు చెెందిన డీఎమ్, ఎస్పీ, ఐజీ.. సహాయక చర్యలను దగ్గరుండి పరిశీలిస్తున్నారు. గాయపడినవారికి వీలైనంత త్వరగా వైద్య సాయం అందేందుకు కృషి చేస్తున్నారు. క్షతగాత్రులు త్వరగా కోలుకోవాలని ప్రార్థిస్తున్నాను.                                             "

-మమతా బెనర్జీ, బంగాల్ ముఖ్యమంత్రి

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి