Scooty Rider Attacks ISRO Scientist :ఇస్రో శాస్త్రవేత్త కారుపై యువకుడి దాడి-వీడియో వైరల్‌
Scooty Rider Attacks ISRO Scientist :ఇస్రో శాస్త్రవేత్త కారుపై యువకుడి దాడి. ఎక్స్ లో పోస్ట్ చేయడంతో విషయం వెలుగులోకి వచ్చింది.
బెంగళూరులో ఆఫీసుకు వెళ్తున్న ఓ ఇస్రో శాస్త్రవేత్తకు చేదు అనుభవం ఎదురైంది. రోడ్డుపై స్కూటీపై వెళ్తున్న యువకుడు ఇష్టం వచ్చినట్లుగా ప్రవర్తించి ఆయనను బెదిరించాడు. ఆశిశ్‌ లంబా అనే శాస్త్రవేత్త బెంగుళూరులో ఇస్రో కార్యాలయానికి కారులో వెళ్తుండగా ఈ ఘటన జరిగింది. కారు డ్యాష్‌బోర్డ్‌ కెమెరాలో రికార్డైన వీడియోను ఆయన సోషల్‌ మీడియా ప్లాట్‌ఫాం ఎక్స్‌లో షేర్‌ చేయడంతో విషయం వైరల్‌గా మారింది. ఆశిశ్‌ తెలిపిన వివరాల ప్రకారం.. ఆయన ఆఫీస్‌కు వెళ్తుండగా స్కూటర్‌పై హెల్మెంట్‌ కూడా లేకుండా వెళ్తున్న ఓ వ్యక్తి సడెన్‌గా తన కారు ముందు కట్‌ తీసుకున్నాడని, దాని వల్ల తాను సడెన్‌ బ్రేక్‌ వేయాల్సి వచ్చిందని చెప్పారు. లేదంటే రెండు వాహనాలు ఢీ కొనేవని తెలిపారు. స్కూటర్‌ రైడర్‌ మాత్రం తన కారు ముందు బండి ఆపి అసభ్య పదజాలం వాడుతూ ఇష్టం వచ్చినట్లు ప్రవర్తించినట్లు చెప్పారు.
ఈ మేరకు వీడియోను పోస్ట్ చేశారు. తన కారు టైర్లను తన్నతూ దాడి చేయడానికి ప్రయత్నించాడని, తనకు వార్నింగ్‌ కూడా ఇచ్చాడని ఆశిశ్‌ పేర్కొన్నారు. ఆగస్టు 29 న పాత ఎయిర్‌పోర్ట్‌ రోడ్డులో కొత్తగా నిర్మించిన హెచ్‌ఏఎల్‌ అండర్‌ పాస్‌ దగ్గర ఈ ఘటన జరిగినట్లు చెప్పారు. స్కూటీ నంబరు KA03KM8826 అని కూడా ఆశిశ్‌ తన పోస్ట్‌లో వెల్లడించారు.
ఆశిశ్‌ ఈ ఘటన గురించి ఎక్స్‌లో పోస్ట్ చేయడంతో బెంగుళూరు పోలీసులు స్పందించారు. బెంగుళూరు పోలీస్‌ అధికారిక ఎక్స్ ఖాతా నుంచి తాము ఘటనను నోటీస్‌ చేసుకున్నామని, సంబంధిత అధికారికి వివరాలు అందజేస్తామని ట్విట్టర్‌లో పోస్ట్ చేశారు. తదుపరి విచారణ కోసం ఆశిశ్‌ ఫోన్‌ నంబరు, వివరాలను అడిగారు. పోలీసులు దీనిపై స్పందించడం పట్ల ఆశిశ్‌ ట్విట్టర్‌లో ధన్యవాదాలు తెలిపారు.
ఈ ఘటనపై నెటిజన్లు కూడా తీవ్రంగా స్పందించారు. ఆ యువకుడిపై తగిన చర్యలు తీసుకోవాలని కొందరు, ఈ విషయంపై అప్‌డేట్స్‌ ఏమైనా ఉన్నాయా అంటూ ట్వీట్లు చేశారు. ఇలాంటి వారిపై ఎలాంటి కేసులు పెట్టొచ్చంటూ మరో యూజర్‌ ట్వీట్‌ చేశారు. ఫ్రంట్‌ లైనర్స్‌ అయిన శాస్త్రవేత్తల విషయంలో ఇలాగేనా ప్రవర్తించేది, దయచేసి ఆ యువకుడిని అరెస్ట్‌ చేయండి అంటూ పలువురు మంది ట్వీట్ల ద్వారా స్పందించారు. బెంగుళూరు రోడ్లపై ఇలాంటి రోడ్డు యాక్సిడెంట్‌ ఘటనలు పెరిగిపోతున్నాయని మరొకరు ఆవేదన వ్యక్తంచేశారు.
ఇటీవల సూరత్‌లో మితుల్‌ త్రివేది అనే ప్రైవేట్ ట్యూటర్‌ తాను ఇస్రో సైంటిస్ట్‌ను అనిచెప్పుకుంటూ మీడియాకు ఇంటర్వ్యూలు ఇచ్చాడు. చంద్రయాన్‌ 3 కోసం ల్యాండర్‌ మాడ్యూల్‌ను రూపొందించినట్లు చెప్పాడు. తన ట్యూషన్స్‌కు ఎక్కువ మంది విద్యార్థులు వచ్చేలా చేయడం కోసం ఇలా అబద్ధాలు చెప్పి మోసం చేశాడు. ఈ ఘటన కారణంగా అక్కడి పోలీసులు మితుల్‌ త్రివేదిని అరెస్ట్‌ చేశారు.
టాప్ హెడ్ లైన్స్
ట్రెండింగ్ వార్తలు
