Malai Egg Curry Recipe : మలై ఎగ్ కర్రీ.. ఇంట్లోనే రెస్టారెంట్ స్టైల్ రుచి కావాలంటే ఈ రెసిపీ ట్రై చేసేయండి

Egg Curry Recipe : క్రీమీ ఎగ్ కర్రీ రుచి చాలా బాగుంటుంది. ఈ రెస్టారెంట్ రెసిపీని ఇంట్లోనే సింపుల్గా, టేస్టీగా ఎలా చేసుకోవాలో చూసేద్దాం.

గుడ్డుతో టేస్టీ గ్రేవీ కూర ఇలా చేసేయండి

Source : Freepik

Restaurant Style Malai Egg Curry Recipe : గుడ్డుతో చేసిన ప్రతి వంటకం రుచికరంగానే ఉంటుంది. కానీ మలై ఎగ్ కర్రీ వాటిలో కాస్త ప్రత్యేకమైనది. క్రీమీ, రిచ్ టేస్ట్​తో నోటిలో పెట్టుకుంటే ఇట్టే కరిగిపోతుంది. సరైన పద్ధతి, రెసిపీ తెలిస్తే ఇంట్లో కూడా అదే స్టైల్ మలై గ్రేవీ కర్రీని తయారు చేసుకోవచ్చు. మలై ఎగ్ కర్రీ అసలైన రుచి దాని గ్రేవీలోనే ఉంటుంది. క్రీమ్​ కోసం జీడిపప్పు, తేలికపాటి మసాల దినుసులు ఉపయోగిస్తారు. ఇదే కర్రీ రుచిని రిచ్, రాయల్‌గా చేస్తుంది.

 మలై ఎగ్ కర్రీ తయారీ విధానం.. 

మలై ఎగ్ కర్రీలో.. గ్రేవీ ముఖ్యమైన భాగం. రెస్టారెంట్ స్టైల్లో గ్రేవీ చేయాలనుకుంటే.. ఉల్లిపాయ పేస్ట్, ఫ్రెష్ క్రీమ్ అవసరం. జీడిపప్పు గ్రేవీకి చిక్కదనాన్ని ఇస్తుంది. క్రీమ్ దానిని రిచ్‌గా చేస్తుంది. క్రీమ్ లేకపోతే.. గ్రేవీ అంత మృదువుగా ఉండదు. జీడిపప్పు లేకపోతే రుచి అంతగా అనిపించదు. కావాల్సిన పదార్థాలు, వాటితో గ్రేవీ ఎలా చేయాలో చూసేద్దాం. 

కావాల్సిన పదార్థాలు

• 1 నుంచి 2 ఉల్లిపాయలు (ముక్కలు చేసినవి)
• 8 నుంచి 10 జీడిపప్పు
• 1 టీస్పూన్ గసగసాలు 
• 1 టీస్పూన్ అల్లం-వెల్లుల్లి
• 1 పచ్చిమిరపకాయ
• కొంచెం నీరు

ముందుగా ఒక పాన్‌లో ఈ పదార్థాలన్నింటినీ వేసి తక్కువ మంట మీద 10 నుంచి 12 నిమిషాలు ఉడికించాలి. ఇది ఉల్లిపాయల్లోని పచ్చిదనాన్ని తొలగిస్తుంది. జీడిపప్పు, గసగసాలు మెత్తబడి గ్రేవీకి క్రీమీ ఆకృతిని ఇవ్వడానికి సిద్ధంగా ఉంటాయి. ఇప్పుడు ఈ మిశ్రమాన్ని పూర్తిగా చల్లార్చి మిక్సర్‌లో వేసి.. మృదువైన పాల లాంటి పేస్ట్‌గా తయారు చేసుకోవాలి. ఇది రెస్టారెంట్-శైలి బేస్. ఇది గ్రేవీని చిక్కగా, రిచ్‌గా, చాలా క్రీమీగా చేస్తుంది.

గుడ్లు ఎలా చేసుకోవాలంటే..  

4 నుంచి 5 ఉడికించిన గుడ్లకు ఘాట్లు పెట్టుకోవాలి. ఇలా చేస్తే మసాలా లోపలికి వెళుతుంది. ఒక పాన్‌లో 1 నుంచి 2 టేబుల్ స్పూన్ల నెయ్యి వేసి వేడి చేయాలి. ఇప్పుడు గుడ్లను పాన్‌లో వేసి.. మధ్యస్థ మంట మీద లేత గోధుమరంగు లేదా ఎరుపు రంగు వచ్చే వరకు వేయించాలి. ఈ దశ గుడ్లను బయట నుండి కొద్దిగా క్రిస్పీగా చేస్తుంది. గ్రేవీలో వేసినప్పుడు రుచి చాలా బాగుంటుంది. గుడ్లు తీసిన తర్వాత.. అదే పాన్‌లో నెయ్యి వేసి యాలకులు, షాజీరా, దాల్చిన చెక్క, బిర్యానీ ఆకు వేయాలి.

గ్రేవీ తయారు చేసే విధానం 

మసాలా దినుసులు వేగిన తర్వాత.. అదే పాన్‌లో ముందుగా తయారుచేసిన ఉల్లిపాయ, జీడిపప్పు పేస్ట్ వేసి బాగా కలపాలి. ఇప్పుడు రుచికి తగినంత కారం.. దానితో పాటు జీలకర్ర పొడి, ఉప్పు, కొంచెం చక్కెర వేయాలి. ఇప్పుడు పాన్‌ను మూసివేసి.. 7 నుంచి 8 నిమిషాలు ఉడికించాలి. పేస్ట్ అంటుకోకుండా మధ్యలో కలుపుతూ ఉండాలి.  ఈ మసాలా బాగా ఉడికి.. దాని రంగు లేత గోధుమరంగులోకి మారినప్పుడు.. ఫ్రెష్ క్రీమ్ వేయాలి. అది రిచ్‌గా మారడానికి 5-6 నిమిషాలు ఉడికించాలి. ఆ తర్వాత కొంచెం నీరు వేసి గ్రేవీలో వేయించిన గుడ్లు వేయాలి. కాసేపు కలిపి.. గరం మసాలా, కసూరి మెంతి వేసి కలిపి.. తక్కువ మంట మీద ఉడికించాలి. అంతే రెస్టారెంట్ స్టైల్ మలై ఎగ్ కర్రీ రెడీ. ఇది చపాతీల్లో, రోటీల్లో, అన్నంలో కూడా మంచి కాంబినేషన్ అవుతుంది. 

మరిన్ని చదవండి

చలికాలంలో పిల్లల నుంచి పెద్దల వరకు కచ్చితంగా తినాల్సిన లడ్డూలు ఇవే.. టేస్టీ రెసిపీ

ఆరోగ్యానికి మేలు చేసి, బరువును తగ్గించే మీల్ మేకర్ కర్రీ.. టేస్టీ, హెల్తీ రెసిపీ ఇదే