Udhayanidhi Stalin: నా అరెస్ట్ పెద్ద కామెడీ- ఎవరికీ భయపడను, మళ్లీ మళ్లీ మాట్లాడతాను: ఉదయనిధి స్టాలిన్

Udhayanidhi Stalin: త్రిషపై అసభ్యకర వ్యాఖ్యలు చేశారన్న ఆరోపణలతో అరెస్టు అయిన తమిళనాడు ప్రతిపక్ష నేత ఉదయనిధి స్టాలిన్‌కు హైకోర్టులో ఊరట లభించడంతో జైలు నుంచి రాత్రి విడుదలయ్యారు.

నా అరెస్ట్ పెద్ద కామెడీ- ఎవరికీ భయపడను, మళ్లీ మళ్లీ మాట్లాడతాను: ఉదయనిధి స్టాలిన్

Source : social media

Show Quick Read

Key points generated by AI, verified by newsroom

• త్రిష వ్యాఖ్యల కేసులో ఉదయనిధి అరెస్టు, బెయిల్‌పై విడుదల.
• సీఎం విజయ్ డైవర్షన్ రాజకీయాలపై ఉదయనిధి స్టాలిన్ విమర్శలు చేశారు.
• రైతుల కోసం భయం లేకుండా వందసార్లు మాట్లాడతానని ప్రతిజ్ఞ.

చెన్నై: సినీ నటి త్రిష, సీఎం విజయ్‌పై పరోక్ష వ్యాఖ్యలు చేసిన కేసులో అరెస్టయిన డీఎంకేకు చెందిన ప్రతిపక్ష నేత ఉదయనిధి స్టాలిన్‌ స్టేషన్ బెయిల్‌పై విడుదలయ్యారు. తాను ఏ తప్పు మాట్లాడలేదని, ఎవరికీ భయపడడని.. మళ్లీ మళ్లీ మాట్లాడతా అన్నారు. తన అరెస్ట్ పెద్ద కామెడీ అంటూ సెటైర్లు వేశారు. త్రిష గురించి డబుల్ మీనింగ్‌గా మాట్లాడారన్న ఆరోపణలపై మంగళవారం ఉదయం పోలీసులు ఉధయనిధి స్టాలిన్ ను అరెస్ట్ చేసి విచారణ నిమిత్తం చెన్నై నుండి తంజావూరుకు తీసుకెళ్లారు. హైకోర్టుకు వెళ్లగా ఆయనకు బెయిల్ మంజూరు చేసింది. అయితే విచారణ ముగిసిన తరువాత వదిలేస్తామని పోలీసులు కోర్టుకు తెలిపారు. సుదీర్ఘంగా విచారణ చేసిన పోలీసులు ఉదయనిధి స్టాలిన్‌ను విడుదల చేశారు.

నా మాటలు కట్ కాపీ పేస్ట్ చేశారు..

తిరుచ్చి విమానాశ్రయంలో మీడియాతో మాట్లాడిన ఉదయనిధి స్టాలిన్.. తాను మాట్లాడని విషయాలను కట్ కాపీ పేస్ట్ చేసి మార్చి మార్చి ప్రసారం చేశారని ఆరోపించారు. తాను మాట్లాడని విషయాలను సోషల్ మీడియాలో వైరల్ చేశారని ఆరోపించారు. తాను ఎలాంటి డబుల్ మీనింగ్ కామెంట్లు చేయలేదని, ఒకే అర్థంలో మాట్లాడానని స్పష్టం చేశారు. తన అరెస్ట్ వాస్తవానికి ఓ కామెడీ అని సంచలన వ్యాఖ్యలు చేశారు. ఈ అరెస్టు చర్యలకు భయపడకుండా, మళ్లీ రైతుల కోసం మాట్లాడతానని తెలిపారు.

విజయ్ డైవర్షన్ పాలిటిక్స్‌లో ఇది భాగమే..

విజయ్ టీవీకే ప్రభుత్వం డైవర్షన్ ట్యాక్టిక్స్ మొదలుపెట్టిందని, అందులో భాగంగానే పూర్తిగా అబద్ధపు వార్తలనే ప్రసారం చేస్తూ ప్రజల దృష్టిని మళ్లిస్తోందని ఉదయనిధి ఆరోపించారు.  నిన్న మాట్లాడేటప్పుడే తాను ఈ విషయం చెప్పానని గుర్తుచేశారు. రాష్ట్రంలో ఏదైనా ఒక సమస్య తలెత్తినప్పుడు, దానిని దారి మళ్లించడానికి ఏదో ఒక సమస్యను తీసుకుని సీఎం విజయ్ ఫోటో షూట్ చేస్తారని ఎద్దేవా చేశారు.

డీఎంకే పథకాలను సందర్శించి, పోజు ఇచ్చి దానిని రీల్స్‌గా విడుదల చేయడంలో టీవీకే ప్రభుత్వం బిజీగా ఉందని ఉదయనిధి ఆరోపించారు. టీవీకే (TVK) నిర్వాహకులే తమ శాసనసభ సభ్యులపై అనేక నేరాలకు సంబంధించిన ఆరోపణలు చేసినప్పటికీ, వాటిపై ఎటువంటి చర్యలు తీసుకోకుండా, డీఎంకే నేతల్ని టార్గెట్ ద్వారా డైవర్షన్ పాలిటిక్స్ చేస్తున్నారని విమర్శించారు.

భయపడను, మళ్లీ మాట్లాడతాను..
రైతుల కోసం మాట్లాడినందుకు ఈ ప్రభుత్వం తనను అరెస్టు చేసిందన్నారు. నేను మళ్లీ చెబుతున్నాను, ఈ అరెస్టుకు భయపడను. ఇంకా 100 సార్లు మళ్లీ మళ్లీ మాట్లాడతాను. డబుల్ మీనింగ్‌లో మాట్లాడలేదు. సింగిల్ మీనింగ్‌లో మాట్లాడాను అన్నారు. తమిళనాడులోని ప్రతి మహిళను తన సొంత తల్లిగా, సోదరిగా భావిస్తానని, ఎవరినీ కించపరిచే ఉద్దేశం తనకు లేదని ఉదయనిధి స్టాలిన్ పేర్కొన్నారు. ప్రభుత్వం మోపిన అబద్ధపు కేసులను చట్టబద్ధంగా ఎదుర్కొంటానని స్పష్టం చేశారు. తన మాటలను పూర్తిగా వినకుండా ఖండించిన నాయకుల తీరుపై విచారం వ్యక్తం చేస్తూ, రైతుల శ్రేయస్సు కోసం ఎన్నిసార్లయినా మాట్లాడటానికి తాను సిద్ధంగా ఉన్నానని ప్రకటించారు.

అసలు వివాదం ఏంటీ..

కావేరీ జలాల వివాదంపై తంజావూరులో జరిగిన ఈ ఆందోళనలో ఆయన తమిళనాడు ప్రభుత్వాన్ని, ముఖ్యమంత్రి విజయ్‌ను తీవ్రంగా విమర్శించారు. అయితే, సీఎంపై వ్యాఖ్యలు చేస్తున్న సమయంలో ఆందోళనకారులు నటి త్రిష పేరుతో నినాదాలు చేశారు. ఈ క్రమంలో ఉదయనిధి కావేరీ నీటిని ఉద్దేశించి చేసిన కొన్ని వ్యాఖ్యలు డబుల్ మీనింగ్ ఉన్నాయంటూ దుమారం రేగింది. దీనిపై టీవీకే (TVK) శ్రేణులు మండిపడ్డాయి. ఉదయనిధి మహిళలను కించపరిచేలా వ్యవహరించారని ఆయన వైఖరిపై తీవ్ర ఆగ్రహం వ్యక్తం చేశాయి.

మరిన్ని చదవండి

త్రిషపై వివాదాస్పద వ్యాఖ్యల కేసులో ఉదయనిధి స్టాలిన్‌కు ఊరట! విడుదల చేయాలని కోర్టు ఆదేశం 

అరెస్టు చేసిన తర్వాత ఉదయనిధి స్టాలిన్ తొలి రియాక్షన్ ఏంటి?