Biryani: నటుడు అజిత్ ఫేవరెట్ తాలా బిర్యానీ - సింపుల్ గా ఇలా ఇంట్లోనే చేసేయొచ్చు

బిర్యానీ అంటే ఎవరికి ఇష్టం ఉండదు చెప్పండి. మరి మీ ఫేవరెట్ హీరో ఇష్టంగా తినే బిర్యానీ తినాలని ఉందా? అయితే ఇలా చేసుకోండి.

Representational Image: Pixabay

నటుడు అజిత్ తమిళ ప్రేక్షకులకి మాత్రమే కాదు తెలుగు వారికీ అభిమాన హీరోనే. ఐదు పదుల వయస్సులో కూడా సిక్స్ ప్యాక్ మెయింటైన్ చేస్తూ కుర్ర హీరోలకి ధీటుగా ఉంటున్నాడు. ఆయనకి ఎంతో ఇష్టమైన ఫుడ్ ఏంటో తెలుసా? తాలా బిర్యానీ. పలు ఇంటర్వ్యూస్ లో కూడా అజిత్ ఈ విషయాన్ని చెప్పారు. మరి మీ అభిమాన హీరోకి ఎంతో ఇష్టమైన తాలా బిర్యానీ ఎలా చేయాలో చూద్దామా!

కావాల్సిన పదార్థాలు

చికెన్- 750 గ్రాములు  

బియ్యం- 2 కప్పులు  

యాలకులు-2

లవంగాలు-2

దాల్చిన చెక్క- 2 ముక్కలు

అల్లం వెల్లుల్లి పేస్ట్- 2 టేబుల్ స్పూన్లు

నేయు- 2 టేబుల్ స్పూన్లు

నూనె- 2 టేబుల్ స్పూన్లు

ఉల్లిపాయలు- 2

కొత్తిమీర

టొమాటోలు-2

పచ్చి మిర్చి- 4

కారం- 1 టేబుల్ స్పూన్

పెరుగు-అరకప్పు

నీళ్ళు- ఆరు కప్పులు

నిమ్మరసం- 1 టేబుల్ స్పూన్

తయారీ విధానం

ఒక గిన్నెలో నీళ్ళు, నిమ్మరసం కలిపి అందులో బియ్యం కొద్దిగా ఉప్పు వేసి ఉడికించుకోవాలి. అన్నం 60 శాతం మాత్రమే ఉడికించుకుని పక్కన పెట్టుకోవాలి. తర్వాత స్టవ్ మీద మరొక మందపాటి పాత్ర పెట్టుకుని నెయ్యి, నూనె వేసుకుని వేడి చేసుకోవాలి. అందులో యాలకులు, లవంగాలు, దాల్చిన చెక్క, అల్లం వెల్లుల్లి పేస్ట్ వేసి బాగా వేయించుకోవాలి. తరిగి పెట్టుకున్న ఉల్లిపాయలు, టమోటాలు, పచ్చిమిర్చి వేసి 4-7 నిమిషాల పాటు వేయించుకోవాలి. ఇప్పుడు అందులో పసుపు, కారం, ఉప్పు వేసి మరికాసేపు ఉడికించుకోవాలి. ముందుగా కలిపి పెట్టుకున్న చికెన్ పెరుగు మిశ్రమం అందులో వేసుకుని మీడియం మంట మైయిదా 35 నిమిషాల పాటు బాగా ఉడికించుకోవాలి.

చికెన్ బాగా ఉడికి నూనె పైకి తేలిన తర్వాత కొన్ని చికెన్ ముక్కలు తీసి పక్కన పెట్టుకోవాలి. ఇప్పుడు ఆ పాత్రలో సగం ఉడికిన అన్నం పొరలు పొరలుగా వేసుకోవాలి. చివరిగా పక్కకి తీసి పెట్టుకున్న చికెన్ కూడా వేసి దాని మీద మరొక లేయర్ అన్నం వేసుకోవాలి. దాని మీద కొన్ని కొత్తిమీర ఆకులు, నిమ్మరసం చల్లుకోవాలి. పాత్రలోని ఆవిరి బయటకి పోకుండా గోధుమ పిండితో పాత్ర మూత అతికించి పెట్టాలి. తర్వాత స్టవ్ మీద మరొక వెడల్పాటి తవా పెట్టుకుని అది వేడెక్కిన తర్వాత ఈ చికెన్ మిశ్రమం ఉన్న పాత్ర పెట్టుకోవాలి. 15-20 నిమిషాల పాటు దమ్ మీద ఉడికించుకోవాలి. ఆవిరి బయటకి పోకుండా గిన్నె మీద బరువైన వస్తువు ఏదైనా పెట్టుకోవచ్చు. అంతే ఎంతో రుచికరమైన తాలా బిర్యానీ రెడీ అయిపోయింది. రైతాతో కలిపి తింటే సూపర్ టేస్టీగా ఉంటుంది. ఇంకెందుకు ఆలస్యం మీకు ఎంతో ఇష్టమైన హీరో అజిత్ ఫేవరెట్ బిర్యానీ మీరు చేసుకుని లాగించేయండి.