Female Fertility : నోటి ఆరోగ్యం సరిగా లేకుంటే తల్లి కావడం కష్టమా? సంతానోత్పత్తిపై జరిగిన కొత్త అధ్యయనంలో షాకింగ్ విషయాలు
Oral Health and Fertility : నోటి ఆరోగ్యం సరిగ్గా లేకుంటే మహిళల్లో ప్రెగ్నెన్సీ సమస్యలు పెరుగుతాయని.. తాజా అధ్యయనం తెలిపింది. అసలు నోటి ఆరోగ్యం సంతానోత్పత్తిపై ఎలాంటి ప్రభావం చూపిస్తుంది?
- నోటి ఆరోగ్యం మొత్తం శరీర ఆరోగ్యంపై ప్రభావం చూపుతుంది.
Oral Inflammation Linked to Egg Quality : దంతాలు, చిగుళ్ల ఆరోగ్యం అనేది నోటికి మాత్రమే పరిమితమైన సమస్యగా చూస్తారు. కానీ ఇది ఆరోగ్యానికి కూడా సంబంధించినది అని నిపుణులు చెప్తారు. కానీ ఒక కొత్త అధ్యయనం ప్రకారం.. ఇది మహిళల్లో సంతానోత్పత్తి సామర్థ్యంపై కూడా ప్రభావం చూపవచ్చు. తాజాగా చేసిన ఓ స్టడీలో నోటిలో దీర్ఘకాలిక వాపు ఉంటే.. అది శరీరంలోని ఇతర భాగాల మాదిరిగానే ప్రత్యుత్పత్తి వ్యవస్థను కూడా ప్రభావితం చేస్తుందని గుర్తించారు. ఇది అండం పనితీరు, నాణ్యతపై కూడా ప్రభావం చూపించవచ్చని తెలిపారు.
తాజా అధ్యయనంలో షాకింగ్ విషయాలు
జర్నల్ ఆఫ్ డెంటల్ రీసెర్చ్లో ప్రచురించిన అధ్యయనం ప్రకారం.. నోటి ఆరోగ్యం సరిగా లేకపోవడమే మహిళల్లో వంధ్యత్వ సమస్యలు పెరగవచ్చని పరిశోధకులు గుర్తించారు. ఈ అధ్యయనంలో పరిశోధకులు డెంటల్ ఇంప్లాంట్లతో సంబంధం ఉన్న వాపును పరిశీలించారు. నోటిలోని వాపు చిగుళ్ళు లేదా దంతాలకే పరిమితం కాదని.. అది ఉత్పత్తి చేసే రోగనిరోధక సంకేతాలు శరీరం అంతటా వ్యాపించి
అండాశయాలను కూడా చేరుకోగలవని పరిశోధనలో వెల్లడైంది.
నోటిలోని వాపు వల్ల అండాశయాలలో వాపును కలిగించే రసాయనాల స్థాయిలు పెరుగుతున్నట్లు పరిశోధనలో గుర్తించారు. అలాగే రోగనిరోధక కణాలలో మార్పులు, ఆక్సీకరణ ఒత్తిడి, అండాశయ కణజాలానికి నష్టం వంటి ప్రభావాలు కూడా పెరుగుతున్నాయట.
అండం నాణ్యతలో మార్పులు
పరిశోధకుల ప్రకారం.. వాపు అండాశయాలలోని ఫోలికల్స్ను కూడా ప్రభావితం చేసింది. ఫోలికల్స్ అనేవి అండాలు అభివృద్ధి చెందే చిన్న బ్యాగ్స్. నోటిలోని వాపు వల్ల ఈ ఫోలికల్స్ అభివృద్ధి దెబ్బతింటుంది. అలాగే అండం నాణ్యత కూడా క్షీణించినట్లు పరిశోధనలో వెల్లడైంది.
అంతేకాకుండా అండాలలోని DNA దెబ్బతినడం, ఎపిజెనెటిక్ మార్పులు జరిగినట్లు కనుగొన్నారు. అంటే ఇవి జన్యువులు పనిచేసే విధానాన్ని ప్రభావితం చేసే మార్పులు. ఇటువంటి మార్పులు మహిళల సంతానోత్పత్తి సామర్థ్యాన్ని దెబ్బతీయవచ్చని పరిశోధకులు భావిస్తున్నారు.
మరో ముఖ్యమైన విషయం ఇదే..
ఈ పరిశోధనలో వెల్లడైన మరో ముఖ్యమైన విషయం ఏమిటంటే అండాలలో గమనించిన మార్పులు.. వయసు పెరిగే కొద్దీ మహిళల సంతానోత్పత్తి సామర్థ్యంలో సహజంగా సంభవించే మార్పులను చాలా వరకు పోలి ఉన్నాయి. దీర్ఘకాలిక వాపు, సంతానోత్పత్తి సామర్థ్యం క్షీణించే ప్రక్రియను ఎలా వేగవంతం చేస్తుందో అర్థం చేసుకోవడానికి ఇది సహాయపడుతుందని పరిశోధకులు అంటున్నారు.
మొత్తం ఆరోగ్యంపై ప్రభావం
వాపును తరచుగా ఒక నార్మల్ సమస్యగా పరిగణిస్తారు. కానీ పరిశోధన ఫలితాలు ఇది పునరుత్పత్తి వ్యవస్థతో సహా మొత్తం శరీరాన్ని ప్రభావితం చేయగలదని చెప్తున్నాయి. నిపుణుల అభిప్రాయం ప్రకారం.. గత కొన్నేళ్లుగా జరిగిన అనేక అధ్యయనాలు నోటి ఆరోగ్యానికి, మొత్తం ఆరోగ్యానికి మధ్య బలమైన సంబంధం ఉందని వెల్లడించాయి. పీరియాంటైటిస్ వంటి తీవ్రమైన చిగుళ్ల వ్యాధికి, గుండె జబ్బులు, మెదడు సమస్యలు, జీవక్రియ లోపాలకు సంబంధం ఉన్నట్లు ఇప్పటికే తేలింది.
గుర్తించుకోవాల్సిన అంశం
తాజాగా పునరుత్పత్తి ఆరోగ్యం కూడా ప్రభావితం కావచ్చని కొత్త పరిశోధన తెలిపింది. ప్రస్తుత పరిశోధన జంతువులపై నిర్వహించారు. కాబట్టి ఖచ్చితమైన నిర్ధారణకు రాకూడదు. మరిన్ని అధ్యయనాలు.. మానవులపై వైద్య పరిశోధన అవసరం కూడా ఉందని శాస్త్రవేత్తలు మరీ చెప్తున్నారు. అలాగే నోటి ఆరోగ్య సమస్యలను లైట్ తీసుకోవద్దని సూచిస్తన్నారు.
ఇలాంటి ఇంట్రెస్టింగ్ హెల్త్ ఆర్టికల్స్ కోసం దీనిని క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
