థాంక్యూ ఆనంద్ సార్.. కాళ్లు చేతులు లేకున్నా త్రివీలర్ నడుపుతున్న దివ్యాంగుడికి బంపర్ ఆఫర్!

కాళ్లు, చేతులు లేకుండా త్రివీలర్‌ను నడిపేస్తున్న ఆ దివ్యాంగుడిని చూసి ఆశ్చర్యపోయిన ఆనంద్ మహీంద్ర.. కీలక నిర్ణయం తీసుకున్నారు.

Image Credit: Twitter

వ్యాపార దిగ్గజం ఆనంద్ మహీంద్ర గురించి ప్రత్యేకంగా పరిచయం అక్కర్లేదు. ఆయన ఏదైనా ట్వీట్ చేశారంటే.. క్షణాల్లో వైరల్ కావల్సిందే. సమయస్ఫూర్తిలోనే కాదు.. సేవల్లో ఆయన ఎప్పుడూ ముందే ఉంటారు. ఎవరైనా ఆపదలో ఉన్నారని తెలిస్తే.. ఆయనకు తోచిన సాయం చేస్తారు. అందుకే.. చాలామంది నెటిజనులకు ఆనంద్ మహీంద్ర అంటే ఇష్టం. ఆయన ట్వీట్లంటే మహా ఇష్టం. ఇటీవల ఆనంద్ మహీంద్ర చేసిన మరో ట్వీట్ కూడా నెటిజనులకు బాగా నచ్చేసింది. అంతేకాదు.. ఆయన మానవత్వానికి అంతా సలాం చేస్తున్నారు. ఇంతకీ ఏమైందంటే.. 

ఢిల్లీలో కాళ్లు-చేతుల్లేని ఓ వ్యక్తి త్రివీలర్ నడుపుతున్న వీడియోను ఆనంద్ మహీంద్ర ట్వీట్ చేశారు. కాళ్లు, చేతులు లేకపోయినా.. అతడు ఆ వాహనాన్ని ఎంతో సులభంగా నడపడం చూసి నెటిజనులు ఆశ్చర్యపోయారు. ‘‘నాకు భార్య, ఇద్దరు పిల్లలు, తండ్రి ఉన్నారు. వారి బాగోగులు చూడాలంటే నేను సంపాదించాలి’’ అని ఆ వీడియోలో ఉన్నర వ్యక్తి చెప్పాడు. సుమారు ఐదేళ్ల నుంచి ఈ వాహనాన్ని నడుపుతున్నానని ఆ వ్యక్తి పేర్కొన్నాడు. 

ఈ వీడియో చూసి చలించిన మహీంద్ర.. ‘‘నా టైమ్‌‌లైన్‌లో ఈ వీడియో కనిపించింది. ఈ వీడియో ఇప్పటిదో, ఎక్కడిదో కూడా నాకు తెలీదు. కానీ, ఈ వీడియోలో ఉన్న వ్యక్తి వైకల్యంతో బాధపడుతున్నా.. అతడి ఆత్మస్థైర్యం చూసి చాలా గొప్పగా అనిపించింది. మెయిల్ డెలివరీలో అతడిని బిజినెస్ అసోసియేట్‌గా నియమించడం సాధ్యమేనా?’’ అంటూ ఆయన తన లాజిస్టిక్స్ కంపెనీ మేనిజంగ్ డైరెక్టర్, సీఈవో రామ్ ప్రవీణ్ స్వామినాథన్‌ను అడిగారు. దీనికి ఆయన సమాధానమిస్తూ.. ‘‘తప్పకుండా ఆనంద్.. వీలైనంత త్వరగా అతడి ఆచూకీ తెలుసుకుంటాం’’ అని తెలిపారు. అతడికి ఉద్యోగం ఇచ్చేందుకు సిద్ధమైన ఆనంద్‌ మహీంద్రాను నెటిజనులు ప్రశంసలతో ముంచెత్తుతున్నారు. సార్.. థాంక్యూ.. అంటూ ఆ వ్యక్తి తరఫును కృతజ్ఞతలు తెలుపుతున్నారు.

Received this on my timeline today. Don’t know how old it is or where it’s from, but I’m awestruck by this gentleman who’s not just faced his disabilities but is GRATEFUL for what he has. Ram, can @Mahindralog_MLL make him a Business Associate for last mile delivery? pic.twitter.com/w3d63wEtvk

— anand mahindra (@anandmahindra) December 27, 2021

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి