Weird: స్నానం చేయని భార్యతో కలిసుండలేను.. విడాకులు కోరిన భర్త

ఆధునిక కాలంలో చిన్న చిన్న విషయాలకే విడాకులు దాకా వెళ్లిపోతున్నారు భార్యాభర్తలు. ఇదిగో ఈ కేసు కూడా అలాంటిదే.

(Image credit: Pexels)

వారిద్దరికీ పెళ్లయి కేవలం రెండేళ్లే. ఆ రెండేళ్ల ప్రేమకు గుర్తుగా ఓ ఏడాది చిన్నారి కూడా. వారి మధ్య గొడవలు వచ్చింది అత్త వల్లో, ఆడపడుచు వల్లో కాదు... స్నానం వల్ల. తన భార్య స్నానం చేయదని అందుకే తనకు విడాకులు కావాలని పట్టుబడుతున్నాడు ఆ భర్త. వీరిద్దరూ నివసించేది ఉత్తరప్రదేశ్లోని అలీఘర్లో. చీకూ చింతాలేని సంసారమే. కానీ స్నానం చిచ్చుపెట్టింది. 

భర్త తన భార్య రోజూ స్నానం చేయదని, ఎందుకు చేయలేదని ప్రశ్నిస్తే  గొడవపడుతుందని, తరచూ ఇదే విషయంపై ఇంట్లో గొడవలు అవుతున్నాయని, అందుకే విడాకులు కావాలని కోర్టుకెక్కాడు. భార్య తన వివాహబంధాన్ని కాపాడుకునేందుకు  ఉమెన్ ప్రొటెక్షన్ సెల్ ను ఆశ్రయించింది. తన భర్త త్రిపుల్ తలాక్ చెప్పాడని, విడాకులు తీసుకోవడం ఇష్టంలేదని, భర్తతో కలిసి జీవిస్తానని అధికారులకు చెప్పింది. దీంతో ఉమెన్ ప్రొటెక్షన్ సెల్ ఈ జంటకు కౌన్సిలింగ్ ప్రారంభించారు. భార్య విడాకులు వద్దంటున్నా... భర్త మాత్రం కావాలని పట్టుబడుతున్నాడు. స్నానం చేయని భార్యతో కలిసుండలేనని అంటున్నాడు. అయితే అధికారులు మాత్రం భార్యతో కలిసుండేందుకు ఒప్పిస్తున్నారు. ఇది చాలా చిన్న సమస్య అని, పరిష్కరించుకోవచ్చని, విడాకులు అవసరం లేదని వివరిస్తున్నారు. అతను తీసుకునే నిర్ణయం చిన్నబిడ్డ భవిష్యత్తుపై కూడా తీవ్ర  ప్రభావం చూపిస్తుందని అర్థమయ్యేలా చెప్పేందుకు ప్రయత్నిస్తున్నారు. 

ఇద్దరు దంపతులతో పాటూ వారి తల్లిదండ్రులను కూడా కౌన్సిలింగ్ కు పిలిచారు. వారిద్దరికీ ఆలోచించుకోవడానికి సమయం ఇచ్చినట్టు చెబుతున్నారు ప్రొటెక్షన్ సెల్ అధికారులు. వారు మాట్లాడుతూ విడాకులకు చెప్పిన కారణం మహిళలపై హింస, నేరం కిందకు రాదని, కాబట్టి పిటిషన్ ముందుకు సాగడం కష్టమేనని అంటున్నారు. కౌన్సిలింగ్ తోనే సమస్యను పరిష్కరిస్తామని చెబుతున్నారు. భార్య ఒప్పుకోకుండా భర్తకు విడాకులు రావడం కష్టమని అంటున్నారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి

Also read: లగ్జరీ ద్రాక్ష.. ఒక్క పండు తినాలంటే రూ.35,000 ఖర్చుపెట్టాలి
Also read: పుట్టగొడుగులు శాకాహారమా? మాంసాహారమా? శాస్త్రవేత్తలు ఏం చెబుతున్నారు?
Also read: ఆకుకూరల గురించి అపోహలు వీడమంటున్న ఆయుర్వేదం