వంటల్లో ఉప్పు అధికంగా పడిందా? ఈ సింపుల్ చిట్కాలు పాటించండి

ఏదైనా వండినప్పుడు అనుకోకుండా ఉప్పో,కారమో అధికంగా వేయడం సహజం. ఎక్కువ మంది చేసే పని ఉప్పు అధికంగా వేయడమే.

(Image credit: Pixabay)

ఏ వంటకమైనా రుచిగా రావాలంటే అన్ని సమపాళ్లలో పడాలి. ఒకటి ఎక్కువ పడి, ఇంకోటి తక్కువ పడినా కూడా రుచి బాగోదు. ముఖ్యంగా కూరలు, సూప్‌లు వంటి వాటిలో ఉప్పు, కారం అనేవి ప్రధాన పాత్ర పోషిస్తాయి. ఆ రెండింటి రుచి సమపాళ్లలో ఉంటేనే ఆ కూరకు రుచి వస్తుంది.  కానీ కొన్నిసార్లు అనుకోకుండా ఉప్పు అధికంగా పడుతుంది. అధికంగా పడిన ఉప్పుని తినడం కూడా ప్రమాదమే. ఉప్పు అధికంగా పడ్డాక దాని తొలగించడం కష్టం అనుకుంటారు చాలామంది. కానీ చిన్న చిన్న చిట్కాలు పాటించడం ద్వారా అధిక ఉప్పును సరి చేయవచ్చు. రుచిలో ఎలాంటి తేడా లేకుండా, ఆ వంటని మళ్ళీ కొత్తగా మార్చవచ్చు. 

ఏం చేయాలంటే...
1. కూరలో ఉప్పు అధికంగా పడినప్పుడు దానికి ఆమ్లగుణం ఉన్న పదార్థాలను జోడించడం వల్ల ఉప్పు రుచి సమతుల్యం అవుతుంది. అంటే టమోటో ప్యూరీ, నిమ్మరసం, వెనిగర్ వంటివి ఆమ్ల పదార్థాలు. వీటి రుచులు కాస్త ట్యాంగీ టచ్ ను అందిస్తుంది. అంటే పుల్లదనాన్ని ఇస్తుంది. వీటిని ఉప్పు ఎక్కువ పడిన కూరలో వేసి కలపడం వల్ల కూర రుచి కూడా పెరుగుతుంది. అలాగే గొప్పదనం కూడా తగ్గుతుంది. కూర క్వాంటిటీ కూడా ఎక్కువ అవుతుంది.

2. ఏదైనా వెజిటబుల్ కర్రీ వండుతున్నప్పుడు ఉప్పు అధికంగా పడితే దానికి సింపుల్ చిట్కా... ఆ కూరలో మరిన్ని కూరగాయలను జోడించడమే. అప్పుడు ఉప్పు సమతుల్యం అయిపోతుంది. కూరగాయలను మరింతగా జోడించడం వల్ల కూర రుచి పెరుగుతుంది, కానీ తరగదు. అలాగే సోయా చంక్స్ వంటివి ఇంట్లో ఉంటే... నీటిలో నానబెట్టి వాటిని యాడ్ చేయడం వల్ల కూడా గొప్పదనం తగ్గుతుంది.

3. కూర లేదా సూప్ వంటివి వండుతున్నప్పుడు ఉప్పు అధికంగా పడితే గ్లాసు నీటిని వేసి కాసేపు ఉడికించండి. నీటిని వేయడం వల్ల ఉప్పు పల్చబడుతుంది. కూరలో ఉప్పదనం తగ్గుతుంది.

4. ఉప్పు అధికంగా పడింది అనుకుంటే ఇతర పదార్థాలు ఏమీ కలపడానికి లేనప్పుడు చక్కెరను జోడించడం కూడా ఒక పద్ధతి. ఎందుకంటే చక్కెర లవణాన్ని అడ్డుకుంటుంది. వంటకం రుచిని సమతుల్యం చేస్తుంది. ఉప్పదనం తెలియకుండా చేస్తుంది.

5. తాజా క్రీమ్ లేదా పాలు వంటివి ఇంట్లో ఉన్నప్పుడు అదనపు ఉప్పును అడ్డుకునేందుకు కూరల్లో వీటిని వేసుకోవచ్చు. ఎందుకంటే క్రీమ్, పాలల్లో కూడా చక్కెర ఉంటుంది. ఇది సమర్థవంతంగా ఉప్పదనాన్ని సమతుల్యం చేస్తుంది. అంతేకాదు రుచిని కూడా పెంచుతుంది. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.