Heart Beat: తరచూ గుండె వేగంగా కొట్టుకుంటోందా? ఇవే కారణాలు కావచ్చు

గుండె కొట్టుకునే వేగంపై శరీర ఆరోగ్యస్థితి, మానసిక స్థితి కూడా ప్రభావం చూపిస్తాయి.

(Image credit: Pixabay)

గుండె చాలా ప్రధానమైన అవయవం. దాని పనితీరులో కాస్త తేడా వచ్చినా కూడా కచ్చితంగా పట్టించుకోవాల్సిందే. చాలా మందికి కొన్ని సార్లు గుండె వేగంగా కొట్టుకుంటుంది. ఏదైనా ఘటన జరిగినప్పుడు, భయపడినప్పుడో, బాగా కష్టపడినప్పుడో, పరుగెత్తినప్పుడో.. అలా కొట్టుకోవడం సహజం. కానీ ఏమీ లేకుండా గుండె వేగంగా కొట్టుకుంటోందంటే కాస్త ఆలోచించాల్సిన విషయమే. ఇలా నిత్యం గుండె వేగంగా కొట్టుకున్నట్టు అనిపిస్తే వైద్యులను కచ్చితంగా సంప్రదించాల్సిందే. 

గుండె రేటు ఎంత ఉండాలి?
సాధారణ  వ్యక్తి గుండె కొట్టుకునే రేటు నిమిషానికి 60 నుంచి 100 మధ్యలో ఉండాలి. నిమిషానికి 72 సార్లు కొట్టుకుంటంటే చాలా ఆరోగ్యంగా ఉన్నట్టు లెక్క. కానీ కొందరికీ మాత్రం నిమిషానికి 100కు పైగా గుండె కొట్టుకుంటోంది. ఇలా ఎల్లప్పుడూ కొట్టుకోవడం మంచిది కాదు. దీన్ని ‘టాకీ కార్డియా’ అంటారు.దీన్ని పట్టించుకోకుండా వదిలేస్తే ఎప్పటికైనా గుండెకు ముప్పుగా మారుతుంది. 

కారణాలు ఇవి కావచ్చు..
గుండె అధికంగా కొట్టుకోవడానికి కొన్ని అనారోగ్య సమస్యలు కారణం కావచ్చు. రక్తహీనత, బీపీ తక్కువగా ఉన్నప్పుడు, షుగర్ లెవెల్స్ తక్కువగా ఉన్నప్పుడు, జ్వరం, డీహైడ్రేషన్ కు గురైనప్పుడు, మద్యం తాగడం, ధూమపానం, డ్రగ్స్ వాడడం, టీ, కాఫీలు అధికంగా తాగడం ఇలాంటి కారణాల వల్ల కూడా గుండె వేగం పెరిగిపోతుంది. కొన్ని రోజుల పాటూ ఈ పరిస్థితి కొనసాగితే దానికి కచ్చితంగా చికిత్స అవసరం. లేకుంటే ఏ క్షణమైన హార్ట్ ఫెయిలయ్యే పరిస్థితి ఏర్పడవచ్చు. ఇప్పుడు వయసుతో సంబంధం లేకుండా గుండె జబ్బులు వచ్చిపడుతున్నాయి. ఇలాంటి కాలంలో ముందస్తు జాగ్రత్తలు తీసుకోవడం చాలా మేలు. 

వైద్యులు ఏం చేస్తారు?
కార్డియాలజిస్టులు ముందు మీ గుండె కొట్టుకునే రేటును పరిశీలిస్తారు. దాని తరువాత ఈసీజీ, ఎక్స్ రే, ఎకో టెస్ట్ వంటివి సూచిస్తారు. దీంట్లో మీ గుండె పరిస్థితి వారికి పూర్తిగా అర్ధమైపోతుంది. దీని వల్ల పరిస్థితి చేయి దాటక ముందే మిమ్మల్ని మీరు కాపాడుకోవచ్చు. ఛాతీలో నొప్పిగా అనిపించినా, తల తిరగడం శ్వాస తీసుకోవడానికి ఇబ్బంది పడడం వంటివి తరచచూ అనిపిస్తున్నా కూడా చాలా జాగ్రత్తగా ఉండాలి. ఇవి హార్ట్ ఎటాక్ కు సంబంధించిన లక్షణాలు. గుండె కొట్టుకునే వేగం పెరిగినట్టు అనిపిస్తే వెంటనే వైద్యులను సంప్రదించడంపై మాత్రం అశ్రద్ధ చేయవద్దు.