Weight Loss: పాస్తా తింటే బరువు తగ్గుతారా? ఎటువంటి పాస్తా ఎంచుకోవాలి?

చాలా త్వరగా చేసుకునే బ్రేక్ ఫాస్ట్ లో పాస్తా ఒకటి. బరువు తగ్గాలని అనుకునే వాళ్ళు పాస్తా ఎంచుకోవచ్చా అంటే ఖచ్చితంగా తినొచ్చని పోషకాహార నిపుణులు చెప్తున్నారు. సాధారణంగా బరువు తగ్గడం కోసం ఇష్టమైన ఆహారం వదిలేసి చప్పగా ఉండే ఆహారాలు తీసుకుంటారు. అలా చేసినంత మాత్రాన బరువు తగ్గరు. సరైన ఆహారం ఎంచుకోవాలి. మీకు పాస్తా ఆల్ టైమ్ ఫేవరెట్ అయితే చక్కగా దాన్ని లాగించేయండి. అయితే అందులో ఎక్కువగా ఛీజ్ వేసుకుని తినకూడదు.

కూరగాయలు జోడించాలి

పాస్తాను పోషకాలు నిండిన ఆహారంగా చేయాలంటే అందులో కూరగాయలు జోడించుకోవాలి. పాస్తా, కూరగాయల నిష్పత్తి 1:2 గా ఉండాలి. ఉల్లిపాయలు, టొమాటో, క్యాప్సికమ్, బెల్ పెప్పర్, మొక్కజొన్న, పుట్టగొడుగులు, బ్రకోలి, క్యారెట్ లేదా మీకు నచ్చిన ఇతర ఏదైనా కూరగాయలు వేసుకుని తీసుకోవచ్చు. కొద్దిగా నూనెలో కూరగాయ ముక్కలు వేసి వేయించుకుని దానిపై ఉడికించిన పాస్తా కలుపుకోవచ్చు.

పాస్తా రకం ముఖ్యం

మైదా లేదా సూజీ ఆధారిత పాస్తాను ఎంచుకునే బదులు ఆరోగ్యకరమైన దాన్ని ఎంచుకోవాలి. మార్కెట్లో అనేక రకాల పాస్తాలు అందుబాటులో ఉంటాయి. వీటిని బరువు తగ్గించే ఆహారంలో సులభంగా చేర్చుకోవచ్చు. బుక్వీట్ పాస్తా, హోల్ వీట్ పాస్తా, చిక్‌పీ పాస్తా, రాజ్మా పాస్తా, లెంటిల్ పాస్తా, మఖానా పాస్తా వంటి పాస్తా వేరియంట్‌లు ఉత్తమ ఎంపికలు.

ఎంత తీసుకుంటున్నారు?

బరువు తగ్గించే ఆహారం తీసుకునేటప్పుడు తప్పనిసరిగా గుర్తుంచుకోవాల్సిన విషయం ఆహార పరిమాణం. బరువుని అదుపులో ఉంచే విషయంలో ఆహార పరిమాణం ప్రధాన పాత్ర పోషిస్తుంది. భారీగా భోజనం చేస్తే బరువు తగ్గరు. కేవలం ఒక చిన్న గిన్నె పాస్తా మాత్రమే తీసుకోవాలి. 80 శాతం పొట్ట నింపుకుని 20 శాతం ఖాళీ కడుపుతో ఉండటం ఎప్పుడు మంచిది.

రుచికరమైన పాస్తా ఇలా చేయండి

ఒక కప్పు గోధుమ పాస్తాను తీసుకుని తగినంత నీటిలో ఉడకబెట్టాలి. ఉడికిన తర్వాత అందులోని నీటిని తీసేయాలి. ఒక పాన్ తీసుకుని అందులో ఒక టేబుల్ స్పూన్ నూనె వేసి వేడి చేసుకోవాలి. తరిగిన ఉల్లిపాయ, వెల్లుల్లి ముక్కలు వేసి ఒక నిమిషం పాటు వేయించాలి. అందులో టొమాటో, క్యాప్సికమ్, సొరకాయ, బెల్ పెప్పర్, పుట్టగొడుగులు, మొక్కజొన్న మొదలైన 2 కప్పుల తరిగిన కూరగాయలు వేసుకోవాలి. రుచికి సరిపడా ఉప్పు వేసుకుని అందులో కాస్త నల్ల మిరియాల పొడిని వేసుకోవాలి. వాటిని 6-7 నిమిషాల పాటు ఉడికించుకోవాలి. బాగా వేగిన కూరగాయ ముక్కలో ముందుగా ఉడకబెట్టిన పాస్తా వేసి కలుపుకోవాలి. మరొక రెండు నిమిషాల పాటు ఉడికించి సర్వ్ చేసుకోవడమే. ఎంతో రుచికరమైన పాస్తా రెడీ అయిపోయింది. దీన్ని తీసుకోవడం వల్ల పాస్తా తినాలనే మీ కోరిక తీరుతుంది. కూరగాయ ముక్కలు జోడించడం వల్ల బరువు అదుపులో ఉంటుంది.

గమనిక: పలు అధ్యయనాలు, పరిశోధనల నుంచి సేకరించిన సమాచారాన్ని ఇక్కడ యథావిధిగా అందించాం. ఇది వైద్య నిపుణుల సూచనలకు ప్రత్యామ్నాయం కాదు. తప్పకుండా వైద్యుడు లేదా ఆహార నిపుణుల సలహా తీసుకున్న తర్వాతే ఈ ఆహారాన్ని మీ డైట్‌లో చేర్చుకోవాలి. ఈ సమాచారం కేవలం మీ అవగాహన కోసమే.

Also Read: కాకరకాయ చేదు వదిలించే సింపుల్ మార్గాలు ఇవే!