Black Idlis: బొగ్గులు కావివి.. బ్లాక్ ఇడ్లీలు.. ఆపండ్రా మీ అరాచకం!

ఈ ఇడ్లీలను చూస్తే మీకు ఏమనిపిస్తోంది? పొయ్యలో బొగ్గులను నేరుగా ప్లేట్లో వేసి ఇచ్చేస్తున్నారేమో అనిపిస్తుందా? అయినా.. రోజూ ఆ తెల్ల ఇడ్లీలు ఏం తింటారు.. కాస్త నల్లవి కూడా ట్రై చేయండి.

Written By : ABP Desam | Edited By: Suresh Chelluboyina | Updated at : 15 Dec 2021 05:41 PM (IST)

Black Detox Idlis Leaves Foodies Baffled, Video Goes Viral Black Idlis: బొగ్గులు కావివి.. బ్లాక్ ఇడ్లీలు.. ఆపండ్రా మీ అరాచకం!

Image Credit: VIVEK N AYESHA | NAGPUR BLOGGER

ఫుడ్ అంటే.. చూడగానే నోరూరేలా ఉండాలి. కానీ, ‘‘బాబోయ్’’ అని ముఖం చిట్లించేలా ఉండకూడదు. ఇదిగో ఈ ఇడ్లీలను చూస్తే మీకు అదే ఫీలింగ్ కలుగుతుంది. ఇదేంటీ మాడిపోయిన ఇడ్లీలు వడ్డిస్తున్నారా? లేదా బొగ్గులనే ఇడ్లీలుగా మార్చేశారా అని ఆశ్చర్యపోవద్దు. ఎందుకంటే.. వాటిని కావాలనే నల్ల రంగులో తయారు చేసి ‘బ్లాక్ ఇడ్లీ’ అని నామకరణం చేశారు. ఈ వెరైటీ ఇడ్లీలను మీరు తిని తరించండని పిలుస్తున్నారు. ఈ ఇడ్లీలను చూసిన ఆహార ప్రియులు.. ఇక ఆపండ్రా మీ అరాచకం అంటూ సోషల్ మీడియా ద్వారా తమ ఆవేదన వ్యక్తం చేస్తున్నారు.

ఇటీవల చాక్లెట్ మ్యాగీ, రసగుల్లా చాట్, పిజ్జా దోశలు ఏ స్థాయిలో వైరల్‌గా మారాయో తెలిసిందే. ముఖ్యంగా భారతీయ సాంప్రదాయ అల్పాహారాల్లో ఒకటైన దోశను వెరైటీ పేరుతో ఎన్ని చిత్ర హింసలకు గురిచేస్తున్నారో తెలిసిందే. తాజాగా ఇడ్లీని కూడా ఖూనీ చేసేస్తున్నారు. నాగపూర్‌లోని ఓ ఫుడ్ సెంటర్‌లో ‘బ్లాక్ డిటాక్స్ ఇడ్లీ’ పేరుతో నల్ల రంగు ఇడ్లీలను అమ్మేస్తున్నారు. ఫుడ్ బ్లాగర్ వివేక్, అయేషాలు ఇటీవల ఈ ఇడ్లీల వీడియోను తమ ఇన్‌స్టాగ్రామ్ పేజీలో పోస్ట్ చేశారు. అంతే.. అది క్షణాల్లో వైరల్‌గా మారింది. ‘‘మీరు ఎప్పుడైనా బ్లాక్ ఇడ్లీలను తిన్నారా?’’ అంటూ ఆ పోస్ట్‌కు క్యాప్షన్ ఇచ్చారు. దీంతో ఫాలోవర్లు రకరకాల సమాధానాలు ఇస్తున్నారు.

ఇప్పటివరకు ఈ వీడియోను లక్ష మందికి పైగా లైక్ చేశారు. ‘‘వీళ్లను ఇలాగే వదిలేస్తే భవిష్యత్తులో రైన్ బో ఇడ్లీ కూడా తయారు చేసి అమ్మేస్తారు’’ అని ఓ నెటిజన్ కామెంట్ చేశాడు. ‘‘ఇడ్లీ తెల్లగా ఉంటే మీకు ఏ నష్టం వచ్చింది?’’ అని ఇంకొకరు అన్నారు. ఏదో ఒక రోజు వీళ్లు.. ‘‘రాళ్లు, రప్పలతో కూడా ఇడ్లీలు తయారు చేసి వడ్డించేస్తారు’’ అని కామెంట్ చేశారు. అయితే, కొందరు మాత్రం.. ఈ ఇడ్లీ అంత నల్లగా మారేందుకు ఏం కలిపారని ఆసక్తిగా అడుగుతున్నారు. అన్నట్లు.. ఆ ఇండ్లీలో ఏం కలిపి ఉంటారు??