Smoking: ధూమపానంతో కంటిచూపుకు పొంచి ఉన్న ప్రమాదం - త్వరగా కంటి శుక్లాలు వచ్చే అవకాశం

ధూమపానం ఎంతో ప్రమాదకరమైనదని తెలిసి కూడా కొంతమంది దాన్ని వదిలలేకపోతున్నారు.

(Image credit: Pixabay)

ధూమపానం వల్ల ఎన్నో రకాల రోగాలు వస్తాయని అందరికీ తెలిసింది. ఊపిరితిత్తుల క్యాన్సర్ వచ్చే ముప్పు చాలా ఎక్కువ. అయితే ధూమపానం వల్ల కంటి చూపుకు కూడా నష్టం కలుగుతుందని చెబుతున్నారు శాస్త్రవేత్తలు. ధూమపానం చేయని వారితో పోలిస్తే చేసేవారిలో త్వరగా కంటిచూపు పోయే అవకాశం ఉంది. అలాగే కంటి శుక్లాలు వచ్చే ఛాన్సులు ఎక్కువ. ఒక కంటిలో కాదు రెండు కళ్ళల్లో కూడా కంటి శుక్లాలు ఏర్పడే అవకాశం ఉంది. కాబట్టి ధూమపానాన్ని దూరంగా పెట్టాలి. ముఖ్యంగా వృద్ధులు ధూమపానం చేయడం పూర్తిగా మానేయాలి. 

కంటి చూపుకి ఎలా నష్టం?
సిగరెట్ తాగడం వల్ల కంటి ఆరోగ్యం క్షీణిస్తుంది. ఇది కంటిలోని ప్రధాన భాగాలపై హానికరమైన ప్రభావాన్ని చూపిస్తుంది. అస్పష్టమైన దృష్టి, మసక మసక మబ్బుల్లా కనిపించడం, చివరికి అంధత్వానికి కారణం అవుతుంది. సిగరెట్ కాల్చడం వల్ల రెండు వందలకు పైగా హానికరమైన రసాయనాలు విడుదలవుతాయి. అవన్నీ కంటిని చేరి కంటిలోని భాగాలను ఇబ్బంది పెడతాయి. ముఖ్యంగా రెటీనా, లెన్స్, మాక్యులా... ఈ మూడింటి పై ప్రభావం చూపిస్తాయి. రెటీనా కాంతిని ప్రాసెస్ చేసే ముఖ్యమైన భాగం.  ఇక లెన్స్ బయటి కాంతి రెటీనాను చేరుకోవడానికి  అనుమతిస్తుంది. మాక్యులా చిన్న చిన్న వస్తువులు కూడా కనిపించేలా చేస్తుంది. రెటీనాలోని చాలా సున్నితమైన భాగం. ఇది పదునైన దృష్టిని అనుమతిస్తుంది. ఈ మూడు భాగాలు ధూమపానంలోని రసాయనాల వల్ల దెబ్బతినే అవకాశం ఉంది.  అందుకే కంటి ఆరోగ్యం కోసం ధూమాపానాన్ని దూరం పెట్టాల్సిన అవసరం ఉంది. 

సిగరెట్ కాల్చాక వచ్చే పొగలో 7000 కంటే ఎక్కువ రసాయనాలు ఉంటాయి. వీటిలో  69 రసాయనాలు క్యాన్సర్ కారకాలు. అందుకే సిగరెట్ కాల్చే వారికి అధికంగా నోటి క్యాన్సర్, గొంతు క్యాన్సర్, ఊపిరితిత్తుల క్యాన్సర్ వచ్చే అవకాశం ఉంది. ధూమపానం వల్ల నోటిలో పుండ్లు పడి అవి క్యాన్సర్ గా మారతాయి. వీరు జీవించే అవకాశం తక్కువ. పొగతాగే అలవాటు ఉన్న వారిలో మూత్ర పిండాల పనితీరు కూడా మందగిస్తుంది.  అధిక రక్తపోటు సమస్యను పెంచుతుంది. హైబీపీ, మధుమేహం ఉన్నవారు ధూమపానానికి దూరంగా ఉండాలి.పొగాకులో ఉండే నికోటిన్ కళ్లను తెబ్బతీస్తుంది. గ్లకోమా వచ్చే ఛాన్సులను పెంచుతుంది. 

ప్రపంచంలో పొగాకును వినియోగించే దేశాల్లో మన దేశం రెండో స్థానంలో ఉంది. మొదటి స్థానంలో చైనా ఉంది. కేవలం ధూమపానం కారణంగా అనారోగ్యాల బారిన పడి మరణిస్తున్న వారి సంఖ్య ప్రతి ఏడాది ఏడు లక్షలకు పైమాటే.

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.